ورمۇز بۇعازى – الەمدىك مۇناي ساۋداسىنىڭ باستى وتكەلدەرىنىڭ ءبىرى. قازىر جاھاندىق نارىقتاعى مۇنايدىڭ شامامەن 20%-ى ءدال وسى بۇعاز ارقىلى تاسىمالدانادى. ساۋد ارابياسى, يراك جانە پارسى شىعاناعىنداعى وزگە دە ءىرى مۇناي وندىرۋشىلەردىڭ ەكسپورتى وسى باعىتقا تىكەلەي تاۋەلدى.
Citigroup ەسەبىنشە, ورمۇز بۇعازى جابىلعان جاعدايدا كۇنىنە 3 ميلليون باررەلگە جۋىق مۇناي تاسىمالى توقتاۋى مۇمكىن. مۇنداي كەدەرگى قىسقا مەرزىمنىڭ وزىندە باعانىڭ كۇرت وسۋىنە جانە نارىقتاعى تۇراقسىزدىققا سەبەپ بولادى. دەگەنمەن ساراپشىلار شيەلەنىستىڭ ۇزاققا سوزىلمايتىنىن, ويتكەنى بۇعازدىڭ اشىق كۇيدە بولۋى بارلىق تاراپتاردىڭ ورتاق مۇددەسى ەكەنىن العا تارتىپ وتىر.
Bloomberg دەرەكتەرىنە سۇيەنسەك, يران مۇنايىنىڭ ەكسپورتىنا تىيىم سالىنعان كۇننىڭ وزىندە بۇل فاكتور مۇناي باعاسىنا ايتارلىقتاي اسەر ەتپەۋى مۇمكىن. بۇعان دەيىن دە ساراپشىلار تاياۋ شىعىستاعى گەوساياسي شيەلەنىستەر مۇناي باعاسىن 120 دوللارعا دەيىن كوتەرۋى ىقتيمال ەكەنىن ەسكەرتكەن بولاتىن.
قازىر Brent ماركالى مۇناي فيۋچەرستەرى باررەلىنە 77 دوللار شاماسىندا ساۋدالانىپ جاتىر. 2025 جىلدىڭ 19 ماۋسىمىندا وتكەن ۇكىمەت وتىرىسىندا ۇلتتىق بانك توراعاسى تيمۋر سۇلەيمەنوۆ مۇناي باعاسىنىڭ جوعارى بولۋى قازاقستان ەكونوميكاسى ءۇشىن وڭ اسەر ەتەتىنىن اتاپ ءوتتى.
ساراپشىلاردىڭ ايتۋىنشا, جاھاندىق نارىقتاعى مۇناي باعاسىنىڭ كۇرت ءوسۋى ينفلياتسيالىق قىسىمدى كۇشەيتىپ, كەيبىر ەلدەردىڭ ىشكى ەكونوميكالىق ساياساتىنا تۇزەتۋلەر ەنگىزۋىنە سەبەپ بولۋى مۇمكىن. وسى ورايدا ورمۇز بۇعازى توڭىرەگىندەگى جاعداي الەمدىك ەكونوميكالىق تۇراقتىلىققا تىكەلەي ىقپال ەتەتىنى انىق.
