سۋرەتتى تۇسىرگەن – قىمبات يمانعالي
جۇمىسشى ماماندىقتارى جىلىنا وراي ۇيىمداستىرىلعان بايقاۋعا ايماقتىڭ ءار تۇكپىرىندە بالدان بۇلاق اعىزىپ وتىرعان ومارتاشىلار كەلىپ قاتىستى. ومارتا ۇستاپ وتىرعان شارۋالاردىڭ قاتارى كوپ بولعانىمەن, كەيىنگى جىلدارى بال اراسىن اسىلداندىرۋ سىندى جۇمىستار كەنجەلەپ قالعان. ول تۋرالى اراشىلار سان رەت ايتقان. الايدا توقىمداي جەرى توقسان ءتۇرلى گۇلگە تولى شىعىستا بال اراسىنىڭ بابىن ۇيرەتەتىن مەكتەپ جوقتىڭ قاسى.
ارا – قۇدىرەتتى جاراتىلىس. ولاردىڭ جاسايتىن التى قىرلى ۇياشىقتارىنىڭ ءوزى – جۇمباق قۇبىلىس. ال ونداعان شاقىرىمنان كوزگە كورىنەر-كورىنبەس بال تاسۋى – ناعىز ەڭبەكقورلىق. جۇمىسشى ارا بار-جوعى 35–40 كۇن عانا ءومىر سۇرسە, سول ۋاقىت ىشىندە تىرنەكتەپ جيناعان بالى جارتى شاي قاسىققا دا تولمايدى ەكەن. ال ومارتانىڭ پاتشايىمى بەس جىلعا دەيىن ءومىر سۇرەدى.
ءسويتىپ, ءبىر كۇنگە سوزىلعان ومارتاشىلار بايقاۋىندا شەبەرلىك ساعاتتارى وتكىزىلدى, بال تاڭداۋدىڭ سان ءتۇرلى جولى ايتىلدى. ءبىرى حيميالىق زاتتار دامىعان زاماندا جاقسى بال تاڭداۋ وڭاي ەمەس دەسە, ەندى ءبىرى وڭتايلى جولدارىن نۇسقادى.
«جاقسى بال تاڭداۋ ءۇشىن مايلىققا ءبىر تامشىسىن تامىزىپ كورۋگە بولادى. ەگەر بال جايىلىپ كەتسە, ساپاسىز. قوپ-قويۋ بولىپ ورنىندا قالسا, ەش ويلانباستان ساتىپ الۋعا بولادى», دەيدى كاتونقاراعايلىق ومارتاشى ۆالەنتينا كاسەنوۆا.
ايتا كەتەرلىگى, ومارتادان بال عانا وندىرىلمەيدى. ودان باسقا ادام اعزاسىنا پايدالى ونداعان ءتۇرلى ءونىم بار. بالاۋىزدان باستاپ, گۇلدىڭ تۇيىرشىكتى توزاڭىنا دەيىن قولجەتىمدى. پەرگا, پروپوليس تە مىڭ دا ءبىر اۋرۋعا ەم.
ءىس-شارا سوڭىندا قازىلاردىڭ شەشىمىمەن 45 جىلدان بەرى بال شايقاپ وتىرعان يگور سۆيرينسكي جەڭىسكە جەتىپ, 150 مىڭ تەڭگەنىڭ سەرتيفيكاتىنا يە بولدى. ارداگەر ومارتاشى بۇگىنگى تاڭدا 400 ۇيا ۇستاپ وتىر. سونداي-اق شارادا ءوڭىردىڭ بىرقاتار ومارتاشىسى اۋىل شارۋاشىلىعى مينيسترلىگىنىڭ «ەڭبەك ارداگەرى» مەدالىمەن, «اۋىل شارۋاشىلىعى سالاسىنىڭ ۇزدىگى» توسبەلگىسىمەن جانە قۇرمەت گراموتاسىمەن ماراپاتتالدى.
شىعىس قازاقستان وبلىسى,
گلۋبوكوە اۋدانى
