2025 جىلعى 21 ماۋسىم كۇنى كەشكى ساعات 18:15 شاماسىندا بالا سەمەي قالاسىنداعى تۋريستيچەسكايا كوشەسى, 92-ۇيدەن شىعىپ كەتىپ, قايتا ورالماعان. حابار-وشارسىز كەتكەنى جونىندە «102» جەدەل ارناسىنا تۇسكەن اقپاراتتان كەيىن بىردەن شۇعىل ىزدەستىرۋ جۇمىستارى باستالدى.
بالادا دامۋ ەرەكشەلىگى (اۋتيزم) بار ەكەنى ەسكەرىلىپ, ىزدەستىرۋ جۇمىستارىنا ەرەكشە نازار اۋدارىلدى. اباي وبلىسىنىڭ پوليتسيا دەپارتامەنتى, توتەنشە جاعدايلار دەپارتامەنتى, كينولوگيالىق قىزمەت ماماندارى, ۇلتتىق ۇلاننىڭ اسكەري قىزمەتشىلەرى جانە ارنايى ماقساتتاعى جاساق (جقاج) وكىلدەرى جۇمىلدىرىلدى. سونىمەن قاتار, جىلۋ بەينەلەۋ قۇرىلعىسىمەن جابدىقتالعان درون قولدانىلدى.
22 ماۋسىم كۇنى تاڭعى ساعاتتاردا ىزدەۋ جۇمىستارىنا 1000-نان استام ادام تارتىلدى. ولاردىڭ قاتارىندا ەرىكتىلەر, قوعامدىق بىرلەستىكتەر مەن قالا تۇرعىندارى بولدى. اشىق اۋماقتار تىزبەكتەلە ارالاپ, ورمان القاپتارى, دالا, اۋلا مەن كوشەلەر مۇقيات تەكسەرىلدى.
تۇنگى ۋاقىتتا تۇرعىندار بالانىڭ جىلاعان داۋسىن ەستىگەنى جونىندە ەكى رەت حابارلاعان. الايدا جۇرگىزىلگەن شۇعىل تەكسەرۋ بارىسىندا بۇل اقپارات راستالمادى. دەگەنمەن ىزدەستىرۋ توبى جۇمىستى ءبىر ساتكە دە توقتاتپادى.
كوپ ۇزاماي زاتون پوليتسيا ءبولىمىنىڭ ۋچاسكەلىك ينسپەكتورلارى بەكەن اسىل مەن دارحان جۇماعاليەۆ جەتكىنشەكتى قالا شەتىندەگى ورماننان تاپتى. بالا ۇيىنەن شامامەن 10 شاقىرىم قاشىققا ۇزاپ كەتكەن. پوليتسيا قىزمەتكەرلەرىنىڭ كاسىبي بىلىكتىلىگى مەن تاباندىلىعىنىڭ ارقاسىندا ءبۇلدىرشىن امان-ەسەن وتباسىنا قايتارىلدى.
اناسى مەن بالاسىنىڭ قاۋىشقان ءساتى — كوپشىلىكتىڭ جۇرەگىن ەلجىرەتتى. بۇل جاعداي بارلىق جۇمىلدىرىلعان كۇشتىڭ, ەرىكتىلەردىڭ جانە بەي-جاي قاراماعان تۇرعىنداردىڭ بىرلەسكەن ارەكەتىنىڭ جارقىن مىسالىنا اينالدى.
اباي وبلىسىنىڭ پوليتسيا دەپارتامەنتى ىزدەۋگە اتسالىسقان بارلىق ازاماتتارعا شىنايى العىس ءبىلدىرىپ, كەز كەلگەن توتەنشە جاعدايدا جەدەل ارەكەت ەتۋ ماڭىزىن تاعى ءبىر ەسكە سالدى.
