فوتو: قىرمىزى جۇماعاليقىزى
ەستەرىڭىزگە سالا كەتەيىك, 2024 جىلى مەملەكەت باسشىسى مەديتسينا جانە فارماتسەۆتيكا قىزمەتكەرلەرىنىڭ قۇقىقتارىن قورعاۋعا باعىتتالعان جاڭا زاڭعا قول قويدى. بۇل زاڭ دارىگەر ماماندىعىنىڭ بەدەلىن ارتتىرىپ, سالاعا دەگەن سەنىمدىلىكتى نىعايتۋدىڭ ماڭىزدى قادامى.
مەملەكەتتىك قولداۋ شارالارى قاتارىندا الەۋمەتتىك كەپىلدىكتەر, تۇرعىن ءۇي جاعدايىن جاقسارتۋ جانە ماتەريالدىق ىنتالاندىرۋ قاراستىرىلعان.
ناتيجەسىندە 2024 جىلدىڭ قورىتىندىسى بويىنشا:
- دارىگەرلەر تاپشىلىعى 20%-عا قىسقارىپ, 3 986 بىرلىكتى قۇرادى;
- ورتا مەديتسينا قىزمەتكەرلەرىنىڭ جەتىسپەۋشىلىگى 7%-عا ازايىپ, 4 230-دان اسقان.
ايتا كەتەيىك, 2025 جىلعى 1 قاڭتارعا قاراي ەلىمىزدەگى بارلىق ۆەدومستۆولىق مەكەمەلەردى قوسا العاندا, دەنساۋلىق ساقتاۋ جۇيەسىندە 275 مىڭنان استام مەديتسينا قىزمەتكەرى ەڭبەك ەتەدى. ونىڭ ىشىندە:
- 83 مىڭنان استامى – دارىگەرلەر;
- 191 مىڭعا جۋىعى – ورتا مەديتسينالىق ماماندار.
تيمۋر سۇلتانعازيەۆتىڭ ايتۋىنشا, سوڭعى ءۇش جىلدا كادر سانىنىڭ تۇراقتى ءوسۋى بايقالعان.
«سوڭعى ءۇش جىلدا ءبىز مەديتسينا كادرلارى سانىنىڭ ءوسۋى بويىنشا تۇراقتى وڭ ديناميكانى بايقاپ وتىرمىز: دارىگەرلەر سانى 2%-عا, ال ورتا مەديتسينا قىزمەتكەرلەرى 0,5%-عا ءوستى. بۇگىنگى تاڭدا قازاقستاندا مەديتسينالىق كادرلارمەن قامتاماسىز ەتۋ ەىدۇ ەلدەرىنىڭ ورتاشا كورسەتكىشتەرىنەن اسىپ تۇسەدى, بۇل ىسكە اسىرىلىپ جاتقان كادر ساياساتىنىڭ تيىمدىلىگىن راستايدى», دەدى ول.
ايتا كەتەيىك, كاسىبي جاۋاپكەرشىلىكتى ساقتاندىرۋ جۇيەسى 2024 جىلدىڭ قازانىنان باستاپ ىسكە قوسىلدى. ول 186 مىڭنان استام مەديتسينا قىزمەتكەرىن قامتىعان.
سونىمەن قاتار اۋىلعا 5 جىلعا جانە ودان دا ۇزاق مەرزىمگە بارعان تاپشىلىق ماماندىق يەسى دارىگەرلەرگە 100 ەڭ تومەنگى جالاقى مولشەرىندە (8,5 ملن تەڭگە) بىرجولعى جاردەماقى تولەنەدى. قازىرگى تاڭدا 254 دارىگەر وسىنداي قولداۋعا يە بولدى, جالپى سوماسى – 2,1 ملرد تەڭگەدەن اسادى.
