جۇمىس بەرۋشىلەر قاتارىندا كولىك-لوگيستيكا كومپانيالارى, بالالاردى دامىتۋ جانە ءبىلىم بەرۋ ورتالىقتارى, سپورتتىق سەكتسيالار, تىگىن شەبەرحاناسى, مەديتسينالىق مەكەمەلەر, قۇرىلىس ماتەريالدارى مەن مەتالل قۇراستىرمالارىن وندىرۋشىلەر, ازىق-ت ۇلىك دۇكەندەرى, فيتنەس ورتالىقتارى بار. جارمەڭكە بارىسىندا ەلەكتريك, اۋىر جۇك كولىكتەرىنىڭ جۇرگىزۋشىسى, جۇك تيەگىشتەر مەن بۋلدوزەر وپەراتورلارى, اسپاز, مەحانيزاتورلار ەڭ كوپ سۇرانىسقا يە ماماندىقتار ەكەندىگى بەلگىلى بولدى. ماسەلەن «سل-لوگيستيكا» كومپانياسىنا «ە», «د» ساناتىنداعى جۇرگىزۋشىلەر 15 كۇندىك ۆاحتالىق جۇمىسقا 700 مىڭ تەڭگە جالاقى الادى. سونداي-اق «قازتەرموگرۋپپ» كومپانياسى دا ەلەكتريك-سلەسار ماماندارىنا جوعارى جالاقى ۇسىنىپ تۇر.
«وڭىرلىك كاسىپكەرلەر پالاتاسى جۇمىسشى ماماندىقتارى جىلى اياسىندا بوس جۇمىس ورىندارى جارمەڭكەسىن العاش رەت وتكىزىپ وتىر. كەشەدەن بەرى بىزگە كوپتەگەن جۇمىس بەرۋشىلەر حابارلاستى. بۇل جەردە جۇمىس بەرۋشىلەر تىكەلەي جۇزدەسۋ ارقىلى ىزدەگەن مامانداردى تابا السا, جۇمىس ىزدەۋشىلەر HR-مەنەدجەرلەرمەن تانىسىپ, تۇيىندەمەسىن قالدىرادى. جارمەڭكە جۇمىسسىزدىقتى ازايتۋ, بەلسەندى ەڭبەك نارىعىن قالىپتاستىرۋداعى ماڭىزدى قادام», دەيدى وڭىرلىك كاسىپكەرلەر پالاتاسى سالالىق دامۋ ءبولىمىنىڭ باسشىسى دينارا سماعۋلوۆا.
اقتوبە وبلىسى
