وسى كەزەڭدە پايدالانۋعا بەرىلگەن تۇرعىن ۇيلەردىڭ جالپى اۋدانى 6 ملن 21,3 مىڭ شارشى مەترگە جەتكەن. بۇل – 2024 جىلدىڭ سايكەس كەزەڭىمەن سالىستىرعاندا 5,7 پايىزعا ارتىق كورسەتكىش. ونىڭ ىشىندە 3 ملن 854,7 مىڭ شارشى مەتر – كوپقاباتتى تۇرعىن ۇيلەر, 2 ملن 126,7 مىڭ شارشى مەتر – جەكە ۇيلەردىڭ ۇلەسىندە.
ايماقتار اراسىنداعى كوشباسشىلار قاتارىندا استانا قالاسى بار – ەلوردادا 1 ملن 505,4 مىڭ شارشى مەتر تۇرعىن ءۇي سالىنىپ, پايدالانۋعا بەرىلگەن. الماتىدا بۇل كورسەتكىش – 1 ملن 138,8 مىڭ شارشى مەتر, ال الماتى وبلىسىندا – 463 مىڭ شارشى مەتردى قۇراپ وتىر.
بيىل قۇرىلىس سالاسىندا جوعارى ءوسىم كورسەتكەن وڭىرلەر دە بەلگىلى بولدى. تۇركىستان وبلىسىندا تۇرعىن ءۇي قۇرىلىسى بىلتىرعى كەزەڭمەن سالىستىرعاندا 25,5 پايىزعا ارتسا, شىمكەنت قالاسىندا – 23,4 پايىزعا, الماتى وبلىسىندا – 20,4 پايىزعا ۇلعايعان.
جالپى ەل كولەمىندە سالىنىپ, ەل يگىلىگىنە بەرىلگەن تۇرعىن ۇيلەردىڭ 94,1 پايىزى نەمەسە 5 ملن 663,3 مىڭ شارشى مەترى – جەكەمەنشىك قۇرىلىس كومپانيالارىنىڭ ۇلەسىندە. ونىڭ ىشىندە حالىق ءوز كۇشىمەن 2 ملن 175,3 مىڭ شارشى مەتر تۇرعىن ءۇي تۇرعىزىپ, باسپانا ماسەلەسىن ءوز بەتىنشە شەشىپ جاتقانىن اڭعارتادى.
سالاداعى وڭ ءۇردىس تەك تۇرعىن ۇيمەن شەكتەلمەيدى. قۇرىلىس جۇمىستارىنىڭ جالپى كولەمى 2025 جىلدىڭ العاشقى بەس ايىندا 2 ترلن 1 ملرد تەڭگەگە جەتىپ, بىلتىرعى كەزەڭمەن سالىستىرعاندا 15,4 پايىزعا وسكەن. بۇل ءوسىم ەلدىڭ 18 وڭىرىندە تىركەلىپ وتىر.
اتالعان مالىمەتتەر تۇرعىن ءۇي مەن قۇرىلىس سالاسىنىڭ ەل ەكونوميكاسىنداعى الەۋەتىنىڭ ارتىپ كەلە جاتقانىن ايعاقتايدى. حالىقتىڭ باسپانامەن قامتىلۋى مەن قۇرىلىس يندۋسترياسىنىڭ سەرپىندى دامۋى – مەملەكەتتىڭ الەۋمەتتىك تۇراقتىلىعى مەن ەكونوميكالىق ىلگەرىلەۋىنىڭ ماڭىزدى كورسەتكىشى.
