70 جىلدىق تاريحى بار كوللەدجدەن باستاۋ العان ساپتىق شەرۋدە تەحنيكا تىزگىندەگەن ستۋدەنتتەر مەن وقىتۋشىلار كوش باستاپ, اۋىلدىق اكىمدىكتىڭ الاڭىنا دەيىنگى كوشەلەرمەن ءجۇرىپ ءوتتى. ونداعى ماقسات – كاسىپتىك ماماندىققا دەگەن قوعامنىڭ وڭ كوزقاراسىن قالىپتاستىرىپ, مارتەبەسىن ءوسىرۋ. سونىمەن قاتار ءىس-شارا بارىسىندا ارنايى ماماندىقتار كورمەسى ۇيىمداستىرىلىپ, كاسىپتىك سالانىڭ قىر-سىرىنا قانىقتىردى.
«ەڭبەكپەن تاپقان نان ءتاتتى. پرەزيدەنتىمىز قاسىم-جومارت توقاەۆتىڭ وسى جىلدى «جۇمىسشى ماماندىقتار جىلى» دەپ جاريالاۋى ەڭبەك ادامىنىڭ بەدەلىمەن قاتار, قۇلشىنىسىن ارتتىرىپ وتىر. بۇگىندە دانەكەرلەۋشى مەن سانتەحنيك, ەلەكتريك پەن تراكتورشىلارعا سۇرانىس جوعارى. ۇيىمىزدە سۋ جارىلىپ, جارىق سونسە, وسى مامانداردى شاممەن ىزدەپ كەتەمىز. سوندىقتان جاستارعا جول سىلتەپ, ماماندىق تاڭداۋىنا باعىت-باعدار بەرىپ وتىرعان كوللەدج ۇجىمىنا العىسىمىز زور», دەيدى شەلەك اۋىلدىق ارداگەرلەر كەڭەسىنىڭ توراعاسى ابىلبەك ايتاقىنوۆ.
ستراتەگيالىق باعىت-باعدارىندا بەلگىلەنگەن «Worldskills» ستاندارتتارى بويىنشا ءبىلىم بەرۋ باعدارلامالارىن ەنگىزۋ, الەۋمەتتىك ارىپتەستىكتى كەڭەيتۋ, وقۋ ءۇردىسىنىڭ تراەكتورياسىن قالىپتاستىرۋ بويىنشا جۇمىس بەرۋشىلەرمەن تىعىز قارىم-قاتىناس ورناتۋ, وقىتۋشىلار مەن وندىرىستىك وقىتۋ شەبەرلەرىنىڭ بىلىكتىلىگىن ارتتىرۋ, سونداي-اق وقۋ-تاربيە ءۇردىسىن تسيفرلاندىرۋ سىندى بىرقاتار يگى باستاما جولعا قويىلىپ, ونىڭ العاشقى جەتىستىكتەرى دە جارقىراي كورىنە باستاعان.
«كوللەدج ستۋدەنتتەرى وندىرىستىك تاجىريبەدەن ءوتىپ, ودان ءارى جۇمىسقا ورنالاسۋىن قامتاماسىز ەتۋ ءۇشىن بىرقاتار ەڭبەك ۇجىمدارىمەن, اتاپ ايتساق, «قازپوشتا», «قازاقتەلەكوم», «ورمان شارۋاشىلىعى» سىندى ءىرى مەكەمەلەرمەن قاتار, باسقا دا شارۋا قوجالىقتارىمەن, جەكە كاسىپ يەلەرىمەن الەۋمەتتىك سەرىكتەستىكتى ارتتىرىپ كەلەمىز. بيىل الەۋمەتتىك سەرىكتەستىكتەر سانى 33-كە جەتتى. سونىڭ ىشىندە «جەتىسۋ ۆولفرام» زاۋىتى بار. ەكى جىلدان بەرى ستۋدەنتتەردىڭ 30 پايىزى, ياعني گازەلەكتردانەكەرلەۋشى, ەلەكترمونتەرى, تراكتوريست-ماشينيست سىندى ماماندىقتى مەڭگەرۋشى ستۋدەنتتەر وندىرىستىك تاجىريبەدەن وتەدى. ستۋدەنتتەرىمىز «Worldskills-2025» ايماقتىق چەمپيوناتىنا قاتىسىپ, بەس جۇلدەلى ورىندى جەڭىپ الدى. بۇل – ۇلكەن جەتىستىك», – دەگەن كوللەدج ديرەكتورى قۋات قۇرمانعالي ۇلى سالتاناتتى ءىس-شارا اياسىندا بىرقاتار مەكەمەلەر باسشىلارىمەن ءوزارا ىنتىماقتاستىق تۋرالى مەموراندۋمعا قول قويدى.
ايتا كەتەرلىگى, 2021 جىلى كۇردەلى جوندەۋدەن وتكەن كوللەدجدە ينفراقۇرىلىم تولىقتاي جاڭارعان. 240 ورىندىق جاتاقحانا جارقىراي جاسالعان. اۋماعى تولىقتاي اباتتاندىرىلىپ, كوز تارتارلىق كەيىپكە ەنگەن. بۇعان قوسا, كوللەدجدىڭ ماتەريالدىق-تەحنيكالىق بازاسى نىعايعان, 2 وقۋ كورپۋسى, 21 وقۋ كابينەتى, 6 زەرتحانا, 4 شەبەرحانا, 2 كومپيۋتەرلىك كابينەت, 7 ينتەراكتيۆتى تاقتا, 30 ورىندىق كىتاپحانا جابدىقتالىپ, زاماناۋي اۋديو-بەينە قۇرالدار ورناتىلعان. سول جىلى «جاس مامان» جوباسى شەڭبەرىندە «اۆتوموبيل كولىگىنە تەحنيكالىق قىزمەت كورسەتۋ, جوندەۋ جانە پايدالانۋ» ماماندىعى بويىنشا 277 ملن تەڭگەگە جۋىق سوماعا زاماناۋي جابدىقتار جەتكىزىلىپ ورناتىلعانىن اتاۋ ارتىق ەتپەس. ناتيجەسىندە, ەۋروپالىق زاماناۋي جابدىقتار تولىق قولدانىسقا ەنگەلى بەرى ستۋدەنتتەردىڭ تەحنيكا جوندەۋگە قىزىعۋشىلىعى ارتىپ, كەز كەلگەن اۆتوكولىك بولشەكتەرىن قۇراستىرۋ مەن جاساۋداعى شەبەرلىكتەرى شىڭدالعان.
جەرى قۇنارلى ەڭبەكشىقازاق اۋدانى اگروونەركاسىپ قارقىندى دامىعان. وسىعان وراي, اتالعان ءبىلىم مەكەمەسى الداعى ۋاقىتتا اۋىل شارۋاشىلىعىنا قاتىستى جاڭا ماماندىقتار اشىپ, بىلىكتى جۇمىسشىلار قاتارىن كوبەيتۋگە نيەتتى.
الماتى وبلىسى
