ءىس-شاراعا توتەنشە جاعدايلار ءمينيسترى گەنەرال-مايور شىڭعىس ءارىنوۆ, اقمولا وبلىسى اكىمىنىڭ ورىنباسارى دوسۇلان ايتباەۆ, ازاماتتىق قورعاۋ ورگاندارىنىڭ ارداگەرلەرى, قۇقىق قورعاۋ, مەملەكەتتىك ورگانداردىڭ وكىلدەرى جانە قۇرمەتتى قوناقتار قاتىستى.
گەنەرال-مايور شىڭعىس ءارىنوۆ تۇلەكتەرگە ارناعان ۇندەۋىندە ازاماتتىق قورعاۋ اكادەمياسى ارقاشان مينيسترلىك باسشىلىعىنىڭ جانە ۆەدومستۆو باسشىسىنىڭ نازارىندا ەكەنىن اتاپ ءوتتى. ول بىلىكتى كادرلاردى دايارلاۋ, كۋرسانتتار قۇرامىنا قامقورلىق جاساۋ, ماتەريالدىق بازانى جاقسارتۋ جانە ءبىلىم بەرۋ ساپاسىن تۇراقتى جەتىلدىرۋ ۆەدومستۆونىڭ باستى باسىم مىندەتتەرىنىڭ ءبىرى ەكەنىن اتاپ ءوتتى.
«اكادەميا كۋرسانتتارى - ازاماتتىق قورعاۋ جۇيەسىنىڭ بولاشاعى. ەرتەڭگى كۇنى بولىمشەلەردى باسقاراتىن, ماڭىزدى شەشىمدەر قابىلدايتىن جانە ادامداردىڭ قاۋىپسىزدىگى ءۇشىن جاۋاپ بەرەتىن وفيتسەرلەر سىزدەر بولاسىزدار. سىزدەردەن وتانعا قىزمەت ەتۋگە دەگەن ادالدىقتى, رۋح كۇشىن جانە شىنايى ۇمتىلىستى كورەمىز. مەملەكەت پەن مينيسترلىك اكادەميانىڭ دامۋىنا ۇلكەن ءمان بەرەدى. مەملەكەت باسشىسىنىڭ قولداۋىمەن كوكشەتاۋدا جاڭا زاماناۋي وقۋ كەشەنىن سالۋ, وقۋ بازاسىن جاڭعىرتۋ, كۋرسانتتار مەن وقىتۋشىلاردىڭ وقۋى مەن ومىرىنە جاقسى جاعداي جاساۋ جوسپارلانۋدا. بۇل جاي عانا ينفراقۇرىلىمدىق وزگەرىستەر ەمەس, بۇل قۇتقارۋشىلاردىڭ كاسىبي جانە مىقتى بۋىنىن قالىپتاستىرۋعا قوسقان ۇلەس», - دەپ مينيستر شىڭعىس ءارىنوۆ اتاپ ءوتتى.
ءوز كەزەگىندە اكىمنىڭ ورىنباسارى دوسۇلان ايتباەۆ ءوڭىردىڭ بۇكىل رەسپۋبليكا كولەمىندە كاسىبي كادرلاردى قالىپتاستىرۋعا قوسقان ۇلەسىن ماقتان تۇتاتىنىن اتاپ ءوتتى. اكادەميا قازاقستاننىڭ بۇكىل ازاماتتىق قورعاۋ جۇيەسى ءۇشىن كادرلار دايارلايتىن وقۋ ورنى.
اكادەمياداعى شىعارىلىم سالتاناتىنىڭ داستۇرىنە ساي اسكەري تۋمەن قوشتاسۋ ءراسىمى ءوتتى. بيىل بۇل قۇرمەت وقۋ جىلدارىندا ءوزىن بەلسەندى كورسەتكەن ۇلگىلى كۋرسانت لەيتەنانت شەرحان يشانبەكوۆكە بەرىلدى.
سونىمەن قاتار ءىس-شارا اياسىندا قازاق كسر ءورت ءسوندىرۋ ءبولىمىنىڭ ەڭبەك سىڭىرگەن قىزمەتكەرى, تجم ارداگەرى پولكوۆنيك نۇرپەيىس اقپاروۆتىڭ اتاۋلى شاكىرتاقىسى تابىستالدى. شاكىرتاقىنى ونىڭ وتباسى تاعايىندايدى, ول جىل سايىن اكادەميانىڭ ۇزدىك تۇلەگىنە بەرىلەدى. 2025 جىلى لەيتەنانت ارسەن ءالىمجومارتوۆ شاكىرتاقى يەگەرى اتاندى. ناگرادانى پولكوۆنيكتىڭ قىزى رازيا اكپاروۆا تابىس ەتتى.
سالتاناتتى ءىس-شارا سوڭىندا جاس لەيتەنانتتار وفيتسەرلىك ۆالسپەن قوشتاسىپ, وزدەرىنىڭ كاسىبي ومىرىندەگى جاڭا كەزەڭدى سيمۆوليكالىق تۇردە باستاپ, جالپى كۋرسانت قاتارىندا مارشپەن ءجۇرىپ ءوتتى.
مالىك عابدۋللين اتىنداعى اكادەميا ونداعان جىلدار بويى ازاماتتىق قورعاۋ سالاسىندا جوعارى بىلىكتى مامانداردى دايارلاۋدى قامتاماسىز ەتە وتىرىپ, تجم جۇيەسىندەگى جەتەكشى بەيىندى جوعارى وقۋ ورنى بولىپ قالا بەرەدى. ونىڭ بازاسىندا باستاپقى كاسىپتىك دايارلىقتان عانا ەمەس, سونداي-اق جۇمىس ىستەپ جۇرگەن قىزمەتكەرلەر دە بىلىكتىلىگىن ارتتىرادى. قۇرىلعان ساتتەن باستاپ جوعارعى وقۋ ورنى 6000-عا جۋىق مامان دايىندادى, بىلىكتىلىكتى ارتتىرۋ باعدارلامالارى بويىنشا دا سونشا مامان وقىتىلدى. بارلىق تۇلەكتەر مينيسترلىكتىڭ اۋماقتىق بولىمشەلەرىنە جىبەرىلەدى.
قازاقستان تجم ازاماتتىق قورعاۋ اكادەمياسى - بۇل جاي عانا وقۋ ورنى ەمەس, ەلدىڭ ازاماتتىق قاۋىپسىزدىگىنىڭ بۇكىل جۇيەسى ءۇشىن كادرلىق الەۋەتتى قالىپتاستىرۋدىڭ ستراتەگيالىق ورتالىعى.
