توتەنشە جاعدايلار دەپارتامەنتىنىڭ 112 پۋلتىنە سۋىت حابار 4 ماۋسىم كۇنى ساعات 15:03-تە تۇسكەن. ءورت سوندىرۋشىلەر وقيعا ورنىنا قوڭىراۋ تۇسكەننەن كەيىن 5 مينۋتتان كەيىن كەلگەن.
«قۇتقارۋشىلار جەتكەن كەزدە ساعىرباەۆ كوشەسىندەگى جەكە تۇرعىن ءۇيدىڭ بىرىندە 30 شارشى مەتر اۋماق اشىق جالىنمەن جانىپ جاتتى. قۇتقارۋشىلار بەس بالانى ەس-ءتۇسسىز كۇيدە تاپتى. وكىنىشكە وراي, بالالار اۋرۋحانادا قايتىس بولدى» دەپ حابارلادى بقو تجد ءباسپاسوز قىزمەتى.
ءورت ءسوندىرىلىپ, وقيعا ورنىنا تجد باسشىلىعى, زەرتتەۋ-سىناق ءورت زەرتحاناسى, انىقتاۋ ءبولىمى جانە تج دەپارتامەنتىنىڭ پسيحولوگى كەلگەن. ءورتتىڭ شىعۋ سەبەبى انىقتالىپ جاتىر.
كەيبىر اقپارات بويىنشا قازا تاپقاندار ءبىر ءۇيدىڭ بالالارى, ولاردىڭ ەڭ ۇلكەنى 2019 جىلى تۋعان, كىشىسى نەبارى 8 ايلىق.
جانتۇرشىگەرلىك وقيعادان كەيىن وبلىس اكىمى ناريمان تورەعاليەۆ الەۋمەتتىك جەلىدە قازا تاپقان بالالاردىڭ اتا-انالارى مەن جاقىندارىنا كوڭىل ايتتى.
«مەنىڭ تاپسىرمام بويىنشا وقيعا ورنىنا ورىنباسارىم باردى, اۋدان اكىمى دە سول جەردە, بارلىق قاجەتتى قىزمەتتى ۇيلەستىرىپ جاتىر. اكىمدىك تاراپىنان جەرلەۋ ءراسىمىن ۇيىمداستىرۋ, پسيحولوگيالىق كومەك كورسەتۋ, باسپانامەن قامتاماسىز ەتۋ جانە وزگە دە الەۋمەتتىك قولداۋ شارالارى كورسەتىلەدى. جاعداي مەنىڭ ءجىتى باقىلاۋىمدا» دەپ جازدى وبلىس اكىمى.
باتىس قازاقستان وبلىسى
