مەرەكەلىك جيىنعا قالا اكىمى عابيت سىزدىقبەكوۆ, قالالىق ءماسليحات توراعاسى باحادىر نارىمبەتوۆ, ارداگەرلەر, زيالى قاۋىم وكىلدەرى, جاستار مەن ءتۇرلى ۇجىم وكىلدەرى قاتىستى.
ايتۋلى ءىس-شارا ءداستۇرلى تۋ كوتەرۋ راسىمىمەن باستالدى. ساپ تۇزەگەن ساربازدار ەلىمىزدىڭ كوك تۋىن, ەلتاڭباسىن شەرۋلەتە ساحنا تورىنە الىپ شىقتى. قازاقستاننىڭ مەملەكەتتىك گيمنى ويناپ, پاتريوتتىق اندەردەن شاشۋ شاشىلدى. ەلىمىزدىڭ كوك تۋىن قولدارىنا ۇستاعان جاستار بويداعى پاتريوتتىق رۋحتى تاسىتتى.
وتستاۆكىدەگى پولكوۆنيك, قارۋلى كۇشتەر ارداگەرلەرى قوعامدىق بىرلەستىگىنىڭ فيليال توراعاسى, 10 قوعامدىق بىرلەستىك كواليتسياسىنىڭ توراعاسى سەرىكباي ونباەۆ ءۇشىن رامىزدەر مەرەكەسى ەرەكشە كۇن. ويتكەنى اسكەري ادام ءۇشىن تۋ, بايراق ارقاشان قاسيەتتى ۇعىم سانالادى.
«4 ماۋسىم – ەلىمىزدىڭ رامىزدەرىنىڭ كۇنى. بۇل مەرەكەنى ەرەكشە اتاپ ءوتۋىمىز كەرەك. سەبەبى ول حالىقتىڭ پاتريوتتىق رۋحىن كوتەرەدى. تۋعا قۇرمەت ءاردايىم بيىك بولۋ كەرەك. ول وتاندى قۇرمەتتەگەننىڭ بەلگىسى. وسكەلەڭ ۇرپاقتى پاتريوتتىق رۋحتا تاربيەلەۋ پارىز. ونى رامىزدەردى قاستەرلەۋدەن باستاۋ قاجەت. جاستارعا رامىزدەردى قادىرلەۋدى ۇيرەتسەك وتانشىل, ۇلتجاندى بولىپ وسەدى. بۇل مەرەكە بىزگە سول ءۇشىن كەرەك. قارۋلى كۇشتەر ارداگەرلەرىنىڭ ۇيىمى, باسقا دا قوعامدىق بىرلەستىكتەر جاستاردىڭ پاتريوتتىق سانا-سەزىمىن ءوسىرۋ ماقساتىندا مەكتەپتەردە كوپتەگەن تاربيەلىك جيىندار, كەزدەسۋلەر وتكىزەدى. وقۋشىلارمەن سول كەزدەسۋلەردە ەلدى قورعاۋ ەر ازاماتتاردىڭ وتان الدىنداعى بورىشى ەكەنىن ايتامىز. رامىزدەرگە دە قۇرمەت نە ءۇشىن ەرەكشە بولۋ كەرەكتىگىن تۇسىندىرەمىز. قازىرگى الەمدە ورىن الىپ جاتقان كۇردەلى احۋالعا قاراي وتىرىپ جاستاردى ءوز ەلىنىڭ ناعىز پاتريوتى ەتىپ تاربيەلەۋدىڭ ماڭىزى ايرىقشا ەكەنى ايقىن كورىنىپ وتىر. ال رامىزدەر كۇنىن مەرەكەلەۋ ءبىز ءۇشىن سول پاتريوتتىق تاربيەنىڭ قاينار باستاۋى» دەدى س.ونباەۆ.
شىمكەنت
