– ءوندىرىستىڭ بۇل ءتۇرى بىزدە دامىماعان. كوبىنە تەحنيكالىق قۇرالدار جانە بالالاردى دامىتۋعا ارنالعان ءارتۇرلى ترەناجەر زاتتارى شەتەلدە شىعارىلادى. سونى نەگە وزىمىزدە وندىرمەسكە دەگەن وي كەلدى. قازىر ءبىز 15-تەن ارتىق ءونىم شىعارىپ جاتىرمىز, – دەيدى جوبا جەتەكشىسى دوسىم ەربولات ۇلى. جيھازداردى دەفەكتولوگ, ءىت ماماندارى, تەحنيكتەر بىرلەسىپ جاسايدى. وتاندىق ءونىمنىڭ ەڭ باستى ارتىقشىلىعى, ەكونوميكالىق جاعىنان ارزان. ماسەلەن, شەتەلدىك ۆەرتيكاليزاتور ورىندىعى 2,5 ملن تەڭگە تۇرسا, بۇل ورتالىقتا ونىڭ قۇنى – بار بولعانى 450 مىڭ تەڭگەنىڭ اينالاسىندا.
– ورتالىقتا كرەسلو ۆەرتيكاليزاتور, وقۋ پارتاسى, رەتتەلەتىن ورىندىق, توسەك ۆەرتيكاليزاتورى جاسالدى. ماڭىزدىسى, ءبىز تۇتىنۋشىعا سەرۆيستىك قىزمەت كورسەتەمىز. مىسالى, شەتەلدەن اكەلىنگەن قۇرال بالا ءۇشىن ىڭعايسىز بولسا, ونى ەشكىم رەتتەي الماۋى مۇمكىن. بىزدەن ساتىپ السا, ءوزىمىز رەتتەپ بەرەمىز. وزگەرتۋ كەرەك بولسا, مودەرنيزاتسيا قاجەت بولسا پايدالانۋشىنىڭ قالاۋىمەن وزگەرتەمىز, – دەيدى دوسىم ەربولات ۇلى.
ەرەكشە ءبىلىم بەرۋ قاجەتتىلىكتەرى بار بالالاردى قولداۋعا ارنالعان تەحنيكالىق قۇرىلعىلار بويىنشا 5 پاتەنت, ينتەراكتيۆتى ترەناجەرلەر مەن ادىستەمەلىك ازىرلەمەلەر بويىنشا 14 اۆتورلىق كۋالىك الىنعان. ورتالىقتا 6 تۇراقتى قىزمەتكەر جۇمىس ىستەيدى. قوسىمشا ستۋدەنتتەر مەن ماگيسترانتتار دا تارتىلعان. جاس مامانداردىڭ ءبىرى – اسحات ماقسۇت ۇلى. ول جيھازدىڭ ەڭ العاشقى نۇسقاسىن كومپيۋتەردە سىزىپ, ءار بولشەكتىڭ دالدىگىن قاداعالايدى. ءۇش جاسقا دەيىنگى بالاعا ءبىر سحەما, ءۇش جاستان جوعارى بالالارعا باسقا سىزبا قولدانىلادى ەكەن. دايىن سىزبا لازەرلىك اپپاراتتا بولشەكتەرگە كەسىلىپ, وڭدەۋ بولىمىنە, سودان سوڭ قۇراستىرۋعا جىبەرىلەدى.
– ءبىزدىڭ تسەح مەملەكەتتىك ساتىپ الۋ بويىنشا جۇمىس ىستەيدى. قازىر وندىرىستە 25 جۇمىسشى بار. 3 جاسقا دەيىنگى, 3–6 جاستاعى سابيلەرگە ارنالعان جيھازدار قۇراستىرىلىپ جاتىر, – دەيدى «ساڭىراۋلاردىڭ قازاق قوعامى» قب فيليالى «شىعىس قازاقستان وبلىستىق ۇيىمى» ديرەكتورىنىڭ ورىنباسارى تولەۋعازى بەكقوجين.
جوباداعى سۇرانىسقا يە ونىمدەردىڭ ءبىرى – ۆەرتيكاليزاتور ورىندىعى. بۇل – تىرەك-قيمىل اپپاراتى بۇزىلعان, ونىڭ ىشىندە سال اۋرۋىنا شالدىققان بالالاردى وتىرعىزۋعا, جاتقىزۋعا جانە تىگىنەن تۇرعىزۋعا ارنالعان قۇرىلعى. ەلىمىزدە بالاماسى جوق لوگوپەديالىق ۇستەلگە سەنسورلى مونوبلوك, ينتەراكتيۆتى پانەل, لوگوپەديالىق اينا, ادىستەمەلىك ماتەريالدار مەن كارتوچكالار كىرەدى. جيناقتا دىبىستاردى اۆتوماتتاندىرۋ, فونەماتيكالىق قابىلداۋدى, ەستە ساقتاۋ, ويلاۋ جانە ماتەماتيكالىق داعدىلاردى دامىتۋعا باعىتتالعان 500-دەن استام تاپسىرما بار. شەتەلدىك انالوگتەرىنىڭ قۇنى 3 ملن تەڭگەدەن اسسا, بۇل كەشەننىڭ تولىق جيناعى – وسكەمەندە 1,8 ملن تەڭگە. قۇرىلعى وبلىستىڭ بىرنەشە مەكتەبىندە سىناقتان وتكەن. جۋىقتا ۇلان اۋدانىنداعى ءبىلىم وردالارىنىڭ بىرىنە بەرىلدى. قازىر بۇل ورتالىقتا 75 بالا ءدارىس الىپ جاتىر.
بايقاعانىمىزداي, ونىمدەر باسەكەگە قابىلەتتى. ادەپكىدە ورتوپەديالىق ورىندىقتار جاسالدى. كەيىن عالىمدار بارلىق بالانىڭ ومىرتقاسى ءتۇزۋ بولمايتىنىن ەسكەرىپ, 90 گرادۋس بۇرىشپەن وتىرا المايتىنىن تۇسىنگەن. وسىدان كەيىن تىگىنەن ۇستايتىن ارنايى كرەسلو ۆەرتيكاليزاتور جاساپ شىعارۋعا كوشتى. سودان سوڭ ۆەرتيكاليزاتور-كەرەۋەت جاسالدى. وسىلايشا, ورتالىقتا ءونىم ءتۇرى كوبەيدى.
ايتقانداي, اعاشتان جاسالعان ويىن قۇرالدارى دا وسى جەردە ازىرلەنەدى. بۇل ەڭ الدىمەن ەكولوگيالىق تازا ءونىم, ەكىنشىدەن – تابيعي, ۇشىنشىدەن – بالالارعا وتە قىزىق. مىسالى, بالانسير سىندى سەنسورلىق ويىندار بالانىڭ اقىل-ويىن, قوزعالىس ۇيلەسىمدىلىگىن دامىتادى. اعاشتان جاسالعان «ساندار قۇرامى» اتتى وقۋ قۇرالى سانداردى ۇيرەتۋدىڭ ەرەكشە ءادىسىن نەگىزگە العان. كورۋ قابىلەتى ءالسىز بالالار بۇل زاتتاردى ساۋساقپەن سيپاپ, ولاردىڭ فورماسى مەن بەينەسىن سەزىنە الادى. مىنە, وسىنداي بارلىق قۇرال-جابدىق ەرەكشە بالالارعا كومەك رەتىندە ارنايى ازىرلەنىپ جاتىر.
شىعىس قازاقستان وبلىسى
