دەنساۋلىق ساقتاۋ سالاسىنىڭ 68 وكىلى «بارىس», «پاراسات», «دوستىق», «قۇرمەت» وردەندەرىمەن, سونداي-اق «ەرەن ەڭبەگى ءۇشىن», «شاپاعات» مەدالدارىمەن ماراپاتتالدى.
«قازاقستاننىڭ ەڭبەك سىڭىرگەن دارىگەرى» قۇرمەتتى اتاعىن ەل الدىنداعى ەرەكشە ەڭبەگى ءۇشىن بيىل 8 دارىگەر يەلەندى.
2024 جىلى پرەزيدەنت قاسىم-جومارت كەمەل ۇلى توقاەۆتىڭ باستاماسىمەن دارىگەرلەردى كەشەندى — زاڭدى, قارجىلىق جانە كاسىبي قورعاۋعا باعىتتالعان زاڭ قابىلداندى.
وتكەن جىلدان باستاپ مەملەكەت باسشىسى «قازاقستاننىڭ ەڭبەك سىڭىرگەن دارىگەرى» قۇرمەتتى اتاعىن تاعايىندادى, ول دارىگەرلەرگە دەگەن ەرەكشە قۇرمەت سيمۆولىنا اينالدى.
بۇگىن مەديتسينا قىزمەتكەرلەرىن سالتاناتتى ماراپاتتاۋ راسىمىندە سويلەگەن سوزىندە پرەزيدەنت سوڭعى بەس جىلدا دەنساۋلىق ساقتاۋ سالاسىنداعى جالاقى ەكى ەسەگە جۋىق وسكەنىن اتاپ ءوتتى. بەيىندى ۋنيۆەرسيتەتتەر مەن كوللەدجدەردە ستيپەنديالار ۇلعايدى. سونداي-اق بىلىكتى دارىگەرلەردە تالىمگەرلىكتى ۇيىمداستىرۋ جانە جاس مامانداردى ودان ءارى بەيىمدەۋ ءۇشىن بارلىق قاجەتتى جاعدايلار جاسالىپ جاتىر.
بيىلعى جىلى «قازاقستاننىڭ ەڭبەك سىڭىرگەن دارىگەرى» قۇرمەتتى اتاعىنا 8 دارىگەر يە بولدى, ونىڭ ىشىندە: تۇرسىنگۇل كوبجاسارقىزى بوتابەكوۆا, «قازاقستاندىق وفتالمولوگتار قوعامى» رقب پرەزيدەنتى, ورىنباي دايىربەك ۇلى دايىربەكوۆ, «قازاق ونكولوگيا جانە راديولوگيا عىلىمي-زەرتتەۋ ينستيتۋتى» اق ديرەكتورلار كەڭەسىنىڭ مۇشەسى, جاقسىلىق اقمىرزاي ۇلى دوسقاليەۆ, ەڭبەك ارداگەرى, ازامات بەلگىباي ۇلى ماعزۇموۆ, سولتۇستىك قازاقستان وبلىسى اكىمدىگى دەنساۋلىق ساقتاۋ باسقارماسىنىڭ «كوپبەيىندى وبلىستىق اۋرۋحانا» كمك تەراپەۆت دارىگەرى, سەرگەي لۆوۆيچ نوۆيچەۆسكي,
پاۆلودار وبلىسى دەنساۋلىق ساقتاۋ باسقارماسىنىڭ «№ 1 پاۆلودار وبلىستىق پەريناتالدىق ورتالىعى» كمك بولىمشە مەڭگەرۋشىسى , جەكشەمباي نسانوۆ, اتىراۋ وبلىسىنىڭ ەڭبەك ارداگەرى, ايسلۋ ساعاداتقىزى نۇرماعامبەتوۆا, «MedLineسەرۆيس» مەديتسينالىق ورتالىعىنىڭ وتورينولارينگولوگ دارىگەرى, اسىلبەك توقمىرزاي ۇلى توگيزباەۆ, «دەرتكە داۋا» جشس كلينيكاسىنىڭ ديرەكتورى.
بۇگىنگى تاڭدا رەسپۋبليكانىڭ دەنساۋلىق ساقتاۋ جۇيەسىندە 280 مىڭنان استام مەديتسينا قىزمەتكەرى, ونىڭ ىشىندە 80 مىڭنان استام دارىگەر مەن 190 مىڭ مەيىرگەر جۇمىس ىستەيدى.
