استانا قالاسى دەنە شىنىقتىرۋ جانە سپورت باسقارماسىنىڭ ۇيىمداستىرۋىمەن العاش رەت تۇڭلىگى تۇرىلگەن سايىسقا 100-دەن اسا اۋەسقوي سپورتشى-جۋرناليستەر قاتىستى. «Alpha Gym» سپورت كەشەنىندەگى باسەكەدە قالامگەرلەر لاڭگى تەبۋ, بەس اسىق, اسىق اتۋ, ۆولەيبول بويىنشا سايىستى.
لاڭگى تەبۋدە «حابار» اگەنتتىگىنىڭ وكىلى ماقسات سەرىكجانوۆ 83 ۇپايمەن جەڭىسكە جەتتى. كۇمىس جۇلدە 79 ۇپاي جيناعان «Qazaq radiosy» ءجۋرناليسى مۇقتار تۇرتاي ۇلىنا بۇيىرسا, «حابار» اگەنتتىگىنىنىڭ تاعى ءبىر قىزمەتكەرى مۇحاممەدجان تەمىروۆ (69 ۇپاي) قولا جۇلدەگەر اتاندى.
بەس اسىقتا «رترك قازاقستان» رەداكتورى نۇرعايشا ءابدۋاحيت توپ جارسا, كۇمىس جۇلدە تاڭشولپان رىسكەلديناعا (سپورتتىق مەديتسينالىق ورتالىعى), قولا مەدال اينۇر ۋمرالينوۆاعا (№10 شايبالى حوككەي سپورت مەكتەبى) بۇيىردى.
اسىق اتۋ كوماندالىق سايىس ەرەجەسىمەن ءوتىپ, «رترك قازاقستان» اق ءبىرىنشى ورىندى قانجىعالارىنا بايلادى. «Qazaq radiosy» مەن «حابار» اگەنتتىگى ۇزدىكتەر قاتارىنان كورىندى.
جىل سايىن «BAQ Liga» دوداسىندا جۇلدەگەر قاتارىنان تابىلاتىن حابارلىق ۆولەيبولشىلار فينالدا «Qazaq radiosy» ۇجىمىن 2:0 ەسەبىمەن ايقىن جەڭىپ, التىن مەدال يەلەندى. قولا جۇلدە ءۇشىن وتكەن كەزدەسۋدە «Egemen Qazaqstan» گازەتىنىڭ كومانداسى استانا قالالىق سپورت باسقارماسىنان جاساقتالعان «تارلان» كومانداسىنان باسىم ءتۇستى. «ۇزدىك شابۋىلشى» اتالىمى بويىنشا ارنايى سىيلىق جامبىل جانبولاتقا («Qazaq radiosy») بەرىلدى. بايان سۇلەيمەنقىزى («Egemen Qazaqstan») «ۇزدىك ۇيلەستىرۋشى», ەسەنعازى يمانعازى («حابار») «ۇزدىك ويىنشى», دايانا توقتاعۇلوۆا «ۇزدىك قورعاۋشى» (رسك) اتاندى. جەڭىمپازدار مەن جۇلدەگەرلەر كۋبوك, مەدال, ديپلوم, باعالى سىيلىقتارمەن ماراپاتتالدى.
سپارتاكيادا سوڭىندا ءسوز العان استانا قالاسى دەنە شىنىقتىرۋ جانە سپورت باسقارماسى باسشىسىنىڭ ورىنباسارى ازامات اعزاموۆ, ەلوردا كوممۋنيكاتسيالار قىزمەتىنىڭ باسشىسى ابزال دوسىمان, قالالىق سپورتتىق-بۇقارالىق ءىس-شارالاردى وتكىزۋ ديرەكتسياسىنىڭ باسشىسى ازامات بەلگىباەۆ يگى ءىس-شارا جىل سايىن جالعاسىن تاباتىنىن ايتىپ, سالاماتتى ءومىر سالتىن ۇستانۋعا مۇنداي سايىستاردىڭ تيگىزەر سەپتىگى مول ەكەنىن جەتكىزدى.
