بۇل جۇمىستارعا گەولوگيالىق, گيدرولوگيالىق جانە گەودەزيالىق زەرتتەۋلەر, سۋ ءتۇبى مەن جاعا سىزىقتارىن زەردەلەۋ, سۋ ورتاسىنىڭ جاعدايىن تالداۋ سياقتى كەشەندى شارالار كىرەدى. تەكسەرۋ كەزىندە زاماناۋي جانە ساپالى قۇرىلعىلار — گەورادارلار, سونارلار جانە باسقا دا جابدىقتار قولدانىلىپ جاتىر.
بيىلدىڭ سوڭىنا دەيىن سۋ رەسۋرستارى جانە يرريگاتسيا مينيسترلىگى ەلىمىز بويىنشا 134 گيدروتەحنيكالىق نىساندى كوپفاكتورلى تەكسەرۋدەن وتكىزۋدى جوسپارلاپ وتىر. ايتا كەتەيىك, بىلتىر قازاقستاننىڭ 14 وبلىسىندا 84 نىسان تەكسەرىلگەن ەدى. بۇل باستاپقى جوسپاردان دا كوپ بولدى.
«اقمولا فيليالى بۇل جۇمىستاردى بيىل مامىر ايىندا باستاعان. كوپفاكتورلى تەكسەرۋ — بۇل گيدروتەحنيكالىق نىساننىڭ پايدالانىلۋ بارىسىندا قانداي كۇيدە ەكەنىن انىقتاۋ ءۇشىن جۇرگىزىلەتىن تولىق ءارى كەشەندى تالداۋ», – دەدى «قازسۋشار» رمك اقمولا فيليالىنىڭ ديرەكتورى ەربول اسكەربەكوۆ.
