IQanat – تەك وليمپيادا ەمەس, بۇل – مۇمكىندىكتەر پلاتفورماسى. الماتىدا وتكەن بيىلعى فينال دا سونىڭ جارقىن دالەلى بولدى. 50 مىڭنان استام جەتكىنشەك قاتىسقان العاشقى ىرىكتەۋدەن سۇرىنبەي ءوتىپ, سوڭعى كەزەڭگە جەتكەن مىڭ بالا مەدەۋدىڭ باۋرايىندا باس قوستى. بۇل – ءجاي كەزدەسۋ ەمەس, ءوز ارمانىنا قادام باسقان جاستاردىڭ ومىرىندەگى ەڭ ماڭىزدى بەلەستەردىڭ ءبىرى.
IQanat قورى ۇيىمداستىرعان اپتالىق فينال اياسىندا وقۋشىلار ءتۇرلى تەستىلەۋدەن ءوتىپ, ينتەنسيۆتى اپگرەيد باعدارلاماسىنا قاتىستى. مۇندا بالالارعا ارنايى ءبىلىم ترەنينگتەرى مەن عىلىمي پراكتيكالار ۇيىمداستىرىلدى. سونىمەن قاتار, Peer-to-Peer فورماتى بويىنشا 270 ساعاتقا جۋىق ماتەماتيكا جانە اعىلشىن ءتىلى ساباقتارى وتكىزىلدى. بۇل – IQanat مەكتەبىنىڭ جوعارى سىنىپ وقۋشىلارى مەن تۇلەكتەرى وزدەرىنەن كەيىنگى بۋىنعا جول كورسەتىپ, جاقسىلىقتى ءبولىسۋ يدەياسىن جۇزەگە اسىرىپ جاتقان بىرەگەي فورمات. ياعني, ءتالىم الىپ قانا قويماي, تالىمگەردەن ۇلگى الۋ – بۇل جوباعا ءتان باستى ەرەكشەلىك.
اۋىل بالاسىنا ارنالعان زياتكەرلىك كوپىر
فيناليستەرگە ارنالعان قۋانىشتى جاڭالىقتاردىڭ ءبىرى – بيىل گرانت سانىنىڭ ارتۋى. ەگەر بۇرىن IQanat مەكتەبىنە 100 بالا قابىلدانسا, ەندى بۇل سان 125-كە جەتتى. سول سەكىلدى IQ Advance باعدارلاماسىنا قاتىساتىن بالالار دا 125-كە كوبەيىپ وتىر. بۇدان بولەك, قالعان 750 فيناليست تە نازاردان تىس قالمايدى. ولار IQ-IP اتتى ءۇش جىلدىق باعدارلاما اياسىندا ۇبت مەن حالىقارالىق ەمتيحاندارعا دايىندىق كۋرستارىنا قاتىسىپ, اعىلشىن ءتىلىن تەرەڭدەتىپ وقۋعا مۇمكىندىك الادى. سونىمەن قاتار, ولار كاسىپ پەن ۋنيۆەرسيتەت تاڭداۋ بارىسىندا كاسىبي باعىت-باعدار الادى.
«IQanat تاجىريبەسى اۋىلداعى بالالاردىڭ دا دارىندى, زەرەك ءارى ماقساتكەر ەكەنىن انىق كورسەتتى. ءبىزدىڭ مىندەت – سول دارىننىڭ جولىن اشۋ. سوندىقتان دا بيىلعى جىلى گرانتتار سانىن ەداۋىر ارتتىرۋعا شەشىم قابىلدادىق», دەدى IQanat قامقورشىلار كەڭەسىنىڭ مۇشەسى, ISS Corporation LLP ديرەكتورلار كەڭەسىنىڭ توراعاسى ەرلان يسەكەشەۆ.
كاسىپكەرلەر كوتەرگەن اۋىر جۇك
IQanat – بۇل 230-عا جۋىق وتاندىق كاسىپكەردىڭ ورتاق ءىسى. بىلىمگە, بولاشاققا سالىنعان ينۆەستيتسيا دەۋگە بولادى. قامقورشىلار قاتارىندا اسقار الشىنباەۆ, تيمۋر تۋرلوۆ, سەرىك ءتولباسى, ەركىن دلىمبەتوۆ, سەرگەي كان, ورازحان قارسىبەكوۆ, اندرەي لاۆرەنتەۆ, ايدىن راحيمباەۆ, دۋلات تاستەكەي سىندى ازاماتتار بار. ولار IQanat جوباسى ارقىلى اۋىل بالاسىنا تەڭ مۇمكىندىك سىيلاپ وتىر.
فينال قورىتىندىسىندا تاعى ءبىر قۋانىشتى شەشىم جاريا ەتىلدى: IQanat مەكتەبىنە وقۋعا تەك بىرنەشە بالل جەتپەي قالعان 20 وقۋشىعا 20 كاسىپكەر ءوز اتىنان جەكە گرانت ءبولدى. وسىلايشا, جالپى گرانت سانى 270-كە جەتىپ وتىر.
«مۇندا ءاربىر تالانتقا ءبىلىم, باعىت جانە بيىك ماقساتتارعا جول اشىلادى. بۇگىن بىلىمگە ۇمتىلعان بالا ەرتەڭ ەل دامۋىنا قىزمەت ەتەتىن عالىم, ينجەنەر, كوشباسشى بولادى», دەدى سولتۇستىك قازاقستان وبلىسى بويىنشا قامقورشى, كاسىپكەر سەرگەي كان.
IQanat-تىڭ جۇيەلى ەڭبەگى بۇگىن ناقتى ناتيجە بەرىپ جاتىر. جوبا تۇلەكتەرىنىڭ 94 پايىزى وتاندىق جانە شەتەلدىك ۇزدىك ۋنيۆەرسيتەتتەرگە گرانتپەن ءتۇسىپ, بۇگىندە 17 ەلدە ءبىلىم الىپ ءجۇر. ولار تەك بىلىكتى مامان عانا ەمەس, قوعامعا پايدالى, جاۋاپتى تۇلعا رەتىندە قالىپتاسىپ جاتىر.
فينالعا قاراعاندى وبلىسى, نۇرا اۋىلىنان كەلگەن داۋلەت ءامىرحان ەسىمدى وقۋشى بيىل گرانت يەگەرى اتاندى.
«مەن گرانت العانىمدى بىلگەندە كوزىمە جاس كەلدى. بىردەن انامدى ويلادىم – ول مەن ءۇشىن كوپ نارسەدەن باس تارتىپ ءجۇر. ء«بىلىم سەنى شىڭعا شىعارادى» دەيتىن ءسوزى جادىمدا جاڭعىرىپ تۇر. سەنىم ۇدەسىنەن شىعۋ ءۇشىن بار كۇشىمدى سالدىم», دەيدى داۋلەت.
