سەنات سپيكەرى تىڭداۋشىلاردى جاڭا كۋرستىڭ باستالۋىمەن قۇتتىقتاپ, ەكى اپتالىق وقۋ كەزەڭى پالاتانىڭ تۇراقتى ساراپشىلار قاۋىمداستىعىن قالىپتاستىرۋ باعىتىنداعى ناقتى جۇمىستىڭ جالعاسى ەكەنىن ايتتى. سونداي-اق ول ءار سالاداعى ساراپشىلاردىڭ ءوز بىلىمىمەن بولىسۋگە, تاجىريبە الماسۋعا, سول ارقىلى قۇندىلىقتاردىڭ دۇرىس جۇيەسىن دارىپتەۋگە دايىن بولۋى جانە وسى جولداعى بەلسەندىلىگى ەرەكشە ماڭىزعا يە ەكەنىن اتاپ ءوتتى. مەملەكەت باسشىسىنىڭ «ادال ازامات» تۇجىرىمداماسى وسىنداي قاعيداتقا تابان تىرەيدى.
«الەمدەگى جەتەكشى ۋنيۆەرسيتەتتەردىڭ ءبىرى – گارۆاردتىڭ تۇلەكتەرى ءوز بىلىمدەرىمەن ءبولىسىپ, اشىقتىق پەن جاۋاپكەرشىلىك قۇندىلىقتارىن دارىپتەيتىن وسىنداي باستامالاردىڭ ماڭىزى زور. بۇل قۇندىلىقتار پرەزيدەنت قاسىم-جومارت توقاەۆ جاريالاعان «ادال ازامات» تۇجىرىمداماسىنىڭ دا نەگىزى ەكەنىن اتاپ وتكەن ءجون. ساراپشىلار كلۋبى جانە تالداۋ مەكتەبى, جالپى Taldau Community سياقتى جوبالاردىڭ وزەگى وسىنداي باعدارلارعا تابان تىرەيدى. ءبىزدىڭ باستى ماقساتىمىز – ءبىلىم بەرۋ عانا ەمەس, سونىمەن قاتار تاجىريبە الماساتىن, تىڭ ويلار مەن يدەيالارعا جول اشاتىن جانە قوعامداعى وڭ وزگەرىستەرگە ىقپال ەتەتىن ينتەللەكتۋالدى قاۋىمداستىق قالىپتاستىرۋ», دەپ م.اشىمباەۆ ماڭىزدى باستاما ءۇشىن Harvard Alumni Community وكىلدەرىنە العىس ءبىلدىردى.
سەنات جانىنداعى تالداۋ مەكتەبى مەن ساراپشىلار كلۋبى اياسىنداعى وقىتۋ كەزەڭدەرى سياقتى «كەلىسسوزدەر جۇرگىزۋ شەبەرلىگى: ءتۇسىنۋ, ىقپال ەتۋ, كەلىسۋ» كۋرسى دا تەوريا مەن پراكتيكانىڭ كوللابوراتسياسى ەكەنىن ايتا كەتكەن ءجون. ەكى اپتا ىشىندە تىڭداۋشىلار الەمدەگى ەڭ ءتيىمدى تاسىلدەردىڭ ءبىرى سانالاتىن گارۆارد كەلىسسوزدەر مەكتەبىنىڭ ادىستەمەسىمەن ستراتەگيالىق جوسپارلاۋ, مەنەدجمەنت جانە ءارتۇرلى كوممۋنيكاتسيا ۇلگىلەرىن قۇرۋ داعدىلارى بويىنشا بىلىمدەرىن جەتىلدىرەدى. سونداي-اق ولار ءتيىمدى جاعدايلارمەن تانىسىپ, تالداۋلار جۇرگىزەدى جانە اناليتيكالىق جۇمىس تۋرالى تۇسىنىكتەرىن كەڭەيتەدى.
