FlyDubai اۋە كومپانياسىنىڭ رەيستەرى الماتىعا 15 ماۋسىمدا ساعات 02:45 جانە 06:19-دا قوندى. ۇشاق بورتىندا 332 قازاقستاندىق بولعان, ولاردىڭ ىشىندە 13 ماۋسىمدا ۇشا الماعان جولاۋشىلار دا بار. اتالعان كۇنى تاياۋ شىعىستا جاعداي كۇرت شيەلەنىسكەننەن كەيىن بىرقاتار اۋە كومپانياسى دۋباي مەن ابۋ-دابيدەن قازاقستانعا جانە باسقا ەلدەرگە رەيستەردى ۋاقىتشا توقتاتقان ەدى.
قر كولىك مينيسترلىگىنىڭ ازاماتتىق اۆياتسيا كوميتەتىنىڭ بۇيرىعىنا سايكەس, 13 ماۋسىمنان باستاپ يران, يزرايل, سيريا, يراك, يوردانيا جانە ليۆاننىڭ ۇستىمەن, اۋماعىندا جانە ماڭىندا ۇشۋعا تولىق تىيىم سالىنعان. FlyDubai رەيستەرى بۇل ايماقتاردى قاۋىپسىز اينالىپ ءوتىپ, تەك كەشىككەن جولاۋشىلاردى ەمەس, جوسپارلى رەيستەردەگى ازاماتتاردى دا ەلگە امان-ەسەن جەتكىزدى.
رەيستەرى كەيىنگە قالدىرىلعان بارلىق قازاقستاندىقتار “تۋريستىك قامقور” قورىنىڭ قاتىسۋشى تۋروپەراتورلارى ەسەبىنەن قوناق ۇيلەرگە ورنالاستىرىلدى. ەۆاكۋاتسيا قر تۋريزم جانە سپورت مينيسترلىگى, سىرتقى ىستەر مينيسترلىگى جانە قازاقستاننىڭ بىرىككەن اراب امىرلىكتەرىندەگى ەلشىلىگى ۇيلەستىرۋىمەن جۇزەگە اسىرىلدى.
