تانىستىرىلىمنىڭ اشىلۋىندا ۇلتتىق كينونى قولداۋ مەملەكەتتىك ورتالىعىنىڭ باسقارما توراعاسى قۇرمانبەك جۇماعالي اتالعان كەزەڭنىڭ سالماعىنا توقتالدى.
«بۇگىنگى تانىستىرىلىمدا ساراپتاما كەڭەسى ۇلتتىق كينوعا سۇبەلى ۇلەس قوساتىن جوبالاردى ىرىكتەۋ ءۇشىن بار كۇشىن سالادى دەگەن سەنىمدەمىز. ۇلتتىق كينو – ۇلتتىڭ رۋحاني كەلبەتى. سوندىقتان مەملەكەت قارجىسىنا تۇسىرىلەتىن فيلمدەردىڭ مازمۇنى مەن ساپاسى جوعارى دەڭگەيدە بولۋعا ءتيىس. كينوگەرلەر بۇل جاۋاپكەرشىلىكتى تەرەڭ تۇسىنەدى دەپ ويلايمىز. ءبىز اشىق كونكۋرس وتكىزۋگە مۇددەلىمىز. بارلىق ۇدەرىس ءتيىستى سالا – مادەنيەت جانە اقپارات مينيسترلىگىنىڭ باقىلاۋىندا», دەدى ق.جۇماعالي.
ال ساراپتاما كەڭەسىنىڭ توراعاسى باۋىرجان شوكەنوۆ كاسىبي جانە ءادىل باعالاۋدىڭ ماڭىزىن ەرەكشە اتاپ ءوتتى.
ء«اربىر جوبانى مۇقيات قاراپ, ونىڭ يدەيالىق مازمۇنى مەن دراماتۋرگيالىق ساپاسىن باعالايمىز. مەملەكەتتىك قولداۋعا لايىق, مازمۇنى باي ءارى بولاشاعى زور جۇمىستار ىرىكتەلەدى دەپ ۇمىتتەنەمىز. بارلىق باعالاۋ كەزەڭدەرى بەكىتىلگەن تالاپتارعا ساي ءادىل وتەدى», دەدى ب.شوكەنوۆ.
ەستەرىڭىزگە سالا كەتەيىك, بايقاۋعا ءوتىنىم قابىلداۋ 13 ناۋرىزدا اياقتالدى. بيىل كوركەم, دەرەكتى جانە انيماتسيالىق فيلم سەكتسيالارىندا بارلىعى 444 ءوتىنىم كەلىپ ءتۇستى. ونىڭ ىشىندە 357 جوبا ساراپتاما كەڭەسىنىڭ قاراۋىنا جىبەرىلدى. باعالاۋ ناتيجەسىندە 128 ستسەناري مەن ستسەناري جوسپارى ەكىنشى كەزەڭگە ءوتتى. قۇجاتتاردىڭ تولىق پاكەتىن تاپسىرعان سوڭ 99 جوبا پيتچينگكە جولداما الدى.
