سوكولوۆ-سارىبايدىڭ بۇگىنگى اياق الىسى

تەرەڭ وڭدەۋدەن سوڭ تەمىر ۇلەسى ارتادى

تاۋلىگىنە 10 مىڭ توننا كەن وندىرەتىن كەنىش ىشىنە كوز سالعانىمىزدا اۋىر تەحنيكالار نوقاتتاي بولىپ كوزگە شالىنىپ, تىنىمسىز قوزعالىپ جاتتى. 3 ەكسكاۆاتور, 5 «بەلاز» بار ەكەن.

وندىرىلگەن تەمىر كەنى الدىمەن قويماعا جەتكىزىلىپ, كەيىن ارنايى تەحنيكامەن فابريكاعا اپارىلىپ, سول جەردە باستاپقى سەپاراتسيا مەن وڭدەۋ ۇدەرىسىنە تۇسەدى. كەن قۇرامىنداعى تەمىردىڭ باستاپقى مولشەرى 34% بولسا, فابريكادا بۇل كورسەتكىش 63%-عا دەيىن ارتتىرىلادى. سودان كەيىن تۇيىرشىكتەلىپ, ساتىلىمعا جىبەرىلەدى. كەننىڭ ءبىر بولىگى كونتسەنترات رەتىندە وڭدەلىپ, 66%-عا دەيىن تەمىر ۇلەسى جوعارىلايدى. كونتسەنترات ارنايى كەپتىرگىش ارقىلى قۇرعاتىلادى. قۇر­عاق كونتسەنترات حيميالىق بايىتۋ تسيكلىنەن وتەدى. سوڭىندا 68%-دىق ساپاداعى تازا كونتسەنترات الىنادى.

ايلىق جوسپار – 400–800 مىڭ توننا ارالىعى

زاۋىتتىڭ ايلىق وندىرىستىك جوس­پارى 400 مىڭ توننادان 800 مىڭ تونناعا دەيىن جەتەدى. بۇعان جۇمىس ىستەپ تۇرعان ماشينالاردىڭ سانى مەن تۇتىنۋشى تاراپىنان سۇرانىس تىكەلەي اسەر ەتەدى. مۇندا بارلىعى 12 كۇيدىرۋ ماشيناسى بار. الايدا قازىر ونىڭ ەكەۋى كونسەرۆاتسيادا, بىرەۋى كۇردەلى جوندەۋدە, سوندىقتان 9 ماشينا عانا جۇمىس ىستەپ تۇر.

سۇرانىس ازايدى, جاۋاپكەرشىلىك كوبەيدى

سسكوب باس ديرەكتورى سەرگەي كۋزمەنكو گەوساياسي داعدارىستىڭ كومپانيا قىزمەتىنە تەرىس اسەر ەتكەنىن جاسىرمايدى.

ء«بىز رەسەيگە بۇرىن 50%-دان استام ءونىمىمىزدى جونەلتەتىنبىز. الايدا نەگىزگى تۇتىنۋشىمىز سانكتسيالىق شەكتەۋلەرگە ۇشىراعاننان كەيىن, شامامەن 60% كولەمىندەگى ءونىم سۇرانىسسىز قالدى. بىزگە دەرەۋ بالاما نارىق تابۋ, لوگيستيكانى بەيىمدەۋ جانە ءونىم ساپاسىن جاڭا تالاپقا سايكەستەندىرۋ قاجەت بولدى. بۇدان بولەك, بايىتۋ ۋچاسكەسىندە ەكى سەكتسيانى جاڭعىرتۋ ارقىلى ءونىم قۇرامىنداعى تەمىر ۇلەسى 66%-دان 68%-عا دەيىن كوتەرىلدى. بۇل ساپا­لىق وزگەرىس الىس نارىقتارعا جەت­كىزۋگە مۇمكىندىك بەردى. جالپى, گەوساياسي قىسىم ءوندىرىستى جاڭعىرتۋعا يتەرمەلەدى. قىزمەتكەرلەردىڭ دە كاسىبي بىلىكتىلىگى, ۇيىمشىلدىعى ارتتى. قازىر كاسىپورىن تولىق قۋاتتا جۇمىس ىستەمەگەنىمەن, شامامەن 56–60% دەڭگەيىندە تۇراقتى جۇمىس ىستەپ تۇر», دەيدى باس ديرەكتور.

كاسىپورىننىڭ تاريحي رەكوردى – جىلىنا 17 ملن توننا كونتسەنترات. 2021 جىلى بۇل كورسەتكىش 15 ملن توننادان اسقان. قازىر جوسپارلى ءوندىرىس كولەمى – 12,4 ملن توننا. دەگەنمەن ساتۋ قارقىنى بۇرىنعى دەڭگەيدە بولماعاندىقتان ءونىمنىڭ ءبىر بولىگى قويمالاردا ساقتاۋلى.

ال نارىقتىق باعىت ۇشكە بولىن­گەن: قىتاي – ەكسپورتتىڭ 50%-ىن ەنشى­لەيدى. رەسەيگە 25%-ى جىبەرىلەدى جانە ىشكى نارىققا 25%-ى جونەلتىلەدى.

جاڭعىرتۋ جاڭا بەلەسكە جول اشادى

كۋزمەنكونىڭ ايتۋىنشا, كاسىپ­ورىن­­نىڭ باستى شيكىزات كوزى سانالاتىن «قاشار» كەن ورنىندا 800 ملن توننا­دان استام كەن قورى بار. قازىر بۇل ايماقتا اۋقىمدى «قاشار كەنىشىن قايتا جاڭارتۋ» جوباسى جۇزەگە اسىرىلىپ جاتىر.

كەن ورنىنا «حيتاچي ەH4000» جۇك كولىكتەرى مەن «EX5600» ەكسكاۆاتورلارى جەتكىزىلگەن. بۇل – ەلىمىزدەگى ەڭ ءىرى تەحنيكالىق پارك. ەكسكاۆاتور ءشومىشى – 29 تەكشە مەتر, جىلدىق وندىرىستىك قۋاتى – 15–16 ملن توننا. بولاشاقتا بۇل كورسەتكىشتى 26 ملن تونناعا دەيىن جەتكىزۋ جوسپارلانعان.

زاۋىتتاعى فابريكالىق كەشەن دە جاڭعىرتىلىپ جاتىر. قازىردىڭ وزىندە №11 سەكتسيا تولىق جاڭعىرتۋدان وتكەن. №14 سەكتسيانىڭ جۇمىستارى مامىردا ءتامامدالادى دەپ جوسپارلانعان. بۇل وزگەرىستەر تەمىر كونتسەنتراتىنىڭ قۇرامىن 2%-عا ارتتىرۋعا مۇمكىندىك بەردى. ناتيجەسىندە, ىستىق بريكەتتەلگەن تەمىر جوباسى ءۇشىن قاجەت ساپالى شيكىزات پايدا بولدى.

ايتپاقشى, قازىر باسشىلىق قىتاي­لىق وندىرۋشىلەر تاجىريبەسىنە سۇيەنە وتىرىپ ونىمدىلىگى جوعارى, شىعىنى از قۇرىلعىنى وندىرىسكە ەنگىزۋدى ويلاستىرىپ وتىر. ماشينانىڭ جاڭا تۇرلەرى وندىرىستە جۇمىس ىستەي باستاسا, جىلىنا 5 ملن توننا ءونىم الۋ مۇمكىن بولماق. بۇل قازىرگى كورسەتكىشتەن 5 ەسە ارتىق.