دەپارتامەنت وكىلدەرىنىڭ ايتۋىنشا, ەلەكتروندى بىلەزىكتەردىڭ كومەگىمەن جىل باسىنان بەرى 108 سوتتالعان ازاماتتىڭ ءتارتىپ بۇزعانى انىقتالعان. ناتيجەسىندە, شارتتى تۇردە سوتتالعان 29 ازامات قۇزىرلى ورىنداردىڭ سەنىمىنەن ايىرىلىپ, جازانىڭ قالعان مەرزىمىن تەمىر توردىڭ ار جاعىندا وتەيتىن بولدى.
بىلەزىكتى پايدالانۋدىڭ زاڭمەن بەكىتىلگەن ەرەجە-ءتارتىبى بار. ءتارتىپ قىزمەتكەرى سوتتالعان ازاماتقا مىندەتتى تۇردە ەلەكتروندى قۇرىلعىعا مۇقيات بولۋدى ەسكەرتەدى. ونى قالاي پايدالانۋ كەرەگىن ءتۇسىندىرىپ, قولىنا وسى تۋرالى جادىناما ۇستاتادى. سوتتالعان ازاماتتىڭ بىلەزىكتى قاساقانا بۇلدىرگەنى انىقتالعان جاعدايدا, اتالعان دەپارتامەنت زاڭدا بەلگىلەنگەن تارتىپپەن شىعىندى ءوندىرىپ الۋ جونىندە ءىس قوزعاپ, ونى سوتقا جىبەرەدى.
«مۇنداي باقىلاۋ ءادىسىن قولدانۋ پروباتسيا قىزمەتى ماماندارى مەن سوتتالعاندار اراسىنداعى جۇزبە-ءجۇز قارىم-قاتىناستى ەداۋىر ازايتادى. وسىلايشا, جەمقورلىققا جول اشۋى ىقتيمال تاۋەكەلدى تومەندەتەدى. سونداي-اق قايتارا قىلمىس جاساۋدىڭ الدىن الادى. ماسەلەن, كەيىنگى ءتورت ايدىڭ ىشىندە ەلەكتروندى باقىلاۋ جۇيەسى ارقىلى قاشىقتان قاداعالاناتىن ازاماتتار اراسىندا بىردە-ءبىر قىلمىس تىركەلگەن جوق», دەيدى وبلىستىق قىلمىستىق-اتقارۋ جۇيەسى دەپارتامەنتى ءباسپاسوز قىزمەتىنىڭ حاتشىسى دينارا مولداباەۆا.
قوستاناي وبلىسى
