فوتو: اشىق دەرەككوز
ەستەرىڭىزگە سالا كەتەيىك, 2002 جىلدىڭ جەلتوقسانىندا بۇۇ باس اسسامبلەياسىنىڭ 57-ءشى سەسسياسىندا 23 ماۋسىمدى مەملەكەتتىك قىزمەت كۇنى دەپ جاريالاۋ تۋرالى قاۋلى قابىلداندى. ۇيىمعا مۇشە مەملەكەتتەردى بۇل كۇندى ءار ەلدە بەلگىلەۋگە شاقىرعان. 2003 جىلى بۇۇ باس اسسامبلەياسىنىڭ شەشىمىمەن بۇل كۇن حالىقارالىق مەرەكە مارتەبەسىنە يە بولدى.
قازاقستاندا مەملەكەتتىك قىزمەت سالاسى – قوعامدىق ءتارتىپتى, باسقارۋ جۇيەسىن جانە ازاماتتارعا قىزمەت كورسەتۋدى قامتاماسىز ەتەتىن ماڭىزدى قۇرىلىم. سوڭعى جىلدارى مەملەكەتتىك قىزمەت جۇيەسى بىرقاتار قۇرىلىمدىق وزگەرىستەرگە ۇشىرادى. پرەزيدەنت اكىمشىلىگى مەن مەملەكەتتىك قىزمەت ىستەرى اگەنتتىگى كادرلىق تۇراقتىلىق, اشىقتىق جانە مەريتوكراتيا قاعيداتتارىن كۇشەيتۋ باعىتىندا جۇمىستار جۇرگىزىپ كەلەدى. مەملەكەتتىك قىزمەتكە كىرۋ راسىمدەرى جەڭىلدەپ, كونكۋرستىق جۇيە ارقىلى ماماندار ىرىكتەلە باستادى.
وسى باعىتتاعى ماڭىزدى باستامالاردىڭ ءبىرى – پرەزيدەنتتىك جاستار كادر رەزەرۆى. 2019 جىلدان بەرى ىسكە اسىپ كەلە جاتقان بۇل جوباعا 50 مىڭنان استام جاس مامان ءوتىنىش بىلدىرسە, سولاردىڭ ىشىنەن جۇزدەگەن ۇمىتكەر ىرىكتەلىپ, مەملەكەتتىك باسقارۋ جۇيەسىنە تارتىلعان.
