«ماقساتىمىز – اۋىل ماڭىن حالىق سايالاپ, دەمالاتىن ورىنعا اينالدىرۋ. كوكتەمدە ءبىر گەكتار جەردى الىپ جاتقان ەتنواۋىلىمىزدى جيەكتەتىپ 200-دەن اسا اعاش وتىرعىزدىق. قورشاۋدىڭ ىشكى بويىمەن قىرعىز تالدارىن, شىرشا, سامىرسىن قاراعايى, قاراورىك, ارشا اعاشتارىن ەكتىك. كۇزدە سىرتىنا شىرعاناق وتىرعىزۋدى جوسپارلاپ وتىرمىز. سەبەبى اۋىل ىرگەسىنەن ءارى-بەرى وتكەن جولاۋشى وزەن جاعاسىنداعى شىرعاناققا بۇرىلا بەرمەيدى. دارۋمەنگە وتە باي جەمىس اعاشىن تانىپ ءارى ونى تەرىپ الۋىنا مۇمكىندىك تۋادى. اعاشتاردى كۇتىپ-باپتاۋعا اۋىل بالالارىن جۇمىلدىرىپ, جاس بۋىندى ەڭبەككە باۋلىساق, قورشاعان ورتانى ايالاۋدى ۇيرەنەتىن رۋحاني ورتالىققا اينالدىرساق دەگەن نيەتتەمىز», دەيدى كاسىپ يەسى مۇرات نوكەربان ۇلى.
قازداي تىزىلگەن قازاق ۇيلەردە اۋىل قاريالارى تاريحتان سىر شەرتسە, اقسامايلى انالار ەرتەگى تيەگىن اعىتپاق, ەندى بىرىندە ۇلتتىق قولونەرىمىزدىڭ شەبەرلىك ساعاتتارى وتكىزىلسە, اۋلاسىنا قۇرىلعان التىباقاندا اۋىلدىڭ التىاۋىز ءانى شىرقالىپ, سۇر مەرگەندەر ساداق اتىپ, اسىق ويناپ ءماز-مەيرام بولماق. سونداي-اق ۆولەيبول الاڭى سالىنىپ, وزەن جاعاسىنان باسسەين ىسكە قوسىلادى. ءارى ولار تەگىن قىزمەت كورسەتەدى. «تازابەك باتىر ساربازدارى قىلىشىن قايراعان تاس» تا جادىگەر رەتىندە وسى ەتنواۋىلدان ورىن العان. كەلەشەكتە ۇلتتىق مۇراعا اينالعان قۇندى دۇنيەلەردى جيناپ, اسپاناسقتى مۋزەيىن اشۋ جوسپاردا بار. سونىمەن بىرگە جارمەڭكە ۇيىمداستىرىپ, شەبەرلەردىڭ قولىنان شىققان بۇيىمدى ساۋدالاۋىنا تەگىن ورىن بەرۋ كوزدەلگەن.
ءبىر سوزبەن, جاڭادان بوي كوتەرگەن اسەم ەتنواۋىل 2 مىڭعا جۋىق حالقى بار شىرعاناقتىڭ شىرايىن كىرگىزىپ, تۇرعىنداردىڭ تۇرمىسىنا دا وڭ اسەرىن تيگىزەتىن بولادى.
الماتى وبلىسى
