جەر قويناۋى جاڭا ەرەجەمەن يگەرىلەدى

سوڭعى جىلدارى مەملەكەت گەولوگيالىق بارلاۋ سالاسىن دامىتۋدا باتىل قادامدار جاساپ, وتاندىق رەسۋرستىق الەۋەتتى ارتتىرۋ ءۇشىن ينۆەستيتسيالىق تارتىمدىلىقتى كۇشەيتىپ كەلەدى. بۇل رەتتە قابىلدانىپ جاتقان بىرقاتار ستراتەگيالىق باستامالار ەلىمىزدىڭ جەر قويناۋىن پايدالانۋداعى جاڭا پاراديگماسىن ايقىندايدى.

اۋستراليا ۇلگىسى – اشىق ءارى باسەكەلى ورتاعا جول

قازاقستان باتىس-اۋستراليالىق تاجىريبەنى نەگىزگە الا وتىرىپ, «كىم ءبىرىنشى كەلسە – سوعان ارتىقشىلىق» قاعيداتىن ەنگىزدى. بۇل – گەولوگيالىق بارلاۋعا جەكە كاپيتالدىڭ كەلۋىنە جول اشقان, باسەكەلەستىك پەن اشىقتىققا نەگىزدەلگەن مودەل. جاڭا ءتاسىل – ينۆەستورلارعا مۇمكىندىك, مەملەكەتكە رەسۋرستىق تولىقتىرۋ.

اۋقىمدى بارلاۋ – الەۋەتتى كەڭىستىكتى يگەرۋ

مەملەكەتتىڭ جوسپارى بويىنشا 2026 جىلعا قاراي گەولوگيالىق بارلاۋ جۇمىستارى جۇرگىزىلەتىن اۋماق 1,9 ملن-نان 2,2 ملن شارشى شاقىرىمعا دەيىن ۇلعايماق. بۇل تەك كەڭىستىك ەمەس – بۇل ەلىمىزدىڭ يگەرىلمەگەن تابيعي بايلىعى, بولاشاق يندۋستريالىق جوبالاردىڭ ىرگەتاسى.

تسيفرلاندىرۋ مەن حالىقارالىق ستاندارت – سەنىم كەپىلى

ينۆەستوردىڭ قىزىعۋشىلىعى ەڭ الدىمەن دەرەككە سۇيەنەدى. وسىعان بايلانىستى قازاقستان CRIRSCO حالىقارالىق ستاندارتىن ەنگىزىپ, گەولوگيالىق دەرەكتەردى تسيفرلاندىرۋدى قولعا الدى. بۇل – ءاربىر ينۆەستور ءۇشىن بىردەي مۇمكىندىك, ءاربىر ۋچاسكە ءۇشىن اشىقتىق پەن قولجەتىمدىلىك دەگەن ءسوز. گەودەرەكتەردىڭ اشىقتىعى – كاپيتالدىڭ سەنىمىن ارتتىرۋدىڭ نەگىزگى تەتىگى.

سالىقتىق ىنتالاندىرۋ – كۇردەلى كەن ورىندارىنا دەمەۋ

قابىلدانعان جاڭا شارالار اياسىندا تابىستىلىقتىڭ ىشكى نورماسى (IRR) 15 پايىزدان تومەن جوبالار ءۇشىن پايدالى قازبالار وندىرۋگە سالىناتىن سالىقتان (ندپي) بەس جىلعا دەيىن بوساتۋ قاراستىرىلىپ وتىر. بۇل – گەولوگيالىق جاعىنان كۇردەلى, بىراق ستراتەگيالىق ماڭىزى زور كەن ورىندارىن يگەرۋگە سەرپىن بەرەتىن ماڭىزدى شەشىم.

تەحنوگەندىك رەسۋرستار – ەكىنشى تىنىس

ەلىمىزدە 55 ملرد توننادان استام تەحنوگەندىك مينەرالدىق تۇزىلىمدەردىڭ (تمت) پاسپورتى جاسالىپ جاتىر. بۇل – تەك وندىرىستىك قالدىق ەمەس, قايتا وڭدەۋگە بولاتىن قۋاتتى شيكىزات كوزى. جاڭا تەحنولوگيالار مەن ەكولوگيالىق تازا ءوندىرىس تاسىلدەرى ارقىلى بۇل قالدىقتار قايتا پايدالى ونىمگە اينالىپ, ۇلتتىق بايلىققا قىزمەت ەتە الادى.