سۋرەتتى تۇسىرگەن – ەرلان ومار, «EQ»
جىلدار وتكەن سايىن دەڭگەيى مەن اۋقىمى ارتىپ كەلە جاتقان, بيىل 14-مارتە وتكىزىلىپ وتىرعان تۋرنيردە ەلگە ەسىمى ەلەۋلى ەل اعالارى – كورنەكتى جازۋشىلار تولەن ابدىك پەن قويشىعارا سالعارا ۇلى, وقۋ-اعارتۋ ءمينيسترى عاني بەيسەمباەۆ پەن سەناتور نۇرتورە ءجۇسىپ تۇعىرلى تۇلعا تۋرالى ەستەلىكتەرىمەن ءبولىستى.
ءىس-شارانىڭ اشىلۋ سالتاناتىندا وقۋ-اعارتۋ ءمينيسترى عاني بەيسەمباەۆ مينيسترلىك ەۋرازيا ۇلتتىق ۋنيۆەرسيتەتىمەن بىرلەسە اقاڭنىڭ ارتىندا قالدىرعان مۇرالارىن زەرتتەپ-زەردەلەۋگە بايلانىستى جۇمىستى باستاعانىن, اقاڭنىڭ اندەرى مەن شىعارمالارى, جۋرناليستيكاداعى ەڭبەكتەرىنە عىلىمي زەرتتەۋ جۇمىستارىن جۇرگىزىپ, رەسپۋبليكالىق بايقاۋ وتكىزۋدى جوسپارلاپ وتىرعاندارىن سۇيىنشىلەدى.
ال پارلامەنت سەناتىنىڭ دەپۋتاتى نۇرتورە ءجۇسىپ: «عالىمنىڭ حاتى ولمەيدى, جاقسىنىڭ اتى ولمەيدى» دەگەن قازاقتا ماقال بار. بۇگىنگى دودا سونى ايعاقتايدى. بۇل ءتۋرنيردى جۋرناليستەر باس قوسىپ قانا قويماي, ەلدىڭ ەرتەڭىنە قاتىستى وي-پىكىر الماسىپ, سالاعا قاتىستى ماسەلەلەردى تالقىلاپ, ويناي ءجۇرىپ ويلاساتىن جيىن دەپ ايتۋعا بولادى», دەدى ءوز سوزىندە.
ەۇۋ جانىنداعى جۋرناليستيكا ماسەلەلەرىن زەرتتەۋ ينستيتۋتىنىڭ ديرەكتورى قايرات ساق كەزەكتى تاستاياقشىلار سايىسىنىڭ شارتتارىمەن تانىستىردى.
«بيىلعى ەرەكشەلىك جاستار مەن اقساقالدارىمىز ءبولىپ-جارماي ءبىر ۇستەلدىڭ باسىندا اڭگىمەلەرىن ايتا ءجۇرىپ ويناسىن دەپ, جارىستى بىرگە وتكىزىپ وتىرمىز. تەك اقساقالدارىمىزدا رەنىش بولماۋى ءۇشىن ول كىسىلەرگە جەڭىلدىك جاسادىق. 40 جاسقا دەيىنگىلەر 40–60 جاستاعىلارعا ءبىر شار, ال 60 جاستان اسقاندارعا 2 شار جەڭىلدىك بەرەدى دەپ شەشتىك», دەدى جيىن باسىندا.
وسىلاي جۋرناليستيكانىڭ جولباسشىلارى مەن قالامگەرلەر, مەديامەنەدجەرلەر مەن جاس جۋرناليستەر جارىس كورىگىن قىزدىردى.
ءتۋرنيردى ۇيىمداستىرۋشىلار بەلگىلى قالامگەرلەر اتىنداعى جۇلدەلەر دە تاعايىندادى. ورالحان بوكەي اتىنداعى جۇلدە – سادىبەك تۇگەلگە; كارىباي احمەتبەكوۆ اتىنداعى جۇلدە – كارىمبەك قۇرماناليەۆكە; اقسەلەۋ سەيدىمبەك اتىنداعى جۇلدە – نۇرتورە جۇسىپكە; سەرىك ءابدىرايىم ۇلى اتىنداعى جۇلدە – دارحان مىڭبايعا; قۋانىشباي قۇرمانعاليەۆ اتىنداعى جۇلدە قويشىباي ەسەنتاەۆقا بەرىلدى. ودان بولەك «ەڭ سىيلى بيلياردشى» جۇلدەسىن – قويشىعارا سالعارا ۇلى, «ەڭ مادەنيەتتى بيلياردشى» جۇلدەسىن – تولەن ابدىك, «ەڭ شەبەر بيلياردشى» جۇلدەسىن – التىنبەك نۇح ۇلى, «ەڭ مەرگەن بيلياردشى» جۇلدەسىن – ءالىمجان سابىرجان ۇلى, «ەڭ شاپشاڭ بيلياردشى» جۇلدەسىن – شارحان قازىعۇل, «تەحنيكاسى مىقتى تاستاياقشى» جۇلدەسىن – مارات ماناسباەۆ, «ەشكىمنىڭ كوڭىلىن جىقپاعان بيلياردشى» جۇلدەسىن قايرات مۇساقۇلوۆ الدى.
تۋرنير قورىتىندىسىندا بەلگىلى ايتىسكەر اقىن, الجير مۇراجايىنىڭ ديرەكتورى داۋلەتكەرەي كاپ ۇلى ءى ورىندى, جۋرناليست, باتىس قازاقستان وبلىسى اكىمدىگىنىڭ اپپارات باسشىسى ءنۇردىلدا وراز ءىى ورىندى, ال اقىن ۇلاربەك نۇرعالىم ۇلى ءىىى ورىندى يەلەندى.
جالپى, تاستاياقشىلار دوداسىنا قاتىسۋشىلار تاعىلىمعا تولى ءتۋرنيردى جوعارى دەڭگەيدە ۇيىمداستىرعان ەۋرازيا ۇلتتىق ۋنيۆەرسيتەتى ۇجىمىنا العىستارىن ايتىپ تارقاستى.
