مۇندا تارتىلعان ينۆەستيتسيالاردىڭ جالپى كولەمى 2,1 ملرد تەڭگەنى قۇراعان. كاسىپورىندا 100-گە جۋىق جۇمىس ورنى قۇرىلىپ, وندىرىستىك قۋاتتىلىق جىلىنا 10 ملن بىرلىككە دەيىن ءونىم شىعارۋعا مۇمكىندىك بەرەدى. زاۋىت ونىمدەرى مەديتسينانىڭ ءارتۇرلى باعىتتارىندا — رەانيماتسيا مەن حيرۋرگيادان باستاپ نەوناتولوگيا مەن پەدياترياعا دەيىن سۇرانىسقا يە. «بۇكىل جەلى سەرتيفيكاتتالعان جانە ISO 13485 حالىقارالىق ساپا ستاندارتتارىنا سايكەس كەلەدى» دەيدى ماماندار.
كاسىپورىندا جوبالاۋدان باستاپ كلينيكالىق سىناقتارعا دەيىنگى بارلىق وندىرىستىك كەزەڭدەر قامتىلادى. جالپى اۋدانى 7 000 شارشى مەتر بولاتىن اۋماقتا زاماناۋي وندىرىستىك جەلىلەر, زەرتحانا جانە قويما ءۇي-جايلارى ورنالاسقان. وندىرىستىك ۇدەرىستەرگە ەكسترۋزيا, قىسىممەن قۇيۋ, فرەزەرلەۋ, جيناۋ, وراۋ جانە H14 سىنىپتى تازا ءوندىرىس جاعدايىندا ستەريلدەۋ كىرەدى.
زاۋىت باسشىسى باعلان باككۋلوۆتىڭ ايتۋىنشا, نارىقتا 30 جىلدان استام ۋاقىتتان بەرى جۇمىس ىستەپ كەلە جاتقان كومپانيا بۇگىندە 169 ءتۇرلى ءونىم ءتۇرىن ۇسىنادى. مۇندا شىعارىلاتىن ونىمدەر 2670 مەديتسينالىق ۇيىمعا جەتكىزىلمەك. سونىمەن قاتار, رەسەي, وزبەكستان, قىرعىزستان, تاجىكستان, بەلارۋس, يران جانە اۋعانستان ەلدەرىنە ەكسپورت جۇزەگە اسىرىلىپ جاتىر.
اشىلۋ سالتاناتى اياسىندا مەديتسينا عىلىمدارىنىڭ دوكتورى, اكۋشەرلىك, گينەكولوگيا جانە پەريناتولوگيا عىلىمي ورتالىعى ديرەكتورلار كەڭەسىنىڭ ءتورايىمى زاۋرەش امانجولوۆا زاۋىت ونىمدەرى بۇگىندە بوسانۋ كەزىندە قولدانىلىپ جاتقانىن اتاپ ءوتتى. اتاپ ايتقاندا, كاسىپورىن بۇعان دەيىن وتاندىق نارىقتا قولجەتىمسىز بولعان جاڭا تۋعان سابيلەرگە ارنالعان قىسقىشتاردى ءوندىرۋدى جولعا قويعان.
