سىر بويىنىڭ رۋحاني ورداسى
مادەني-نىساننىڭ سالتاناتتى اشىلۋ راسىمىنە پرەمەر-ءمينيستردىڭ ورىنباسارى ەرمەك كوشەرباەۆ, وبلىس اكىمى نۇرلىبەك نالىباەۆ, «سامۇرىق-قازىنا» اق باسقارۋشى ديرەكتورى عيبرات اۋعانوۆ, پارلامەنت سەناتىنىڭ دەپۋتاتى رۋسلان رۇستەموۆ, قوعام وكىلدەرى قاتىستى.
«وسكەلەڭ ۇرپاق وسى ورتالىق ارقىلى ءوڭىردىڭ تاريحىن, مادەنيەتىن تەرەڭىنەن تانيدى دەپ سەنەمىز. مۇندا ءاربىر جادىگەر – رۋحاني بايلىعىمىزدىڭ دالەلى, وتكەن مەن بۇگىننىڭ التىن كوپىرى. «سامۇرىق-قازىنا» قورى كەيىنگى 4 جىلدا قىزىلوردا وبلىسىندا 13 الەۋمەتتىك جوبانى قولدادى. وتكەن جىلى ۇستەل تەننيسى ورتالىعىن اشتىق. «قامقورلىق» وڭالتۋ ورتالىعى جۇمىس ىستەيدى. بيىل جىل سوڭىنا دەيىن بالالارعا ارنالعان وڭالتۋ ورتالىعىن اشامىز. بارشاڭىزدى ماڭىزدى مادەني جانە تاريحي ورتالىقتىڭ اشىلۋىمەن قۇتتىقتايمىن», دەدى عيبرات اۋعانوۆ.
جاڭا عيماراتتىڭ اۋدانى 1953 جىلى سالىنعان بۇرىنعى ولكەتانۋ مۋزەيىنىڭ اۋماعىنان ەكى ەسە ۇلكەن. زاماناۋي مۋزەي عيماراتىندا 250 مىڭنان استام جادىگەردى ساقتاۋعا بولادى. بۇل – قازىرگى وبلىستىق مۋزەي قورىنان 3,5 ەسە ۇلكەن.
مۇراجاي ەكسپوزيتسيالارى 12 زالدا ورنالاسقان. وندا ءوڭىر مەن ەل تاريحىنىڭ نەگىزگى كەزەڭدەرى قامتىلعان. مىسالى, پالەونتولوگيا, ارحەولوگيا زالدارى, قازاق حاندىعى ءداۋىرى, ەتنوگرافيا, قىزىلوردا ءوڭىرىنىڭ تاريحى, الاشوردا مۇراسى, ەكىنشى دۇنيەجۇزىلىك سوعىس, مادەنيەت پەن ونەر, الەۋمەتتىك-ەكونوميكالىق دامۋ, عارىش تاقىرىبى, ەلىمىز تاۋەلسىزدىگىنىڭ قالىپتاسۋىنا ارنالعان زالدار بار. ەكسپوزيتسيانى جان-جاقتى زەرتتەۋ ماقساتىندا مۋزەيدە زاماناۋي تسيفرلىق تەحنولوگيالار ەنگىزىلگەن: جاساندى ينتەللەكت جۇيەسى, پانورامالىق, ديورامالىق ينستاللياتسيالار, ينتەراكتيۆتى LED ەكراندار ەكسكۋرسيانى كورنەكى ءارى قىزىقتى ەتەدى.
جاڭا ورتالىق – قىزىلوردانىڭ مادەني الەۋەتىن ايقىندايتىن زاماناۋي پلاتفورماعا اينالماق. بۇل – تەك وتكەندى ەسكە الۋ الاڭى عانا ەمەس, وسكەلەڭ ۇرپاققا وتانسۇيگىشتىك پەن تاريحي تانىم دارىتاتىن, بولاشاققا سەنىم ۇيالاتاتىن رۋحاني وردا.
قوماقتى ينۆەستيتسيا, ناقتى ناتيجە
كەيىنگى بەس جىلدا «Samruk-Kazyna Trust» قورى قىزىلوردا وبلىسىندا جالپى قۇنى 1,8 ملرد تەڭگەگە 13 الەۋمەتتىك جوبانى جۇزەگە اسىردى. جوبالاردىڭ قاتارىندا بىلتىر قازان ايىندا اشىلعان ۇستەل تەننيسى ورتالىعى بار.
سىرداريا وزەنىنىڭ سول جاعالاۋىندا ورنالاسقان, زاماناۋي تالاپتارعا ساي سالىنعان بۇل كەشەننىڭ اۋماعى – 3652 شارشى مەتر, ەكى قاباتتى عيماراتتا 16 ۇستەل, 350 كورەرمەنگە ارنالعان تريبۋنا قاراستىرىلعان. بۇگىندە 5 جاتتىقتىرۋشى 300-گە جۋىق ءجاسوسپىرىمدى ۇستەل تەننيسىمەن كاسىبي تۇردە اينالىسۋعا باۋلىپ كەلەدى. جارتى جىلدىڭ ىشىندە ورتالىقتىڭ 18 سپورتشىسى 1-سپورتتىق رازرياد يەسى اتانىپ, جاس ورەندەر رەسپۋبليكالىق دەڭگەيدەگى جارىستاردا جەڭىس تۇعىرىنان كورىنىپ ءجۇر.
ۇرپاققا ءبىلىم, ۇلتقا بىرلىك سىيلاعان جوبا
سونىمەن قاتار بىلتىر قازان ايىندا قوردىڭ «جايلى مەكتەپ» ۇلتتىق جوباسى اياسىنداعى العاشقى زاماناۋي وقۋ ورنى قولدانىسقا بەرىلدى. 900 وقۋشىعا ارنالعان مەكتەپ قازىرگى زامان تالاپتارىنا تولىق ساي. جالپى, جوبا شەڭبەرىندە وڭىردە 12 300 ورىندىق 21 مەكتەپ سالۋ كوزدەلىپ, بۇگىندە العاشقى ءتورت مەكتەپ وقۋشىلارعا ەسىگىن ايقارا اشتى.
بۇدان بولەك, قوردىڭ ءاۋتيزمى بار بالالارعا ەرەكشە نازار اۋداراتىن الەۋمەتتىك ساياساتى اياسىندا وڭىردە ەرتە ارالاسۋ ورتالىعى اشىلىپ, ونداعى سابيلەر مەن ولاردىڭ وتباسىلارىنا كەشەندى كومەك كورسەتىلەدى.
1 مامىر — قازاقستان حالقىنىڭ بىرلىگى كۇنىنە وراي قىزىلوردا قالاسىندا «سامۇرىق-قازىنا» كومپانيالارى توبىنىڭ قولداۋىمەن «دوستىق ءۇيىنىڭ» جاڭا عيماراتىنىڭ ىرگەتاسى قالاندى. جالپى قۇنى 3,8 ملرد تەڭگە بولاتىن بۇل زاماناۋي نىسان ەتنومادەني بىرلەستىكتەرگە ارنالعان تولىق جابدىقتالعان ورتالىققا اينالادى.
ايگەرىم اقشولاقوۆا
