ماقالا اۆتورى تاي ەلىنىڭ رامىزدەرگە دەگەن قۇرمەتى مەن گونكونگ حالقىنىڭ قىتايدىڭ مەملەكەتتىك ءانۇرانىنا تانىتقان قۇرمەتسىزدىگىن مىسالعا كەلتىرەدى.
«تايلاندتا كۇنىنە ەكى رەت قوعامدىق ورىنداردا ءانۇران شىرقالادى. ارقاشان مەيىرىمدى تاي حالقى وعان اسا قۇرمەت كورسەتەدى. مۇنداي سالتاناتتى ءراسىمدى كۇندەلىكتى كورۋ وتە اسەرلى, بۇل ادامداردى ءبىر بولۋعا شاقىرادى. كەيبىر مەملەكەتتەرگە بۇل بەلگىلى ءبىر سالتاناتتى ءىس-شارالاردا ورىندالاتىن ءانۇران بولسا, ال ونى تىڭداپ قانا قويماي, قۇرمەتتەۋ – تايلىقتاردىڭ كۇندەلىكتى ادەتى», دەيدى پول سۋرتيس.
ول تاي حالقىنا وسىلاي ءتانتى بولسا, گونكونگتە دورەكىلىك ورىن العان قوعامدىق كورىنىسكە دە كۋا بولعانىن ايتادى. اۆتوردىڭ بايانداۋىنشا, كوپتەن كۇتكەن سپورتتىق ءىس-شارا باستالار الدىندا قحر-دىڭ مەملەكەتتىك ءانۇرانى شىرقالعان كەزدە گونكونگ كورەرمەندەرىنىڭ ءبىرشاما بولىگى قولدارىمەن مادەنيەتسىز, دورەكى قيمىلدار جاساپ, انگە ىلەسەدى. بىراق ءانۇراندى يميتاتسيالايتىن بۇرمالانعان ءتىلدى قولدانادى. «ارنايى اكىمشىلىك ايماقتىق ۇكىمەت مۇنداي ارەكەتتەردى جازالاۋ ءۇشىن زاڭناما ەنگىزۋدى قاجەت دەپ ساناۋى ابدەن ورىندى», دەگەن پىكىرىن بىلدىرەدى پول سۋرتيس.
ال ۇلىبريتانيادا ەرتەدە كينوتەاترلار مەن باسقا جەرلەردە فيلم كورسەتىلمەس بۇرىن مەملەكەتتىك ءانۇران وينالعان. بۇل ءۇردىس قازىر تولىقتاي ساقتالماعان, دەسە دە تاريحي قۇندىلىقتارىن قاستەرلەۋگە بەيىمدەلگەن ەلدىڭ كەيبىر قالالارىندا فيلم باستالار الدىندا ءالى دە ءانۇران شىرقالادى. وسى سەبەپتى ءار بريتانيالىق ازاماتتىڭ «Union Jack» نەمەسە ۇلتتىق انۇرانعا قۇرمەتسىزدىك كورسەتۋى مۇمكىن ەمەس.
تاريحقا كوز جۇگىرتسەك, تۋ ەسكى زامانداردا دا ۇلتتى بىرىكتىرۋشى كۇش بولعانىن كورەمىز. شايقاستىڭ قىزىپ تۇرعان شاعىندا جاۋىنگەرلەر ءولىم قاۋپى ءتونىپ تۇرعانىنا قاراماستان قۇلاعان تۋدى كوتەرۋگە اسىعادى ەكەن. كوكتۇرىكتەر, التىن وردا, قازاق حاندىعى جانە الاش پارتياسىنىڭ دەربەس بايراقتارى ماڭىزدى ءىس-شارالاردا, سوعىستار مەن كەلىسسوزدەر كەزىندە كەڭىنەن قولدانىلعان.
جالپى, الەمنىڭ كوپتەگەن مەملەكەتىندە مەملەكەتتىك رامىزدەر تاريحي, ءدىني جانە پاتريوتتىق سەزىمگە نەگىزدەلىپ جاسالعان. ماسەلەن, ەۋروپانىڭ جانە كوپتەگەن باتىس مەملەكەتتەرىنىڭ بايراق-جالاۋلارىندا حريستيان ءدىنىنىڭ, ەۆرەيلەردە ءيۋدايزمنىڭ, مۇسىلمان مەملەكەتتەرىنىڭ كوپشىلىگىندە جاسىل ءتۇستىڭ, ايدىڭ بەلگىسى نەمەسە يسلام دىنىنە قاتىستى وزگە دە اتريبۋتتاردىڭ نىشانى بەينەلەنەدى.
ەلىمىزدە دە مەملەكەتتىك رامىزدەردى قولدانۋعا قاتىستى ارنايى زاڭنامالىق ءتارتىپ بار. ءتىپتى تاۋەلسىزدىكتىڭ العاشقى جىلدارىندا ونى پايدالانۋدىڭ ءتارتىبى مەن شارتتارى بارىنشا قاتاڭداتىلعان. كوك بايراعىمىزدى كەز كەلگەن جەردە جەلبىرەتۋگە تىيىم سالىندى. الايدا پرەزيدەنت قاسىم-جومارت توقاەۆ مەملەكەتتىك رامىزدەردى حالىقتىڭ جاپپاي قولدانۋىنا قاتىستى بۇرىن قابىلدانعان شەكتەۋلەردى ازايتىپ, ەل ازاماتتارىنىڭ مەملەكەتتىك تۋدى ءوز تۇرعىن ۇيلەرىنىڭ بالكوندارىنا نەمەسە قابىرعاسىنا ىلۋىنە زاڭدى تۇرعىدان رۇقسات بەرۋى قاجەت دەدى.
نەگىزى مۇنداي تاجىريبە الەمنىڭ كوپتەگەن مەملەكەتىندە بار. ماسەلەن, تۇركيادا بارلىق ەلدى مەكەندە كوپقاباتتى ءۇي قابىرعالارى, بالكوندارى جانە ماڭىزدى نىسانداردىڭ سىرتقى قاسبەتتەرى قىزىل ءتۇستى ەل بايراعىمەن كومكەرىلىپ تۇرادى. بۇقارالىق ءىس-شارالاردا, سپورتتىق سايىستاردا, ءتىپتى جەكەمەنشىك ۇيلەردىڭ تورىندە مەملەكەتتىك تۋ ءجيى ىلىنەدى.
پرەزيدەنتتىڭ تاپسىرماسىنا سايكەس ءۇش-ءتورت جىل بۇرىن مەملەكەتتىك رامىزدەردى پايدالانۋعا قاتىستى زاڭناماعا وزگەرىستەر مەن تولىقتىرۋلار ەنگىزىلىپ, ازاماتتاردىڭ مەملەكەتتىك تۋدى پاتريوتتىق ماقساتتا پايدالانۋىنا مۇمكىندىك جاسالدى. قازىر ازاماتتار ءوزى تۇراتىن ءۇيدىڭ بالكونىنا, تەرەزەسىنە نەمەسە كولىگىنە كوك تۋىمىزدى جەلبىرەتىپ ىلە الادى. تەك مەملەكەتتىك ءرامىزدىڭ تازا بولۋىنا, ونىڭ دۇرىس ىلىنۋىنە جانە زاڭنامادا بەلگىلەنگەن ستاندارتتارعا سايكەس بولۋىنا نازار اۋدارۋ قاجەت. ال ولاردى قۇرمەت تۇتۋ – باستى پارىز.
