اتالعان جوسپار اياسىندا جالپى قۋاتتىلىعى 26 گيگاۆاتتان اساتىن جاڭا ەنەرگەتيكالىق جوبالاردى كەزەڭ-كەزەڭىمەن ىسكە قوسۋ كوزدەلگەن. بۇل باستاما ەلدەگى قۋات تاپشىلىعىن بولدىرماۋعا, ەنەرگەتيكالىق قاۋىپسىزدىكتى قامتاماسىز ەتۋگە جانە ەنەرگيا جۇيەسىنىڭ تۇراقتىلىعىن ارتتىرۋعا باعىتتالعان.
2024 جىلدىڭ قورىتىندىسىنا سايكەس ەلىمىزدىڭ ءبىرتۇتاس ەلەكتر ەنەرگەتيكالىق جۇيەسىندە (بەەج) ەلەكتر ەنەرگياسىن ءوندىرۋ كولەمى 117,9 ملرد كيلوۆاتت-ساعاتتى قۇرادى. ال تۇتىنۋ كولەمى 119,9 ملرد كيلوۆاتت-ساعاتقا جەتتى. وسى ارالىقتاعى ايىرماشىلىق ەلەكتر قۋاتىنا دەگەن سۇرانىستىڭ ۇلعايىپ كەلە جاتقانىن كورسەتەدى. سونىمەن قاتار, ەلەكتر ەنەرگەتيكاسى سالاسىنداعى جابدىقتاردىڭ ورتاشا توزۋ دەڭگەيى بۇگىندە 56 پايىزدى قۇراپ وتىر. بۇل – جاڭا قۋاتتاردى ەنگىزۋ مەن قولدانىستاعى ستانتسيالاردى جاڭعىرتۋ قاجەتتىگىن ايقىندايتىن نەگىزگى فاكتورلاردىڭ ءبىرى.
ەنەرگەتيكا مينيسترلىگى ازىرلەگەن 2035 جىلعا دەيىنگى ەلەكتر ەنەرگەتيكاسىن دامىتۋ جونىندەگى ءىس-شارالار جوسپارى مىناداي باعىتتاردى قامتيدى:
-
5,5 گۆت – جۇمىس ىستەپ تۇرعان ەلەكتر ستانتسيالارىن جاڭعىرتۋ, رەكونسترۋكتسيالاۋ جانە كەڭەيتۋ ارقىلى;
-
12,4 گۆت – ءارتۇرلى پىسىقتاۋ ساتىسىنداعى جاڭا گەنەراتسيا جوبالارى ەسەبىنەن;
-
3,8 گۆت – ينۆەستورلارمەن بىرلەسىپ ىسكە اسىرىلاتىن ءىرى جاڭارتىلاتىن ەنەرگيا كوزدەرى (جەك) جوبالارى ارقىلى;
-
4,5 گۆت – جەك بويىنشا اۋكتسيون ناتيجەلەرى نەگىزىندە ىسكە قوسىلۋى جوسپارلانعان قۋاتتار.
2024 جىلدىڭ وزىندە مينيسترلىك جالپى قۋاتى شامامەن 2 گيگاۆاتتى قۇرايتىن قوندىرعىلاردى جاڭعىرتۋ, كەڭەيتۋ جانە جاڭارتۋ بويىنشا ەنەرگيا ءوندىرۋشى ۇيىمدارمەن 14 ينۆەستيتسيالىق كەلىسىمگە قول قويدى.
ەنەرگەتيكالىق جوبالاردى ىسكە اسىرۋمەن قاتار, مينيسترلىك دەكاربونيزاتسيا باعىتىنا دا ەرەكشە كوڭىل بولۋدە. 2060 جىلعا دەيىن كومىرتەگى بەيتاراپتىعىنا قول جەتكىزۋ جونىندەگى مىندەتتەمەلەر اياسىندا ەكولوگيالىق تۇرعىدان تازا تەحنولوگيالاردى ەنگىزۋ بويىنشا شەتەلدىك جانە وتاندىق ينۆەستورلارمەن تىعىز ىنتىماقتاستىق ورناتىلىپ جاتىر.
اتالعان شارالار كەشەنى ەلىمىزدىڭ ەلەكتر ەنەرگەتيكاسى جۇيەسىندە تۋىنداۋى مۇمكىن تاپشىلىقتىڭ الدىن الۋعا, قاجەتتى قۋات رەزەرۆىن قالىپتاستىرۋعا جانە ۇزاق مەرزىمدى ەنەرگەتيكالىق تۇراقتىلىقتى قامتاماسىز ەتۋگە مۇمكىندىك بەرەدى. بۇل – ۇلتتىق ەكونوميكانىڭ سەنىمدى وسۋىنە نەگىز بولاتىن باستى باعىتتاردىڭ ءبىرى.
