سۋرەت: info.homsters.kz
قاۋلىعا سايكەس, 25% دەڭگەيىندەگى مولشەرلەمە 2025 جىلعى 1 قاراشاعا دەيىن ساقتالادى. اتالعان مەرزىمگە دەيىن بانكتەر جۇيە باپتاۋلارىن, يپوتەكا بويىنشا شارتتاردى قايتا قاراپ, ىشكى قۇجاتتار مەن جارنامالاردى جاڭارتىپ ۇلگەرۋگە ءتيىس.
قارجى سەكتورىنداعى وكىلەتتى ەكى مەكەمە – ۇلتتىق بانك پەن قنردا-نىڭ اينالاسى التى كۇندە قايتا ويلانۋىنا نەگىز دە جوق ەمەس. ويتكەنى يپوتەكا بەرەتىن بانكتەر ءا دەگەندە تۇرعىن ءۇي زايمدارىن بەرۋدى كىلت توقتاتىپ تاستادى. ساراپشىلار دا مولشەرلەمەنىڭ تومەندەۋى نارىققا قولايسىز اسەر ەتەدى دەگەن پىكىر ءبىلدىردى. ولاردىڭ سوزىنشە, بانكتەرگە 20%-دان تومەن مولشەرلەمەمەن يپوتەكا بەرۋ ءتيىمسىز, سوندىقتان ولار نەسيەلەۋ شارتتارىن وزگەرتۋگە كىرىسەدى. ماسەلەن, العاشقى جارنا كولەمىن كوبەيتۋى نەمەسە ءۇيدىڭ تۇرعىزىلعان جىلىنا قاتىستى قاتاڭ تالاپتار قويۋى مۇمكىن.
وسى ارالىقتا 3 بانك ەكىنشى نارىقتا يپوتەكاعا ءوتىنىم قابىلداۋدى توقتاتىپ ۇلگەردى, ولار – «حالىق بانك», «تسەنتر كرەديتبانكى» جانە «نۇربانك». ولار «تەحنيكالىق جۇمىستار جۇرگىزىلىپ جاتىر» دەپ جانە «مولشەرلەمە بويىنشا تۇزەتۋلەر ەنگىزىلىپ جاتىر» دەپ مالىمدەمە جاسادى.
«20% دەڭگەيىندەگى شەكتى مولشەرلەمە ەكىنشى دەڭگەيلى بانكتەر (ەدب) ءۇشىن باعا شەكتەۋىن تۋعىزادى. 15,5% باعاسىندا ەدب-لار كەم دەگەندە تاۋەكەل قۇنىنىڭ 2%-ىن قوسادى, بۇل – بانكتەردىڭ ناشار قارىز الۋشىلارعا بايلانىستى وتەيتىن شىعىنى. ودان كەيىن ەدب 1-2% بولاتىن وپەراتسيالىق شىعىنداردى قوسادى جانە قالعانى مارجا بولىپ ەسەپتەلەدى. ناتيجەسىندە, ەدب ءۇشىن وزىندىك قۇن 18,5-19,5% بولادى. سايكەسىنشە, بانكتە قوسىمشا مارجا رەتىندە نەبارى 0,5-1,5% قالادى, بۇل وتە از جانە بانكتە يپوتەكالىق نەسيە بەرۋگە دەگەن ق ۇلىق ازايادى. سەبەبى ولاي زيان شەگىپ وتىرعانشا مولشەرلەمەسى جوعارى تۇتىنۋشىلىق نەسيەمەن اينالىسقانى جاقسى», دەيدى قارجىگەر عالىم قۇسايىنوۆ.
ء«بىرىنشى نەسيە بيۋروسىنىڭ» (بنب) مالىمدەۋىنشە, شەكتى مولشەرلەمەنى 25%-دان 20%-عا تومەندەتۋ قايتالاما نارىقتى كۇيرەتۋى ىقتيمال.
«جاڭاشىلدىققا بايلانىستى بانكتەر ەكىنشى نارىق ۇيلەرىنىڭ يپوتەكالىق نەسيەسىنە قاتىستى شارتتارىن قايتا قارايدى. ىقتيمال وزگەرىستەر: قايتالاما تۇرعىن ءۇيدىڭ سالىنعان جىلىنا بايلانىستى شەكتى جوعارىلاتۋ, العاشقى جارنا كولەمىن كوبەيتۋ, قارىز الۋشىنىڭ تولەم قابىلەتىن باعالاۋ كريتەريلەرىن كۇشەيتۋ. اسىرەسە وڭىرلەر دە ەكىنشى دەڭگەيلى تۇرعىن ۇيگە ارنالعان يپوتەكا كۇرت قىسقارۋى مۇمكىن», دەپ مالىمدەيدى بنب.
تۇسىنگەنىمىز, شەكتى مولشەرلەمەنى تومەندەتۋ – بانكتەر ءۇشىن ءتيىمسىز, ازاماتتار ءۇشىن ىڭعايلى.
«جتسم نەسيەنىڭ ءبىر جىلداعى ناقتى قۇنىن كورسەتەدى. ياعني ءبىز بانكتەن يپوتەكا نەمەسە تۇتىنۋشىلىق كرەديت العاندا, وسى مولشەرلەمەگە قاراپ راسىمدەلىپ جاتقان نەسيەگە ناقتى قانشا تولەيتىنىمىزدى كورە الامىز. بۇل مولشەرلەمە تەك پايىزبەن شەكتەلمەيدى. وعان قارجى ۇيىمدارىنىڭ كوميسسياسى مەن تولەمدەر جانە باسقا دا قوسىمشا شىعىندار كىرەدى. قاراپايىم مىسال: 15 ملن تەڭگەگە 15 جىلعا يپوتەكا الاتىن بولدىق دەلىك. ەگەر جتسم 25% بولسا اي سايىن 330 000 تەڭگە تولەر ەدىك. 20% بولسا ايىنا شامامەن 290 000 تەڭگە تولەيمىز. بۇل جەردە 40 000 تەڭگە ۇنەمدەلىپ تۇر. تۇسىنگەن ادامعا كوپتەگەن وتباسى ءۇشىن ماڭىزدى سوما», دەپ جازادى «قارجىلىق ساۋات» تەلەگرام-ارناسى.
