قازاقستان – ينتەرنەت-كونتەنتتى وقشاۋلاۋ بويىنشا وڭىردەگى كوشباسشىلاردىڭ ءبىرى. الايدا قازاقستاندىق سايتتاردىڭ باسىم بولىگى ءالى دە رەسەيلىك سەرۆەرلەردە ورنالاستىرىلادى. ودان كەيىن ەۋروپا مەن اقش تۇر. ينتەرنەتتىڭ تۇراقتىلىعى مەن قاۋىپسىزدىگىن قامتاماسىز ەتۋ ءۇشىن قازاقستان تەك ءوزى ءۇشىن عانا ەمەس, بۇكىل ءوڭىر ءۇشىن دە تسيفرلىق تاۋەلسىزدىكتى جەدەلدەتۋى قاجەت.
Digital Business سايتىنىڭ جازۋىنشا, ەلىمىزدىڭ حالىقارالىق ينتەرنەت-ترافيگىنىڭ 95%-ى رەسەي ارقىلى وتەدى. بۇل اسىرەسە ءوسىپ كەلە جاتقان كۇردەلى گەوساياسي جاعدايدا ايماقتىڭ بارلىق تسيفرلىق ينفراقۇرىلىمىن وسال ەتۋى مۇمكىن.
«ەگەر قانداي دا ءبىر سەبەپتەرمەن رەسەي بايلانىستى شەكتەۋگە نەمەسە وشىرۋگە شەشىم قابىلداسا, قازاقستان مەن ونىڭ كورشىلەرىنىڭ تولىققاندى ينتەرنەتسىز قالۋ قاۋپى بار. سول سياقتى قىتاي, يران نەمەسە اۋعانستان ارقىلى كەلەتىن بالامالى بايلانىس جولدارى دا قاۋىپسىز ەمەس نەمەسە ونى تسەنزۋراسى جوعارى مەملەكەتتەر باقىلايدى», دەپ ەسكەرتەدى ماماندار.
حالىقارالىق ەسەپتە تسيفرلىق تاۋەلسىزدىكتى ارتتىرۋ جولدارى ۇسىنىلعان. اتاپ ايتقاندا, شالعاي اۋداندار ءۇشىن تومەن وربيتادا سپۋتنيكتىك بايلانىستى دامىتۋ, كاسپي تەڭىزى ارقىلى سۋاستى كابەلدەرىن توسەۋ مەن دەلدالدارسىز ەۋروپاعا شىعۋ, مازمۇن مەن قىزمەتتەر ەل ىشىندە جۇمىس ىستەۋى ءۇشىن جەرگىلىكتى دەرەكتەر ورتالىقتارى مەن ينتەرنەت-پروۆايدەرلەردى قولداۋ, سىرتقى ترافيككە تاۋەلدىلىكتى ازايتۋ ءۇشىن اشىق ينتەرنەت-بيرجالار قۇرۋ جونىندە كەڭەس بەرىلگەن.
