ەربول مىرزابوسىنوۆ قىتاي مەن قازاقستاننىڭ كەز كەلگەن سالادا بايلانىسى بەكەم, دوستىعى بەرىك ەلدەر ەكەنىن اتاپ ءوتتى. سونداي-اق مينيستر بۇگىندە ەكى ەل اراسىنداعى قاتىناستار ء«بىر بەلدەۋ. ءبىر جول» باستاماسى اياسىندا جاڭا دەڭگەيگە كوتەرىلىپ جاتقانىن, بۇل رەتتە تۋريزم سالاسى قوس حالىقتى جاقىنداستىراتىن نەگىزگى فاكتورعا اينالعانىن جەتكىزدى.
«بارشاڭىزدى قازاقستانداعى قىتاي ءتۋريزمى جىلىنىڭ اشىلۋىمەن شىن جۇرەكتەن قۇتتىقتايمىن! بىلتىر استانادا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ پەن قىتاي حالىق رەسپۋبليكاسىنىڭ توراعاسى سي تسزينپين 2025 جىلدى «قازاقستانداعى قىتاي ءتۋريزمى جىلى» دەپ جاريالادى. بۇل 2024 جىلعى «قىتايداعى قازاقستان ءتۋريزمى جىلىنىڭ» زاڭدى جالعاسى سانالادى. اۋقىمدى ءىس-شارا ەكى ەل اراسىنداعى تۋريستىك ىنتىماقتاستىقتىڭ جاڭا پاراعىن اشىپ وتىر. وسى ورايدا, مەملەكەتتەر اراسىنداعى تۋريستىك جانە مادەني الماسۋدى دامىتۋعا زور ۇلەس قوسقان ارىپتەسىم – سۋن ەلي مىرزاعا ەرەكشە العىس بىلدىرەمىن», دەدى تۋريزم جانە سپورت ءمينيسترى.
سونداي-اق ەربول مىرزابوسىنوۆ قازاقستانداعى قىتاي حالىق رەسپۋبليكاسىنىڭ تۋريزم جىلى اياسىندا ەكى ەل اراسىنداعى تۋريستىك باستامالاردى قولداۋ ماقساتىندا بىرقاتار شارالاردى ۇسىندى.
اتاپ ايتقاندا, ەلىمىزدە قىتاي تۋريستەرىنە قولايلى جاعداي جاساۋعا مۇمكىندىك بەرەتىن Welcome Chinese باعدارلاماسىن ەنگىزۋ. باعدارلاما قوناق ۇيلەردىڭ, تۋريستىك كومپانيالار مەن نىسانداردىڭ قىتايدان كەلەتىن قوناقتاردىڭ قاجەتتىلىگىنە بەيىمدەلۋگە كومەكتەسەدى. بۇدان بولەك, تۋريزم, سپورت جانە مادەنيەتتى توعىستىراتىن بىرەگەي شەكارالىق مارافون ۇيىمداستىرۋ جانە تۋريستىك جوعارى وقۋ ورىندارى اراسىنداعى اكادەميالىق ۇتقىرلىقتى ارتتىرۋ ارقىلى ءبىلىم مەن تاجىريبە الماسۋ ۇسىنىلدى.
سونىمەن بىلتىرعى جىل قازاقستان مەن قىتاي ءۇشىن ءتۋريزمدى ءوزارا دامىتۋدا ماڭىزدى كەزەڭ بولدى. 2024 جىل «قىتايداعى قازاقستان ءتۋريزمى جىلى» اياسىندا قىتايدىڭ ءىرى قالالارىندا 37 ءىس-شارا ۇيىمداستىرىلدى. سونىڭ ناتيجەسىندە تۋريستەر اعىنى بىرنەشە ەسە ارتتى. بىلتىر ەلىمىزگە قىتايدان 655 مىڭ تۋريست كەلدى. بۇل 2023 جىلعى كورسەتكىشتەن 78% جوعارى (2023 جىلى – 367 مىڭ ادام).
