«شەگىرتكەنىڭ ەگىندىككە, مال جايىلىمىنا, تابيعي وسىمدىكتەرگە جاپپاي تارالۋى – تابيعي اپات. ساياق شەگىرتكەگە قارسى حيميالىق وڭدەۋ جۇمىسىنا جەرگىلىكتى بيۋدجەت ەسەبىنەن 349,9 ملن تەڭگە قاراستىرىلعان. 2023 جىلى ساياق شەگىرتكەگە قارسى وڭدەۋ جۇمىسىنا جەرگىلىكتى بيۋدجەت ەسەبىنەن 120 ملن تەڭگە, وتكەن جىلى 201,7 ملن تەڭگە قاراجات بولىنگەن بولاتىن. الماتى وبلىسى اكىمدىگى تاراپىنان بۇل ماسەلە تۇراقتى باقىلاۋعا الىنعان», دەيدى وبلىس اكىمىنىڭ ورىنباسارى اسەت ماساباەۆ.
وڭىردە ءۇيىرلى جانە ساياق شەگىرتكەلەرگە قارسى حيميالىق وڭدەۋ جۇمىستارى 113 997 گا جەرگە جۇرگىزىلەدى. سونىڭ ىشىندە رەسپۋبليكالىق بيۋدجەت ەسەبىنەن ەرەكشە قاۋىپتى ءۇيىرلى شەگىرتكەلەرگە قارسى جۇرگىزىلگەن وڭدەۋ جۇمىسىنىڭ كولەمى – 63 438 گا, ونىڭ ىشىندە: يتاليالىق شەگىرتكە – 46 755 گا, ازيالىق شەگىرتكەگە – 16 683 گا.
ء«ۇيىرلى شەگىرتكەلەرگە قارسى حيميالىق وڭدەۋ جۇرگىزەتىن مەردىگەر كومپانيالار ايقىندالدى. 10 جەرۇستى بۇرىككىش تەحنيكالارى, 1 جەڭىل ۇشاق, 2 اسا جەڭىل ۇشاق قاتىستىرىلىپ, حيميالىق وڭدەۋ جۇمىستارىن «زاراگراند», «AVIASILA» جاۋاپكەرشىلىگى شەكتەۋلى سەرىكتەستىكتەرى اتقاراتىن بولادى. مەردىگەر كومپانيالار قوسىمشا سۋ تاسىعىش اۆتوكولىكتەر, رانتستىق بۇرىككىشتەر, ناسوس قوندىرعىلارى مەن ءدارى تاسىمالداۋشى تەحنيكالارمەن قامتاماسىز ەتىلگەن. سونىمەن قاتار ءۇيىرلى شەگىرتكەلەرگە قارسى حيميالىق وڭدەۋگە 2 درون اپپاراتى, «فيتوسانيتاريا» رمم-نىڭ 4 بۇرىككىشى, باسقا دا تەحنيكالارى تارتىلادى. ناۋقان كەزىندە بارلىعى
201 ادام, 46 اۆتوكولىك قاتىستىرىلادى», دەدى وبلىستىق اۋماقتىق ينسپەكتسيا باسشىسى دارحان ابىلعازيەۆ.
كورشىلەس جامبىل, قاراعاندى, جەتىسۋ وبلىستىق اۋماقتىق ينسپەكتسيالارمەن شەگىرتكە تەكتەس زيانكەستەرگە, باسقا دا اسا قاۋىپتى زياندى ورگانيزمدەرگە قارسى فيتوسانيتارلىق ءىس-شارالاردى بىرلەسىپ اتقارۋ جونىندە ىنتىماقتاستىق كەلىسىمشارت جاسالعان.
حيميالىق قوسىندىلار توپىراقپەن قوسا, ادام دەنساۋلىعىنا ايتارلىقتاي زالال كەلتىرەدى. بۇگىندە ەلىمىزدە 92 پرەپارات ءتۇرى تىركەلسە, ونىڭ التاۋى عانا بيولوگيالىق ساناتتا. سوندىقتان عالىمدار بۇل ماسەلەنىڭ تەزدەتىپ شەشىم تاپقانى ءجون دەپ وتىر.
ء«بىز بىرقاتار بيولوگيالىق پرەپارات جاساپ شىعاردىق. اتاپ ايتساق, ەلىمىزدە قولدانۋعا رۇقسات ەتىلگەن پرەپاراتتاردىڭ قاتارىندا ينستيتۋت عالىمدارى جاساعان وتاندىق 2 پرەپارات بار. ەكولوگيالىق تازا, تابيعاتتاعى پايدالى جاندىكتەرگە, ادامدارعا كەرى اسەرى جوق بيولوگيالىق كۇرەس تاسىلدەرىن جاساۋمەن تىندىرىمدى اينالىسىپ جاتىرمىز», دەيدى ج.جيەنباەۆ اتىنداعى قازاق وسىمدىك قورعاۋ جانە كارانتين عىلىمي زەرتتەۋ ينستيتۋتىنىڭ باسقارما توراعاسى باقىتجان دۇيسەنبەكوۆ.
الماتى وبلىسى
