مۋزەيلىك انىقتامالىقتا تيىننىڭ قايدان تابىلعانى جانە قايدا ساقتالعانى تۋرالى مالىمەت جوق. مەكەمەنىڭ كىشى عىلىمي قىزمەتكەرى تولقىن جولداسوۆتىڭ ايتۋىنا قاراعاندا, مونەتا مىستان جاسالعان. ساقتالۋ جاعدايى – ناشار. ءپىشىنى – شەڭبەر پوشىمدى دوڭگەلەك. تيىننىڭ اينالا جيەگى ءمۇجىلۋ سەبەبىنەن كەيبىر تاڭبالارى توزعان. ءتىپتى كەيبىر بەدەر ىزدەرى جويىلىپ كەتۋگە جاقىن. ەڭ وكىنىشتىسى, تيىن سوعىلعان ۋاقىت (جىلى) شەكىتىلگەن تۇس سىنىپ
تۇسكەن.
– بىراق, – دەيدى كونە تاڭبالار بىلگىرى تولقىن ماحانبەت ۇلى. – جادىگەردىڭ امان ساقتالعان بولىگىندەگى جازۋ-تاڭبالارعا قاراپ, تيىن حيجرانىڭ 727, 728, 738 جىلدارى سىعاناق اقشا سارايىندا سوعىلعانىن اڭعارۋعا بولادى. وعان دالەل – تيىننىڭ ورتاسىنداعى شارشى ءپىشىندى كارتۋش ىشىندە ءۇش قاتار جازبا. وندا «زارب / سىعنا / ق» (سىعاناق) دەپ تاڭبالانعان. تاعى ءبىر دالەل: ورتا ازيا جانە قازاقستان نۋميزماتيكاسى سالاسىنداعى ءىرى مامان رايحان بۋرناشەۆانىڭ ەڭبەكتەرىندە سىعاناق تيىندارىنىڭ وسىنداي ۇلگىلەرى كوپ كەزدەسەدى.
«جادىگەردىڭ تاعى ءبىر ەرەكشەلىگى, ورتا عاسىردا اينالىمدا بولعان پۋلدارمەن تيپتەس. ال «پۋل» دەگەنىمىز – التىن وردا داۋىرىندە مىستان سوعىلعان تەڭگە-تيىنداردىڭ تاريحي اتاۋى. مۇنداي تيىندار ءXىى عاسىردىڭ اياعى مەن XVI عاسىردىڭ باسىندا قولدانىلا باستاعان. ونىڭ نەگىزگى سەبەپتەرىنىڭ ءبىرى, ءدال وسى ۋاقىتتا اۋماقتا مىس اقشالارمەن عانا اتقارىلاتىن ۇساق ساۋدانىڭ ۇلكەن قارقىندا دامۋى – مىستان سوعىلعان اقشالاردىڭ نەگىزگى تولەم قۇرالى رەتىندە بەكۋىنە جاعداي جاسادى. سوندىقتان ەڭ كوپ قولدانىلاتىن اقشا تۇرىندە پۋل اتاۋى جالپى اقشا اتاۋىنا بالانا باستادى» دەيدى ت.جولداسوۆ.
