ەلىمىزدە كولىك ينفراقۇرىلىمىن باسقارۋ ىسىنە تسيفرلىق تەحنولوگيالار بەلسەندى تۇردە ەنگىزىلۋدە. بۇل باعىتتا قازاق جول عىلىمي-زەرتتەۋ ينستيتۋتى (قازجولعزي) كوپىرلەردىڭ تەحنيكالىق جاي-كۇيىن دياگنوستيكالاۋ, باقىلاۋ جانە بولجاۋ بويىنشا مالىمەتتەردى قامتيتىن بىرىڭعاي تسيفرلىق پلاتفورمانى – كوپىرلەردى پايدالانۋ جانە باسقارۋ جۇيەسىن ىسكە قوسقان. 2023 جىلدان باستاپ جوبا اياسىندا پاۆلودار, ورال جانە استانا اينالما جولدارى سىندى كۇردەلى قۇرىلىمداردى قوسا العاندا, 100-دەن استام كوپىر تەكسەرىلدى. بۇگىندە ولاردىڭ ۇشولشەمدى تسيفرلىق كوشىرمەلەرى ازىرلەنىپ, قۇرىلىمداردىڭ جاي-كۇيىن قاشىقتان باقىلاۋعا جانە تاۋەكەلدەرگە جەدەل دەن قويۋعا مۇمكىندىك بەرىپ وتىر. اعىمداعى جىلى تاعى 60 كوپىر تەكسەرىلىپ, تسيفرلىق كوشىرمەسى جاسالادى.
«جۇيە رەاكتيۆتى قىزمەت كورسەتۋدەن پرواكتيۆتى باسقارۋعا كوشۋگە جول اشادى. ەل اۋماعىندا بىرىڭعاي تسيفرلىق بازا قۇرىلىپ, تەكسەرۋ ناتيجەلەرى بىرىكتىرىلۋدە. سونىمەن قاتار ەنگىزىلىپ جاتقان باقىلاۋدىڭ اۆتوماتتاندىرىلعان ادىستەرى كوپىرلەردىڭ قاۋىپسىزدىگى مەن كۇتىمىنە دەگەن كوزقاراستى تۇبەگەيلى وزگەرتەدى», دەيدى «قازجولعزي» كوپىر جانە جول قۇرىلىستارى باسقارماسىنىڭ باسشىسى شالقار قايسار.
جوبا اياسىندا: قولجەتىمسىز جانە ءىرى كولەمدى نىسانداردى قوسا العاندا, كوپىرلەردى ۆيزۋالدى تەكسەرۋ ءۇشىن پيلوتسىز ۇشۋ اپپاراتتارىن قولدانۋ; تەحنيكالىق جاي-كۇيدى باقىلاۋ مەن تالداۋ ءۇشىن ۇشولشەمدى تسيفرلىق مودەلدەردى ازىرلەۋ; پايدالانۋ جاي-كۇيىن باعالاۋ ادىستەمەلەرى مەن مونيتورينگ جۇيەلەرىن قۇرۋ قاعيداتتارىن قامتيتىن نورماتيۆتىك-تەحنيكالىق قۇجاتتاردى دايىنداۋ سياقتى نەگىزگى شارالار اتقارىلىپ جاتىر. بيىلدان باستاپ قوزعالىستى توقتاتپاي-اق جەدەل دياگنوستيكا جۇرگىزەتىن ءموبيلدى ەكسپرەسس-مونيتورينگ جۇيەسى ەنگىزىلمەك. بۇل جۇمىستاردىڭ بارىسى كولىك مينيسترلىگىنىڭ اۆتوموبيل جولدارى كوميتەتىنىڭ باقىلاۋىندا. الداعى ۋاقىتتا جۇيە رەسپۋبليكالىق ماڭىزى بار بارلىق كوپىرلەردى قامتىپ, ينفراقۇرىلىمدى اشىق, ناقتى ءارى ءتيىمدى باسقارۋعا ىقپال ەتۋى ءتيىس.
قازىرگى كۇنى رەسپۋبليكامىزدا 3500-دەن استام كوپىر پايدالانىلادى. ولاردىڭ ەداۋىر بولىگى وڭىرلىك جانە جەرگىلىكتى جولداردا ورنالاسقان. كوپشىلىگىنىڭ پايدالانۋ مەرزىمى شەگىنە جەتكەنىن جانە تۇراقتى تەكسەرۋ مەن تەحنيكالىق باقىلاۋدى قاجەت ەتەتىنىن ەسكەرۋ كەرەك.
