ەلورداداعى ەۋرازيا ۇلتتىق ۋنيۆەرسيتەتى – ەلىمىزدەگى ماڭدايالدى وقۋ ورىندارىنىڭ ءبىرى. بۇعان دەيىن دە ءبىراز جەتىستىككە قول جەتكىزگەن ول وسىمەن ەكىنشى جىل قاتارىنان حالىقارالىق باسەكەلەستىك ورتادا ءوسۋ قارقىنىن كورسەتىپ وتىر.
سونداي-اق اتالعان وقۋ ورنى «جۇمىس بەرۋشىلەر اراسىنداعى بەدەل» جانە «پوق-ستۋدەنتتەر اراقاتىناسى» كورسەتكىشتەرى بويىنشا ۇزدىك جۇزدىككە ەندى. بۇل ۋنيۆەرسيتەتتىڭ شەتەلدىك وقىتۋشىلار مەن ستۋدەنتتەرگە تارتىمدىلىعىن ودان ءارى ارتتىرا ءتۇستى.
QS اعا ۆيتسە-پرەزيدەنتى بەن ساۋتەردىڭ ايتۋىنشا, الەمدەگى جەتەكشى جوعارى وقۋ ورىندارىمەن الشاقتىقتى جويۋ ءۇشىن قازاقستاندىق ۋنيۆەرسيتەتتەر قازىرگى زامانعى عىلىمي كۇن تارتىبىنە ىقپالىن ارتتىرۋعا, حالىقارالىق زەرتتەۋ جوبالارىنا قاتىسۋعا جانە اكادەميالىق ورتاداعى بەدەلىن ودان ءارى نىعايتۋعا كۇش سالۋى قاجەت.
QS رەيتينگى ۋنيۆەرسيتەتتەردى 9 ولشەمى بويىنشا باعالايدى. ءبىرىنشىسى, «اكادەميالىق بەدەل», ەكىنشىسى, ء«بىر وقىتۋشىعا شاققانداعى دايەكسوز سانى», ءۇشىنشىسى, «جۇمىس بەرۋشىلەر اراسىنداعى بەدەل», ءتورتىنشىسى, «جۇمىسقا قابىلەتتىلىك», بەسىنشىسى, «وقىتۋشىلار مەن ستۋدەنتتەردىڭ اراقاتىناسى», التىنشىسى, «حالىقارالىق پروفەسسور-وقىتۋشىلار قۇرامىنىڭ ۇلەسى», جەتىنشىسى, «حالىقارالىق عىلىمي ىنتىماقتاستىق», سەگىزىنشىسى, «حالىقارالىق ستۋدەنتتەردىڭ ۇلەسى» جانە توعىزىنشىسى «تۇراقتىلىق».
بيىل QS رەيتينگىنە 106 مەملەكەتتەن 1501 جوعارى وقۋ ورنى, ونىڭ ىشىندە ءبىزدىڭ ەلىمىزدەن 20 ۋنيۆەرسيتەت كىرەدى.
