فوتو: ۇكىمەتتىڭ ءباسپاسوز قىزمەتى
ولجاس بەكتەنوۆ ەقدب-نىڭ قازاقستان ەكونوميكاسىن دامىتۋعا قوسىپ جاتقان ۇلەسىنە جوعارى باعا بەرىپ, 2023 جىلى ەكىجاقتى ىنتىماقتاستىق اياسىندا جالپى قۇنى $935 ملن بولاتىن 25 جوبا جۇزەگە اسىرىلعانىن اتاپ ءوتتى.
«قازاقستان پرەزيدەنتى قاسىم-جومارت توقاەۆ ۇلتتىق ەكونوميكانى دامىتۋعا جانە ينفراقۇرىلىمدى جاڭعىرتۋعا بەلسەندى قاتىساتىن ەۋروپالىق قايتا قۇرۋ جانە دامۋ بانكىنىڭ رولىنە ەرەكشە نازار اۋدارۋدا. ءبىز سىزدەرمەن كوپتەگەن باعىت بويىنشا تىعىز ىنتىماقتاستىقتامىز جانە ءوزارا ءىس-قيمىلدىڭ ستراتەگيالىق سيپاتىن جوعارى باعالايمىز. ءبىزدىڭ نازارىمىز ساپالى ءوسۋدى ارتتىرۋ جانە حالىقتىڭ ءال-اۋقاتىن جاقسارتۋ ءۇشىن ەكونوميكالىق دامۋدى ترانسفورماتسيالاۋعا باعىتتالعان. وتكەن جىلدىڭ وزىندە ءبىز سىزدەرمەن كەلەشەگى زور سالالاردا رەكوردتىق سوماسى $935 ملن بولاتىن 25 جاڭا جوباعا قول قويدىق. قازاقستان ۇكىمەتى ەۋروپالىق قايتا قۇرۋ جانە دامۋ بانكىمەن ءوزارا مۇددەلى ماسەلەلەردىڭ كەڭ اۋقىمى بويىنشا ارىپتەستىكتى تەرەڭدەتۋگە دايىن ەكەنىن بىلدىرەدى», دەدى ولجاس بەكتەنوۆ.
ايتا كەتەيىك, وتكەن جىلى ەقدب قازاقستان ەكونوميكاسىنا جىلدىق ينۆەستيتسيا كولەمىن 3 ەسەدەن استامعا ۇلعايتقان. سونىمەن قاتار تاراپتار 25 جوباعا, ونىڭ ىشىندە اقتوبەدە جاڭا تازارتۋ قۇرىلىستارى مەن ىلەسپە ينفراقۇرىلىم سالۋ, كوكشەتاۋدا 630 توسەك-ورىندىق كوپسالالى اۋرۋحانا سالۋ جونىندەگى العاشقى ءىرى ءمجا جوباسى جانە باسقا جوبالارعا قول قويعان.
«وتاندىق قارجى ينستيتۋتتارى ارقىلى نەسيە جەلىلەرىنە كەڭەس بەرۋ جانە ۇسىنۋ ارقىلى شاعىن جانە ورتا بيزنەستى قولداۋعا باسا نازار اۋدارىلدى. جالپى العاندا, اعىمداعى پورتفەلدە قۇنى $3,2 ملرد-تان اساتىن 129 بەلسەندى جوبا بار, ونىڭ 75%-ى ورنىقتى ينفراقۇرىلىم سەكتورىنا تيەسىلى. بىرلەسكەن جۇمىس كەزەڭىندە پۋل $11,6 ملرد سوماسىنا 340 جوبانى قۇرادى», دەلىنگەن حابارلامادا.
سونىمەن قاتار كەزدەسۋدە ەلەكترمەن جابدىقتاۋ سەنىمدىلىگىن ارتتىرۋ جانە ەلوردانىڭ ەلەكتر ەنەرگياسىنا ءوسىپ كەلە جاتقان سۇرانىسىن قامتاماسىز ەتۋ ءۇشىن استانا قالاسىندا قوسالقى ستانسا سالۋ جوباسى قارالدى. سونداي-اق, ءادىل ەنەرگەتيكالىق اۋىسۋ (Just Energy Transition Partnership) بويىنشا قازاقستاندا ەلدىك پلاتفورماسىن بىرلەسىپ ازىرلەۋگە نازار اۋدارىلدى. JETP پلاتفورماسى ەنەرگەتيكا سالاسىنا «جاسىل» ينۆەستيتسيالاردى تارتۋدىڭ ماڭىزدى قۇرالى بولادى.
ەقدب پرەزيدەنتى وديل رەنو-باسسو وتكەن جىلى ينۆەستيتسيا كولەمىنىڭ رەكوردتىق وسكەنىن اتاپ ءوتىپ, قازاقستانمەن ىنتىماقتاستىقتى ودان ءارى تەرەڭدەتۋگە جانە ورنىقتى ەكونوميكا سالاسىنداعى جوبالاردى بىرلەسىپ جۇزەگە اسىرۋعا مۇددەلى ەكەنىن اتاپ ءوتتى. ەقدب 2029 جىلعا دەيىنگى ۇلتتىق ينفراقۇرىلىم جوسپارى شەڭبەرىندە جوبالاردى جۇزەگە اسىرۋعا قولداۋ كورسەتەدى.
سونداي-اق «قازاۆتوجول» ۇك» اق مەن ەقدب اراسىندا ۇزىندىعى 136 كم «اقتوبە – ۇلعايسىن» جولىن رەكونسترۋكتسيالاۋ بويىنشا قارجىلاندىرۋ كەلىسىمىنە قول قويىلدى. بۇل جول بولىگى الداعى ۋاقىتتا 4 جولاقتى قوزعالىسى بار 1-ساناتتى تراسساعا اينالادى, جالپى ۇزىندىعى – 234 كم. جوبا ترانزيتتىك الەۋەتتى ارتتىرۋ مەن كولىك لوگيستيكاسىن دامىتۋعا باعىتتالعان.
