اۋدانداعى 4 095 گەكتار باقتىڭ 3 100 گەكتارى ورىك باۋلارىنا تيەسىلى. جىل سايىن مۇندا 22 مىڭ تونناعا دەيىن ءونىم جينالىپ, ونىڭ 4 مىڭ تونناسى رەسەي, قىرعىزستان جانە وزبەكستان نارىعىنا ەكسپورتتالادى. قالعان بولىگى ىشكى نارىقتا سۇرانىسقا يە. بۇگىندە ورىكتىڭ ءبىر كيلوسى 250–300 تەڭگە ارالىعىندا ساتىلىپ جاتىر.
«Apricot Fest» – ەكوتۋريزم مەن وڭىرلىك ەكونوميكانى دامىتۋدىڭ تاماشا باستاماسى. بۇل – تابيعات پەن مادەنيەتتى, جەرگىلىكتى ءونىم مەن بىرەگەيلىكتى توعىستىراتىن الاڭ. باستاپقى كەزەڭنەن-اق جوبا شەتەلدىك كاسىپكەرلەردىڭ قىزىعۋشىلىعىن ارتتىرىپ وتىر. قىرعىزستان مەن وزبەكستان كومپانيالارى فەستيۆال اياسىندا ءونىم جەتكىزۋ بويىنشا كەلىسىمدەر جاسادى», دەيدى سالتاناتتى جيىندا ءسوز العان الماتى وبلىستىق ءماسليحاتىنىڭ توراعاسى قۋات بايعودجاەۆ.
ۇيعىر اۋدانىنىڭ اكىمى بوتا ەلەۋسىزوۆا ورىكتىڭ ءوڭىر ءۇشىن ەرەكشە رامىزدىك ءمانى بار ەكەنىن اتاپ ءوتتى.
«ورىك – ءبىزدىڭ اۋداننىڭ تەك اۋىل شارۋاشىلىعى ءونىمى ەمەس, ەكونوميكامىزدىڭ, مادەنيەتىمىزدىڭ دە بەلگىسى. «Apricot Fest» فەستيۆالىن جىل سايىن داستۇرگە اينالدىرىپ, وڭىرگە كەلەتىن تۋريستەر اعىنىن ارتتىرعىمىز كەلەدى», دەدى ول.
فەستيۆال اياسىندا ءتۇرلى گاسترونوميالىق ايماقتار, جەرگىلىكتى ونىمدەر جارمەڭكەسى, ەتنو-شوۋلار مەن شەبەرلىك سىنىپتارى ۇيىمداستىرىلدى.
«اۋىل جانداندى. كوپتەن كۇتكەن قوزعالىس, جاڭعىرۋ باستالدى. كەلۋشىلەر قىزىعۋشىلىقپەن تاماشالاپ, ءونىمنىڭ ءدامىن كورىپ جاتىر. بىزگە ءدال وسىنداي شارالار قاجەت ەدى», دەيدى تۇرعىن راۆيل انادۋللاەۆ. فەستيۆالعا الىس-جاقىننان اعىلعان مەيماندار از بولمادى. ولار ءوز كەزەگىندە ەستە قالارلىق شاراعا ريزاشىلىعىن ءبىلدىرىپ, سارى ورىكتەن كوپتەپ ساتىپ العاندارىن دا قۋانا ايتىپ
جاتتى.
وبلىستىق تۋريزم باسقارماسىنىڭ باسشىسى قۋانىشبەك ميرامبەك ۇلىنىڭ ايتۋىنشا, كەلەر جىلدان باستاپ «Apricot Fest» فەستيۆالىن ءساۋىر ايىندا, ورىك باۋلارى گۇلدەنەتىن كەزەڭدە وتكىزۋ جوسپارلانىپ وتىر. «ورىك گۇلدەگەندە باۋلار كوزدىڭ جاۋىن الادى. ءبىز ساۋىردەگى فەستيۆالدا تۋريستەر اعىنى ودان سايىن كوبەيەدى دەپ سەنەمىز», دەيدى قۋانىشبەك ميرامبەك ۇلى.
العاشقى «Apricot Fest» فەستيۆالى تەك ءونىم مەرەكەسى عانا ەمەس, ءارى جاڭا تۋريستىك جانە ينۆەستيتسيالىق باعىت قالىپتاستىرۋدىڭ باستاۋىنا اينالدى. ءوز كەزەگىندە ورىك تە ەكسپورتتىق ءونىم عانا ەمەس, ءوڭىر رامىزىنە, قوناقجايلىلىق پەن مۇمكىندىكتەر كورسەتكىشىنە اينالارى انىق.
الماتى وبلىسى
