ەندى ەكى الپاۋىتتىڭ اراسىندا سوعىس ءورتى تۇتانۋى مۇمكىن دەپ جاتىر الەمدىك باق-تار. ىسكە يزرايل ارالاسۋى مۇمكىن. قازىردىڭ وزىندە يزرايل يرانعا اسكەري سوققى جاساۋى مۇمكىن دەگەن اقپاراتتار كەڭىستىكتە كوبەيە ءتۇستى. بۇل راسقا اينالۋى ابدەن مۇمكىن..
اقش مەمدەپارتامەنتى يراك, باحرەين جانە كۋۆەيتتەگى ەلشىلىكتەردەن قىزمەتكەرلەردىڭ كەتۋىن ۇيىمداستىرۋعا تاپسىرما بەرگەن. اقش قورعانىس ءمينيسترى پيت حەگسەت بۇل ەلدەردەن اسكەري قىزمەتكەرلەردىڭ وتباسى ءوز ەرىكتەرىمەن كەتۋى ءتيىس دەپ ەسەپتەيدى.
سارسەنبى كۇنى كەننەدي ورتالىعىندا ءسوز سويلەگەن اقش پرەزيدەنتى دونالد ترامپ «امەريكالىقتار بۇل وڭىرلەردەن كەتۋى ءتيىس, ويتكەنى بۇل قاۋىپتى ورىن بولۋى مۇمكىن, نە بولاتىنىن كورەمىز» دەپ پىكىر ءبىلدىردى.
وسىنداي گەوساياسي قىسىم جاعدايىندا Brent ماركالى مۇناي باعاسى 4,3 پايىزعا قىمباتتاعان. ءسويتىپ, 69,8 دوللارعا جەتتى. بۇل ارينە, ءبىز ءۇشىن ءتيىمدى.
قازاقستاننىڭ بيۋدجەتى مۇنايدان تۇسەتىن تابىسقا تىكەلەي تاۋەلدى. بىراق ءبىز ءۇشىن الەمدەگى احۋالدىڭ وڭتايلى بولعانى دا ءتيىمدى. ونىڭ ۇستىنە, قازاقستان سوڭعى كەزدەرى يرانمەن ديپلوماتيالىق, ساۋدا قاتىناستارىن دا كۇشەيتۋگە ۇمتىلىپ جاتىر.
ديلناز دۇكەنباي,
ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتى
