قوس سپورتشى سپورتتىڭ ەڭ اۋىر ءارى كۇردەلى ءتۇرى پاۋەرليفتينگتەن ەل نامىسىن قورعاپ, تورتكۇل دۇنيەنى تامساندىرىپ كەلەدى. جاقىندا نورۆەگيانىڭ دراممەن قالاسىندا پاۋەرليفتينگتەن الەم چەمپيوناتى ءوتتى. بايراقتى باسەكەگە الەمنىڭ 14 ەلىنەن 1400-دەن استام زىلتەمىرشى قاتىسىپ, ءوزارا مىقتىنى انىقتادى. وسى چەمپيوناتتا اكەلى-بالالى سپورتشىلار ەل بايراعىن كوككە كوتەردى.
ءدارىباي قارامان ۇلى دودادا 70 جاستان اسقان ارداگەرلەر اراسىندا, 93 كيلوعا دەيىنگى سالماق دارەجەسىندە ونەر كورسەتتى. ناتيجەسىندە, پاۋەرليفتينگتىڭ كلاسسيكالىق تۇرىنەن قولا, ارنايى جابدىقپەن كوتەرۋدەن التىن مەدال ەنشىلەدى. وسىلايشا, ارداگەردىڭ حالىقارالىق جارىستاردان العان مەدال سانى 22-گە, الەم بىرىنشىلىگىنەن العان جۇلدە سانى 10-عا جەتتى. ونىڭ بەسەۋى التىن, تورتەۋى كۇمىس, بىرەۋى قولا جۇلدە. وسى ۋاقىتقا دەيىن ازيادان ون التىن, ەكى كۇمىس مەدال ەنشىلەپتى.
ۇلى ابدۋلكارىم قارامان دا چەمپيوناتتا قوس التىنعا قول جەتكىزدى. سپورتشى ءوز سالماعىندا جارىستىڭ كلاسسيكالىق تۇرىنەن 190 كيلوگراممدى باعىندىرىپ, قارا ءۇزدى. ارنايى جابدىقپەن كوتەرۋ اتالىمىندا دا 245 كگ كوتەرىپ, قارسىلاستارىنا ەش مۇمكىندىك بەرمەدى.
– ابدۋلكارىم وسى چەمپيوناتتا حالىقارالىق تورەشىلەر قاۋىمداستىعىنىڭ قاتارىنا ەنىپ, تورەشىلىك ەتتى. ءارى ءوزى دە سايىسقا ءتۇسىپ, قوس التىننىڭ يەگەرى اتاندى. ۇلىم شەتەل جارىستارىندا 20 مەدال ەنشىلەگەن. الەم چەمپيوناتىنان جەتى التىن, جەتى كۇمىس, ازيا بىرىنشىلىگىنەن التى التىن تاققان, – دەيدى ءدارىباي قارامان ۇلى.
ايتا كەتەيىك, ۇلتتىق قۇراما سپورتشىلارى قوس سايىستا دا جالپىكوماندالىق ەسەپتە كوش باستادى. ەرلەر اراسىندا سىنعا تۇسكەن اقتاۋلىق اسقار شوقانوۆ ابسوليۋتتىك چەمپيون اتاندى.
ءدارىباي اقساقال الەمدىك رەكوردتى قايتالاعان سپورتشى. ءوز سالماق دارەجەسىندە 180 كگ زىلتەمىر كوتەرگەن. 56 جاسىنان باستاپ پاۋەرليفتينگكە دەن قويعان اقساقال ازيا بىرىنشىلىگىندە گونكونگ, فيليپپين, ۇندىستانعا باردى. الەمدىك بىرىنشىلىكتە اقش, چەحيا, جاپونيا تورىندە ونەر كورسەتتى.
– مەن ينجەنەر-گەودەزيست بولىپ جۇمىس ىستەدىم. قۇبىر تارتىپ دالادا جۇرگەندە بوس پلاستماسسا قۇتىلارعا قۇم تولتىرىپ, كوتەرىپ جاتتىعاتىن ەدىم. سودان الەمدىك دەڭگەيگە شىقتىم. العاش رەت 2008 جىلى گونكونگتەگى ازيا بىرىنشىلىگىندە كۇمىس جۇلدەگەر اتاندىم. ودان كەيىن فيليپپيندە التىن الدىم. 2012 جىلى اقش-تا كۇمىس يەلەنىپ, حالىقارالىق دارەجەدەگى سپورت شەبەرى نورماسىن ورىندادىم, – دەيدى د.وسپانوۆ.
وسىدان ەكى جىل بۇرىن پرەزيدەنت قاسىم-جومارت توقاەۆ اقوردادان اقادىرداعى پاۋەرليفتينگ چەمپيونى ءدارىباي وسپانوۆقا ارنايى تارتۋ-تارالعى بەرىپ جىبەرگەن ەدى. العىس حات پەن ارنايى تارتۋدى ءوڭىر باسشىسى ەرماعانبەت بولەكپاەۆ تابىستادى. پرەزيدەنت چەمپيونعا العىسحاتپەن بىرگە ەستەلىك ساعات, بۋراباي شيپاجايىنا جولداما سىيلادى. وبلىس اكىمدىگى دە چەمپيوندى قۇر قول جىبەرمەي, اقادىردىڭ سپورت مەكتەبىنە حالىقارالىق دەڭگەيدەگى شتانگا جيىنتىعىن الاتىن 10 ملن تەڭگە سەرتيفيكات تارتۋ ەتتى.
قاراعاندى وبلىسى
