جاڭا شاعىن اۋداندا العاشقى تۇرعىندارى ۇيلەرىنە قونىستانىپ ۇلگەرىپتى. وتكەن جىلدىڭ سوڭىنا قاراي 15 ەكى پاتەرلى ءۇي, ءبىر 12 پاتەرلى ەكىقاباتتى ءۇي پايدالانۋعا بەرىلدى. ۇيلەردىڭ ءبارى ورتالىق كوممۋنيكاتسيالارعا قوسىلعان. جىلۋ جەلىسى, سۋ قۇبىرى, كارىز, ەلەكتر قۋاتى بار.
مۇنداعى ماقسات – تۇرعىن ءۇي كەزەگىندە تۇرعان الەۋمەتتىك وسال وتباسىلاردى باسپانامەن قامتاماسىز ەتۋ, ولاردىڭ تۇرمىس ساپاسىنىڭ جاقسارۋىنا قولداۋ كورسەتۋ, پاتەر كەزەگىن ازايتۋ. بۇگىندە اۋداندا تۇرعىن ءۇي كەزەگىندە تۇرعان 314 وتباسى بار.
«تۇرعىن ءۇي ماسەلەسىن شەشۋ, تۇرعىنداردى اپاتتى ۇيلەردەن كوشىرۋ ماقساتىندا وتكەن جىلى اقتوعاي اۋىلىنىڭ سولتۇستىك-شىعىسىندا جاڭا شاعىن اۋداننىڭ قۇرىلىسى باستالدى. تۇرعىن ءۇي كەزەكتە تۇرعاندار اراسىندا بولىنەدى. مۇنىمەن قوسا, بىلتىر شاشۋباي كەنتى مەن اقتوعاي اۋىلىندا 120 وتباسى پاتەرگە يە بولىپ, قونىستويىن تويلاعان. قونىس يەلەرىنىڭ اراسىندا جاس ماماندار دا بار», دەيدى اقتوعاي اۋدانىنىڭ اكىمى ابىلاي امانجولوۆ.
اڭساعان قابىحان تۋعان اۋىلىنا كەلىپ, مەكتەپتە ساباق بەرىپ ءجۇر. بيىل جاڭا پاتەرگە قول جەتكىزگەن ونىڭ قۋانىشىندا شەك جوق.
«بۇل كۇندى وتباسىمىزبەن ۇزاق كۇتتىك. ەكەۋمىز دە مەكتەپتە جۇمىس ىستەيمىز. ءوزىم ينفورماتيكا پانىنەن ساباق بەرەمىن, جۇبايىم – باعدارلاماشى. ازىرگە ەكى بالامىز بار. بيىل قاڭتار ايىندا وسى جاڭا ۇيدەگى پاتەرىمىزگە كوشتىك. ءۇي قىستا جىلى, ءومىر سۇرۋگە وتە ىڭعايلى. ۇكىمەتتىڭ قامقورلىعىنا, اۋدان اكىمدىگىنە ءدان ريزامىز», دەگەن قۋانىشىمەن ءبولىستى ا.قابىحان.
«جاڭا ۇيگە بىلتىر 15 جەلتوقساندا كىردىم. قىستا جىلى, جايلى, جارىق. ءوزىم اۋداندىق مانساپ ورتالىعىندا اسسيستەنت بولىپ جۇمىس ىستەيمىن. كەزەكتە 3-4 جىلداي تۇردىم. ءبىر ۇلىم, ءبىر قىزىم بار. ءۇي ۇنادى, مەملەكەتتىك باعدارلامانىڭ مۇمكىندىگىن ۇسىنعان اكىمدىككە العىسىم شەكسىز», دەيدى اقتوعاي كەنتىنىڭ تۇرعىنى, جاڭا پاتەرگە قول جەتكىزگەندەردىڭ ءبىرى ارداق الىبەكقىزى.
بيىل دا مۇندا قۇرىلىس جالعاسىپ جاتىر. تاعى 14 ەكى پاتەرلى ءۇي مەن 12 پاتەرلى ەكىقاباتتى ءبىر ءۇيدى پايدالانۋعا بەرۋ جوسپارلانىپ وتىر. ودان بولەك, ينجەنەرلىك جەلىلەر, اتاپ ايتساق, قازاندىق, سۋ قۇبىرى, كارىز, ەلەكتر جەلىلەرى تارتىلىپ جاتىر. ونىڭ الدىندا تالاپقا ساي ەكەنىنە كوز جەتكىزۋ ماقساتىندا تەكسەرىس جۇرگىزىلەدى.
شاشۋباي, سارىشاعان كەنتتەرىندە دە تۇرعىن ءۇي ماسەلەسى وڭىنان شەشىلىپ كەلەدى. قازىر شاشۋبايدا 70 پاتەرگە قايتا جوندەۋ جۇرگىزىلىپ جاتىر. سارىشاعاندا 12 پاتەرلى ەكىقاباتتى تۇرعىن ءۇيدى جاقىن مەرزىمدە تاپسىرۋ كوزدەلگەن.
«قازىر جۇمىس اياقتالۋعا جاقىن. ورتالىق جىلۋعا بيىل قوسىلادى. پاتەرلەردى الەۋمەتتىك وسال توپ ساناتىنداعى وتباسىلارعا ۇسىنامىز. ۇيلەردى جەكەمەنشىك كومپانيالار سالىپ جاتىر. جەرگىلىكتى بيلىك ساتىپ الىپ, باسپاناعا مۇقتاج وتباسىلارعا بەرەدى. بۇل – ءتيىمدى ءتاسىل. ۇيگە 3 جىلعا كەپىلدىك بەرىلەدى. كەمشىلىك شىقسا, قۇرىلىس كومپانياسىنا ەسكەرتۋ جاسالادى, ولار ءوز تاراپىنان ءتيىستى جۇمىس جۇرگىزەدى. ءبىر شارشى مەتردىڭ باعاسى – 230 000 تەڭگە. 12 پاتەرلىك ەكىقاباتتى ءۇي جالپى 650 شارشى مەتر كولەمىندە. 3 بولمەلى پاتەردىڭ اۋدانى – 58 شارشى مەتر. ياعني قۇنى شامامەن 11–12 ملن تەڭگە. جىلۋ, سۋ, ەلەكتر جۇيەسى تولىقتاي ورتالىقتاندىرىلعان», دەيدى اۋدان اكىمىنىڭ ورىنباسارى ارداگەر قاپاشەۆ.
اۋدانداعى وزەكتى ماسەلەنىڭ ءبىرى – جولداردى جوندەۋ. بىلتىر «اقتوعاي-اقجارىق» جولىنىڭ قۇرىلىسى قولعا الىنعان. بۇگىنگى كۇنى 20 شاقىرىمىنا اسفالت توسەلدى. بيىل تاعى 15 شاقىرىم جول جاڭارتىلادى. ودان بولەك, ماۋسىم ايىندا «اۋىل – ەل بەسىگى» ارنايى جوباسى اياسىندا تانىمال تۋريستىك ورىن بەكتاۋ اتا شاتقالىنا كىرەبەرىس جولدى جوندەۋ باستالادى. شاشۋباي, سارىشاعان, باسقا دا ەلدى مەكەندەردە ورتالىق كوشەلەردى اباتتاندىرۋ جۇرگىزىلىپ, كەنتىشىلىك جولدار جوندەلىپ جاتىر.
قاراعاندى وبلىسى,
اقتوعاي اۋدانى
