تۇڭعىشباي مۇقان – اقتوعاي اۋدانىنداعى مادەنيەت پەن ونەر سالاسىنىڭ دامۋىنا زور ۇلەس قوسقان تۇلعا. زەينەتكە شىققاننان كەيىن ءوڭىر تاريحىن تۇگەندەپ, ولكەتانۋ باعىتىندا بىرنەشە كىتاپتى جارىققا شىعاردى. اقتوعايدىڭ ەنتسيكلوپەدياسىن دا جاساۋعا ەسەلى ەڭبەگىن قوستى.
جاڭا جيناقتا قانشاما جىل جاساعان زەرتتەۋلەر مەن ىزدەنىستەرى بار. كەشتى مادەنيەت سالاسىنىڭ ۇزدىگى نۇرلان كۇلشىكەنوۆ تىزگىندەدى.
كىتاپتىڭ تۇساۋكەسەرىنە ءماجىلىس دەپۋتاتى قۇدايبەرگەن بەكسۇلتانوۆ, اسكەري قايراتكەر, زاپاستاعى پولكوۆنيك امانگەلدى جانتاسوۆ ارنايى قاتىسىپ, لەبىزدەرىن ءبىلدىردى. قۇدايبەرگەن بەكسۇلتانوۆ تۇڭعىشباي مۇقانعا كۇمىسپەن كۇپتەلگەن قامشى سىيلادى.
– ءبىز تۇڭعىشباي اقساقالدى ەرەكشە قۇرمەتتەيمىز. ول ءالى كۇنگە دەيىن ەلى ءۇشىن ايانباي ەڭبەكتەنىپ ءجۇر. اسىرەسە جاس ۇرپاققا قاجەتتى قاستەرلى توپىراعىنىڭ تاريحىن لايىقتى تورىنە شىعارا ءبىلدى. ءسىزدى وبلىستىق ءماسليحاتتىڭ دەپۋتاتى بولىپ جۇرگەن كەزدەن تانيمىن. ءار ىستە ۇلتتىڭ يگىلىگىن ويلاپ تۇراسىز. سونىڭىز تىزگىن ۇستاعان ازاماتتارعا ۇلگى بولسا ەكەن, – دەدى قۇدايبەرگەن بەكسۇلتانوۆ.
وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى عالىمجان وتەلباي ۇلىنىڭ قۇتتىقتاۋ حاتى وقىلدى. باسقارما باسشىسى تۇڭعىشباي مۇقان شىعارماشىلىعى ۇرپاق ءۇشىن قۇندى مۇرا بولاتىنىنا سەنىم بىلدىرگەن.
كەشتە تۇڭعىشباي مۇقاننىڭ سۇيىندىك جانىسباي, ورالبەك ءجۇنىس ۇلى سەكىلدى بەلگىلى قالامداستارى دا توبە كورسەتتى. كەش سوڭىندا ايگىلى «توقىراۋىن تولقىندارىنىڭ» ونەرپازدارى اننەن شاشۋ شاشتى.
قاراعاندى وبلىسى
