پرەزيدەنت قاسىم-جومارت توقاەۆتىڭ مونوقالالار ەكونوميكاسىن ءارتاراپتاندىرۋ جانە دامىتۋ جونىندەگى تاپسىرمالارىن ورىنداۋ بۇگىندە جان-جاقتى اتقارىلىپ جاتىر.
سەمينار بارىسىندا مونوقالالاردىڭ دامۋ ۇردىستەرى جانە ەكونوميكا قۇرىلىمىن نىعايتۋ سالاسىنداعى وزەكتى مىندەتتەر تالقىلاندى. مونوقالالاردى ورنىقتى دامىتۋدىڭ جول كارتاسىن قالىپتاستىرۋ ماسەلەسى كوتەرىلدى, Smart City تسيفرلىق شەشىمدەرى مەن جوبالارىن ەنگىزۋدىڭ ماڭىزدىلىعى اتاپ ءوتىلدى, شاعىن ونەركاسىپ قالالارىن ورنىقتى دامىتۋدىڭ تابىستى وتاندىق جانە حالىقارالىق كەيستەرى قارالدى. بۇل تۇرعىدا يندۋستريالىق ايماق قۇرۋ ناتيجەسىندە مونوقالالار قاتارىنان شىعارىلعان جانە قازىر ونەركاسىپتىك قۋاتى ارتىپ كەلە جاتقان ساران قالاسىنىڭ وڭ تاجىريبەسى اتاپ ءوتىلدى.
وسىلايشا, ساراندا قولداۋ شارالارىنىڭ ناتيجەسىندە ەكونوميكانى ارتاراپتاندىرۋعا ىقپال ەتكەن Saran يندۋستريالىق ايماعى قۇرىلدى.
2019-2024 جىلدار ارالىعىندا قالادا ونەركاسىپ ءوندىرىسىنىڭ كولەمى 5,6 ەسە ءوستى, وڭدەۋ سالاسىنىڭ ۇلەسى 92%-عا جەتتى. سالىق تۇسىمدەرى ءۇش ەسە ءوستى. جاڭا زاۋىتتاردا 2 مىڭنان استام جۇمىس ورنى اشىلدى, ءارى قارايعى جوبالار تاعى 3,5 مىڭعا جۋىق جۇمىس ورنىن قامتاماسىز ەتەدى, بۇل جەرگىلىكتى تۇرعىنداردى دا, باسقا وڭىرلەردىڭ قىزمەتكەرلەرىن دە تارتادى.
جاڭا وندىرىستەر قۇرۋ جۇمىسپەن قامتۋدىڭ وسۋىنە جانە شوب-تى دامىتۋعا, سونداي-اق قالالىق ينفراقۇرىلىم مەن تۇرعىن-ءۇي قۇرىلىسىن جاڭعىرتۋعا ىقپال ەتەدى.
بيىل قالا ەكونوميكاسىنا 76 ملرد تەڭگەدەن استام ينۆەستيتسيا تارتۋ جوسپارلانىپ وتىر.
جالپى, ەلىمىزدە وڭىرلەردى قولداۋدىڭ جۇيەلى شارالارىن جۇزەگە اسىرۋ ناتيجەسىندە مونوقالالار سانى 27-دەن 20-عا دەيىن قىسقاردى, بۇل ءىرى وندىرىستەردىڭ جانە ەكونوميكانىڭ وزگە دە ءتۇرلى باعىتتارىنىڭ ءوسۋىن بىلدىرەدى.
سەمينار-كەڭەس قورىتىندىسى بويىنشا قاتىسۋشىلار ساران قالاسىنداعى بىرقاتار ونەركاسىپ جانە الەۋمەتتىك نىسانداردى ارالادى.
قازىرگى ۋاقىتتا قاراعاندى وبلىسىندا ءتورت مونوقالا بار – تەمىرتاۋ, شاحتينسك, اباي جانە بالقاش. وندا 340 مىڭعا جۋىق ادام تۇرىپ جاتىر, بۇل ءوڭىر حالقىنىڭ ۇشتەن ءبىرىن قۇرايدى. وڭىردەگى ونەركاسىپ ءوندىرىسىنىڭ جارتىسىنا جۋىعى مونوقالالار ۇلەسىنە تيەسىلى.
