فوتو: جي كومەگىمەن جاسالعان
ەسكە سالا كەتەيىك, 12 ناۋرىزدان باستاپ كامەرالار ارقىلى تىركەلەتىن قۇقىق بۇزۋشىلىقتار كوبەيدى. ەندى جول ەرەجەسىن بۇزۋ فاكتىسى تسيفرلىق جۇيەلەر (كامەرالار) ارقىلى انىقتالسا, ايىپپۇل بۇرىنعىداي كولىك يەسىنە ەمەس, تىكەلەي رولدە وتىرعان ادامنىڭ اتىنا جازىلادى. بۇل ماقساتتا بارلىق دەرەكتەر اكىمشىلىك وندىرىستەردىڭ بىرىڭعاي تىزىلىمىمەن ء(اوبت) ينتەگراتسيالانعان. ەگەر بۇعان دەيىن اۆتوماتتى جۇيەلەر جىلدامدىقتى اسىرۋ مەن باعدارشامعا باعىنباۋ سياقتى 6 ءتۇرلى ەرەجەنى باقىلاسا, ەندى ولار قاۋىپسىزدىك بەلدىگىن تاقپاعانداردى جانە كولىك تىزگىنىندە تەلەفونمەن سويلەسۋ ەرەجەسىن بۇزعانداردى دا مۇلتىكسىز انىقتاي باستادى.
كامەرا تىركەيدى, قىزمەتكەر تەكسەرەدى
كوپشىلىك اراسىندا «جول قوزعالىسىن باقىلاۋ كامەرالارى ايىپپۇلدى اۆتوماتتى تۇردە سالادى» دەگەن جاڭساق تۇسىنىك قالىپتاسقان. ىشكى ىستەر مينيسترلىگىنىڭ مالىمەتىنشە, بۇل پروتسەس تولىقتاي اۆتوماتتاندىرىلماعان. بەينەباقىلاۋ كامەرالارى تۇسىرگەن ءاربىر كادر, ءاربىر سەكۋندتىق ماتەريال مىندەتتى تۇردە ۋاكىلەتتى قىزمەتكەرلەردىڭ سۇزگىسىنەن وتەدى.
«جول قوزعالىسىن باقىلاۋ كامەرالارى قۇقىق بۇزۋشىلىقتاردى اۆتوماتتى تۇردە تىركەيدى. الايدا ايىپپۇل سالۋ تولىقتاي اۆتوماتتى تۇردە جۇرگىزىلمەيدى. كامەرا تۇسىرگەن ماتەريالدار مىندەتتى تۇردە ۋاكىلەتتى قىزمەتكەرلەرگە جىبەرىلىپ, ولار ءار جاعدايدى جەكە تەكسەرەدى. ياعني ءاربىر تىركەلگەن فاكت بويىنشا بارلىق قۇقىق بۇزۋشىلىق بەلگىلەرى قارالادى. قىزمەتكەر فوتو/ۆيدەو ماتەريالدى تالداپ, ناقتى شەشىم قابىلدايدى. وسىلايشا, نەگىزسىز ايىپپۇل سالۋ تاۋەكەلى ازايادى», دەپ ءتۇسىندىردى مينيسترلىكتىڭ ءباسپاسوز قىزمەتى.
وسى تۇستا كەيبىر جۇرگىزۋشىلەردىڭ تەلەفوندى جاسىرۋ, بەت-الپەتىن باس كيىممەن كولەگەيلەۋ سياقتى ارەكەتتەرى ەش كەپىلدىك بەرمەيتىنىن ۇعىنۋ قاجەت. مينيسترلىك ماماندارى كامەرا تەك كۇدىكتى بەلگىنى انىقتايتىنىن, ال سوڭعى شەشىمدى قىزمەتكەر قابىلدايتىنىن ەسكەرتەدى.
«جول ءجۇرىسى تۋرالى» زاڭنىڭ 54-بابى 4-تارماعىنا سايكەس جۇرگىزۋشىگە كولىك جۇرگىزۋ كەزىندە تەلەفوندى قولدا ۇستاپ پايدالانۋعا تىيىم سالىنادى. قانداي ماقساتتا بولسا دا (سويلەسۋ, جازۋ, وقۋ, ناۆيگاتور قاراۋ, ۆيدەو ءتۇسىرۋ) ەگەر تەلەفون قولدا بولسا, بۇل قۇقىق بۇزۋشىلىق بولىپ سانالادى. ءتىپتى كولىك ۋاقىتشا توقتاعان جاعدايدا دا (باعدارشام, كەپتەلىس) جۇرگىزۋشى كولىكتى باسقارىپ كەلە جاتقان بولىپ ەسەپتەلەدى. بىلايشا ايتقاندا, باعدارشامعا توقتاپ تۇرعاندا دا, كەپتەلىستە توقتاپ تۇرعاندا دا قولدا تەلەفوندى پايدالانۋ بۇزۋشىلىق بولىپ سانالادى», دەلىنگەن رەسمي جاۋاپتا.
زاڭناما جۇرگىزۋشىنى بايلانىس قۇرالىنان تولىق اجىراتۋدى ماقسات تۇتپايدى, تەك قاۋىپسىزدىك تالاپتارىن قاتاڭ ساقتاۋ قاجەتتىگىن ەسكەرتەدى. مىناداي جاعدايلاردا تەلەفوندى پايدالانۋعا رۇقسات ەتىلەدى:
- قۇلاققاپ ارقىلى سويلەسۋ;
- داۋىس زورايتقىش;
- كولىكتىڭ مۋلتيمەديا جۇيەلەرى;
- داۋىسپەن باسقارۋ. ياعني, تەلەفوندى قولعا ۇستاماي داۋىسپەن باسقارۋعا بولادى.
ەگەر ازامات ايىپپۇل زاڭسىز سالىندى دەپ ەسەپتەسە, اكىمشىلىك قۇقىقبۇزۋشىلىق تۋرالى كودەكستىڭ 44-تاراۋىنا سايكەس شاعىمدانۋىنا بولادى. مينيسترلىك وكىلدەرى مۇنداي جاعدايدا فوتو-ۆيدەو دالەلدەمەلەر, كۋاگەرلەردىڭ سوزدەرى مەن وزگە دە ماتەريالدار ءىستى قايتا قاراۋعا نەگىز بولا الاتىنىن ايتادى.
سونداي-اق زاڭ بويىنشا كامەرا تەلەفوندى تىركەگەن جاعدايدا ايىپپۇل كولىك يەسىنە راسىمدەلەدى. بىراق, ەگەر يەسى سول ساتتە رولدە باسقا ادام بولعانىن زاڭدى تۇردە دالەلدەي السا, جاۋاپكەرشىلىكتەن بوساتىلادى.
