فوتو: اشىق دەرەكوز
وقيعاعا قاتىستى كيبەرشابۋىلداردى تالداۋ جانە تەرگەۋ ورتالىعىنىڭ پرەزيدەنتى ولجاس ساتيەۆ ءوز پىكىرىن ءبىلدىردى:
«اسا ءىرى كولەمدەگى اقپارات تاراپ وتىر. قازىر تەرگەۋ امالدارى جۇرگىزىلىپ جاتىر. ءبىز ۇلتتىق قاۋىپسىزدىك كوميتەتىنىڭ مەملەكەتتىك تەحنيكالىق قىزمەتىنەن رەسمي اقپارات كۇتىپ وتىرمىز. ولار دا بۇل جاعدايدى ءجىتى تەكسەرۋى ءتيىس».
داۋدىڭ ورشۋىنە بايلانىستى تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى رەسمي مالىمدەمە جاساپ, بۇل دەرەكتەردىڭ قايدان شىققانىنا قاتىستى كەشەندى تەكسەرىس باستالعانىن حابارلادى:
«اقپاراتتىق قاۋىپسىزدىك كوميتەتى قۇقىق قورعاۋ جانە ارنايى ورگاندارمەن بىرلەسىپ, ۇسىنىلعان مالىمەتتەردىڭ شىنايىلىعى مەن وزەكتىلىگىن انىقتاۋ ماقساتىندا كەشەندى تەكسەرۋ جۇرگىزىپ جاتىر», دەلىنگەن مينيسترلىك تاراتقان حابارلامادا.
ۆەدومستۆو مالىمەتىنشە, قازىرگى ۋاقىتتا مەملەكەتتىك اقپاراتتىق جۇيەلەرگە باعىتتالعان بۇزۋ ارەكەتتەرى تىركەلمەگەن. بۇل – دەرەكتەردىڭ مەملەكەتتىك ەمەس كوزدەردەن, ياعني جەكەمەنشىك بازالاردان الىنۋى مۇمكىن دەگەن جورامالعا نەگىز بەرەدى. مۇنداي كوزدەرگە ميكروقارجى ۇيىمدارى, قىزمەت كورسەتۋ ورتالىقتارى, جەكە دەرەكتەرمەن جۇمىس ىستەيتىن ءتۇرلى پلاتفورمالار كىرۋى ىقتيمال.
قاۋىپسىزدىك ماقساتىندا ازاماتتاردىڭ eGov پورتالى ارقىلى جەكە كابينەتىنە ەسكەرتۋ حابارلامالار جولداناتىنى ايتىلدى. ياعني ءار ازامات ءوزىنىڭ جەكە دەرەگى اتالعان بازا ىشىندە بار-جوعىن ەلەكتروندى ۇكىمەت جۇيەسى ارقىلى ءبىلىپ وتىرا الادى.
مۇنداي جاعداي قازاقستاندا العاش رەت ورىن الىپ وتىرعان جوق. ماسەلەن, 2024 جىلدىڭ كوكتەمىندە Zaimer.kz ميكروقارجى ۇيىمىنىڭ 2 ميلليوننان استام كليەنتىنىڭ دەرەكتەرى دە ينتەرنەتكە تاراعان بولاتىن. سول كەزدە دە ءتيىستى ورگاندار تەرگەۋ جۇرگىزىپ, اقپاراتتىق قاۋىپسىزدىكتى كۇشەيتۋ تۋرالى مالىمدەگەن ەدى.
الايدا بۇل جولعى جاعداي اۋقىمى جاعىنان الدەقايدا كەڭ ءارى قاۋىپتى. ويتكەنى بۇل جەكە ادامعا عانا ەمەس, جالپى ۇلتتىق دەڭگەيدەگى قاۋىپسىزدىككە قاتەر ءتوندىرۋى مۇمكىن. سەبەبى تاراعان دەرەكتەر ارقىلى تەك الاياقتىق ەمەس, شەتەلدىك قۇرىلىمداردىڭ ىشكى اقپاراتتىق كەڭىستىككە اسەر ەتۋى, ازاماتتاردى باقىلاۋ, مانيپۋلياتسيا جاساۋ سىندى گيبريدتى قاۋىپ-قاتەرلەردىڭ جولى اشىلادى.
