تۋريستەر ۋاقىتشا ارزان قوناقۇيلەرگە ورنالاستىرىلعان, ولاردىڭ ايتۋىنشا, جاعداي كوڭىل كونشىتپەيدى: تولىققاندى تاماق بەرىلمەگەن, ال بولمەلەرگە تەك تۇندە كىرگىزەدى.
ساپاردان ورالا الماي وتىرعانداردىڭ اراسىندا وكسانا كولەسنيچەنكو دا بار. ول قىزىمەن بىرگە 13 ماۋسىمدا استاناعا ۇشۋى ءتيىس بولعان, الايدا اسكەري قيمىلدار باستالعاننان كەيىن رەيس توقتاتىلعان.
«كۇن سايىن ساعات 12-دە ءبىزدى بولمەلەردەن شىعارادى. جۇگىمىزدى سۇيرەتىپ, بالالارىمىزدى الىپ, ارى قاراي نە بولاتىنىن كۇتىپ حوللدا وتىرامىز. ەشكىم ەشتەڭە تۇسىندىرمەيدى. بىزگە تەك تاڭعى اس بەرىلەدى. قالعان ۋاقىتتا اركىم ءوزى قالاعان جەرىنەن تاماقتانادى. بىراق, اقشامىز دا تاۋسىلىپ جاتىر», دەيدى ول.
قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ ايتۋىنشا, قازىر شەتەلدە قالىپ قويعان ازاماتتاردىڭ سانى 300-گە جۋىق.
«قازىرگى ۋاقىتتا ءباا-دەن قازاقستانعا بىرقاتار اۋە كومپانيالارى رەيستەردى توقتاتقاندىقتان, 300-گە جۋىق ازاماتتىڭ ۇشۋى ۋاقىتشا مۇمكىن بولماي وتىر. ولاردىڭ كوپشىلىگى – تۋريستەر. وقيعا ورنىندا ءبىزدىڭ ديپلوماتتار جۇمىس ىستەپ جاتىر. اۋە كومپانيالارىمەن كەلىسىم ناتيجەسىندە الداعى ۋاقىتتا ازاماتتاردىڭ جارتىسىنان كوبى ەلگە قايتارىلادى», دەدى ول.
بۇعان دەيىن FlyDubai اۋە كومپانياسىنىڭ ەكى رەيسى ارقىلى 332 جولاۋشى الماتىعا جەتكىزىلگەن. وسى ۋاقىتتا قازاقستان اۋە تاسىمالداۋشىلارىنا يران, يزرايل, سيريا, يراك, يوردانيا جانە ليۆان اۋە كەڭىستىگى ارقىلى ۇشۋعا ۋاقىتشا تىيىم سالىنعان. بۇل جاعداي تەك ءباا عانا ەمەس, مىسىر مەن كاتاردان دا ازاماتتاردى ەلگە قايتارۋدى قيىنداتىپ جاتىر.
سوڭعى ءتورت كۇندە شامامەن 2 مىڭ قازاقستاندىق ەلگە جەتكىزىلگەن. ەندى كەزەك – ءباا-دە قالىپ قويعاندارعا كەلىپ وتىر.
«ەميراتتىق FlyDubai مەن Air Arabia كومپانيالارى رەيستەردى ورىنداۋدان باس تارتتى. ولار ماسەلەنى شەشۋگە, ۇلكەن ۇشاقتاردى تابۋعا تىرىسىپ جاتىر. ماسەلە – تولىق وتىنمەن, تولىق جۇكتەمەمەن ۇشىپ, كەمىندە الماتىعا جەتۋ مۇمكىندىگىنە كەلىپ تىرەلىپ وتىر. ولاردىڭ ۇشۋ قاشىقتىعى جەتى ساعاتتى قامتۋى ءتيىس, بۇل بارلىق ۇشاقتىڭ قولىنان كەلە بەرمەيدى», دەدى «تۋريستىك قامقور» قورىنىڭ ءتورايىمى يننا رەي.
SCAT اۆياكومپانياسى دا ءوز باعىتتارى مەن كەستەسىنە ءماجبۇرلى وزگەرىستەر ەنگىزىپ ۇلگەردى.
ايتا كەتەيىك, الماتىعا ەۆاكۋاتسيالانعان جولاۋشىلار ءوز قالالارىنا ءوز بەتىمەن جەتۋى ءتيىس — بۇل ءۇشىن قوسىمشا وتەماقى قاراستىرىلماعان.
