سۋرەت «ەگەمەن قازاقستاننىڭ» ارحيۆىنەن الىندى
ءبىرىنشى كەزەڭنىڭ قورىتىندىسىندا اقش ەڭ از داۋىس جيناپ, ەكىنشى كەزەڭگە قازاقستان مەن فرانتسيا ءوتتى. فينالدىق داۋىس بەرۋ ناتيجەسى كەلەسىدەي بولدى: قازاقستان – 54,68%, فرانتسيا – 45,32%. وسىلايشا, ەلىمىز تاريحتا تۇڭعىش رەت الەمدىك باستى ءتۋرنيردى قابىلدايتىن بولدى. 2028 جىلعى الەم چەمپيوناتى جاپونيانىڭ فۋكۋوكا قالاسىندا وتەدى. 2029 جىلى الەم بىرىنشىلىگىن برازيليانىڭ ريو-دە-جانەيرو قالاسى قابىلدايدى.
اتالعان سپورت تۇرىمەن الەمدە ميلليونداعان ادام شۇعىلدانادى.ء بىر عاسىرلىق تاريحى بار ۇستەل تەننيسى بۇگىندە وليمپيادالىق سپورت ءتۇرى بولىپ ەسەپتەلەدى.
ەلىمىزدىڭ الەمدىك دودانى وتكىزۋ مارتەبەسىنە يە بولۋى تەگىننەن-تەگىن ەمەس. ۇستەل تەننيسى – جوسپارلى تۇردە دامىپ كەلە جاتقان بۇقارالىق, قولجەتىمدى سپورت ءتۇرى. رەسپۋبليكا كولەمىندەگى ءىرى قالالاردىڭ بارلىعىندا ۇستەل تەننيسى ورتالىقتارى اشىلعان. وڭىرلەردە ماتەريالدىق-تەحنيكالىق بازانى نىعايتۋدىڭ ارقاسىندا ۇستەل تەننيسىمەن شۇعىلداناتىندار سانى ءوسىپ, وبلىس پەن اۋدان دەڭگەيىندەگى جارىستاردىڭ سانى ارتتى. كەيىنگى كەزەڭدە الدىڭعى قاتارلى سپورتشىلارىمىز ەلىمىزدەن بولەك, حالىقارالىق بەدەلدى ارەنالاردا ءساتتى ونەر كورسەتىپ ءجۇر.
ۇستەل تەننيسىنىڭ بەلسەندى دامۋى قاسىم-جومارت توقاەۆ فەدەراتسيا پرەزيدەنتى بولىپ سايلانعاننان كەيىن بايقالدى. مەملەكەت باسشىسى ۇلتتىق ۇستەل تەننيسى فەدەراتسياسىن 13 جىلدان اسا باسقارعان ۋاقىتتا ەلىمىزدە بۇل سپورت ءتۇرى ايتارلىقتاي دەڭگەيگە كوتەرىلدى. ستاتيستيكالىق مالىمەتتەرگە سۇيەنسەك, بۇگىندە ەلىمىزدە ۇستەل تەننيسىمەن 200 مىڭنان استام ادام اينالىسادى. ونىڭ ىشىندە جەتى مىڭعا جۋىعى تۇراقتى تۇردە شۇعىلدانادى.
پرەزيدەنت قاسىم-جومارت توقاەۆ وقۋشى كەزىندە ۇستەل تەننيسىنەن سپورت شەبەرلىگىنە ۇمىتكەر اتانعان. اقش-تىڭ بۇرىنعى پرەزيدەنتى باراك وباما ۇستەل تەننيسىنىڭ ناعىز شەبەرى بولعان. الەمدىك فۋتبول ويىنىنىڭ جارىق جۇلدىزى كريشتيانۋ رونالدۋ دا وسى سپورت ءتۇرىن ومىرلىك سەرىگى ەتكەن. كاسىبي بوكسشىلاردىڭ كوپشىلىگى وسى ويىن ارقىلى شاپشاڭ قيمىلداۋ تاسىلدەرىن جەتىلدىرىپ وتىرادى ەكەن. ۇستەل تەننيسىنىڭ ادام اعزاسىنا جاعىمدى اسەرى مول. اسىرەسە قىتاي حالقى شاعىن تاقتاداعى جارىستىڭ جاي عانا ويىن ەمەس, جىلدام ويلاۋ سايىسى ەكەنىن جاقسى پايىمداعان. سوندىقتان بۇل سپورت ءتۇرىن مەكتەپ باعدارلاماسىنا ەنگىزگەن. ۇستەل تەننيسىمەن شۇعىلدانعان بالانىڭ دەنى ساۋ بولىپ, ءوزىن سەرگەك سەزىنەدى ءارى ساباق ۇلگەرىمى جاقسارادى. بۇل ويىندى بۇقارالىق ماقساتتا دامىتقان قىتاي ەلىنىڭ دەنساۋلىق پەن سپورتتا قانشالىقتى العا كەتكەنى بەلگىلى. ولار ۇستەل تەننيسى ارقىلى ۇلت ساۋلىعىن نىعايتۋعا بولادى دەگەن بەرىك سەنىمدە.
ۇستەل تەننيسى – شاپشاڭدىقتى, ەپتىلىكتى, زەيىندىلىكتى دامىتاتىن, دەنە مەن اقىل-وي ۇيلەسىمىن تالاپ ەتەتىن, كەز كەلگەن جاستاعى ادام ويناي الاتىن سپورت ءتۇرى. اۋلادا, مەكتەپتە, مادەنيەت ۇيلەرىندە ۇيىمداستىرۋعا وڭاي, كوپ قارجى مەن ورىن تالاپ ەتپەيدى. ونى دامىتۋ ماڭىزى سپورتتىق جەتىستىكپەن عانا ەمەس, حالىق دەنساۋلىعى مەن جاستار تاربيەسىمەن دە تىعىز بايلانىستى. بالالار مەن جاسوسپىرىمدەردىڭ ينتەللەكتۋالدىق, فيزيكالىق دامۋىنا جاقسى اسەر ەتەدى. قوزعالىس از قوعامدا دەنساۋلىقتى نىعايتىپ, اۋرۋ-سىرقاۋدىڭ الدىن الۋعا كومەكتەسەدى.
ەلىمىز كولەمىندە ۇستەل تەننيسىنەن ءتۇرلى تۋرنير تۇراقتى ءوتىپ تۇرادى. سونىڭ ءبىرى – وسى سەنبى, جەكسەنبى كۇندەرى استانا, قاراعاندى قالالارىندا وتەتىن ەلىمىزدىڭ اشىق كوماندالىق چەمپيوناتىنىڭ ءىى تۋرىنىڭ ماتچتارى. سايىستار سۋپەر, ەكىنشى, ءۇشىنشى ليگالار بويىنشا ۇيىمداستىرىلادى. ءبىز بۇل ويىنداردىڭ قورىتىندىسى جونىندە ارنايى جازاتىن بولامىز.
