فوتو: اشىق دەرەككوز
ءىس-شارا باستالماس بۇرىن قۇرمەتتى قوناق ۋنيۆەرسيتەت مۋزەيىنە ارنايى بارىپ, وقۋ ورنىنىڭ تاريحي دامۋى مەن جەتىستىكتەرىمەن تانىستى.
كەزدەسۋ اياسىندا پروفەسسوردىڭ «قازاقتىڭ قوناەۆى» جانە «وتىز جىلدىڭ وي-تولعاۋى» اتتى جاڭا كىتاپتارىنىڭ تۇساۋكەسەر ءراسىمى ءوتتى. جاڭا تۋىندىدا اۆتور ءوزى كۋا بولعان ەستەلىكتەردى بايانداپ, كەڭەستىك تۇستاعى ادىلەتسىزدىكتەر مەن قايشىلىقتار تۋرالى تولعامدى ويلارىمەن بولىسكەن. ال «قازاقتىڭ قوناەۆى» – ۇلتىمىزدىڭ دارا پەرزەنتى دىنمۇحامەد قوناەۆتىڭ ۇزاق جىلدار ۇلت مۇددەسىنە ساي اتقارعان قايراتكەرلىك ەڭبەگىنە ارنالعان.
ءىس-شارانىڭ ماقساتى – جاستاردى ەل تاريحىنداعى كورنەكتى تۇلعالاردىڭ ءومىر جولىمەن تانىستىرۋ, ۇلتتىق سانا مەن تاريحي جادىنى جاڭعىرتۋ, سونداي-اق ازاماتتىق ۇستانىم مەن وي ەركىندىگىن دامىتۋ بولدى.
ءىس-شاراعا اباي اتىنداعى قازۇپۋ باسقارما توراعاسى-رەكتور بولات تىلەپ, اقىن, دراماتۋرگ, مەملەكەت جانە قوعام قايراتكەرى نۇرلان ورازالين, ۋنيۆەرسيتەت باسشىلىعى, پروفەسسورلىق-وقىتۋشىلىق قۇرامى مەن جاس عالىمدار قاتىستى.
رەكتور بولات تىلەپ قۇتتىقتاۋ سوزىندە قۋانىش سۇلتانوۆتىڭ مەملەكەتىمىز بەن عىلىم سالاسىنا قوسقان ۇلەسىن ەرەكشە اتاپ ءوتىپ, ونى جاس ۇرپاق ءۇشىن تاعىلىم مەكتەبى دەپ باعالادى.
«قۋانىش سۇلتانوۆ – ەل تاريحىنىڭ بەل ورتاسىندا جۇرگەن, سان ءتۇرلى كەزەڭدەردە حالىق مۇددەسىن جوعارى قويعان, ويى تەرەڭ, ءسوزى ساليقالى قايراتكەر. ونىڭ ەڭبەكتەرى – وسكەلەڭ ۇرپاق ءۇشىن تاعىلىم مەكتەبى. بۇگىنگى تۇساۋى كەسىلگەن كىتاپتارى – تاۋەلسىزدىك شەجىرەسىنىڭ ماڭىزدى پاراقتارى رەتىندە ەل جادىندا ساقتالادى دەپ سەنەمىن», – دەدى رەكتور.
ال كەزدەسۋ بارىسىندا قۋانىش سۇلتانوۆ تاۋەلسىزدىكتىڭ تاريحي ماڭىزى, ۇلتتىق سانا مەن پاتريوتتىق تاربيەنىڭ ءمانى جايلى كەڭىنەن توقتالىپ, دىنمۇحامەد قوناەۆ تۇلعاسى ارقىلى ۇلت كوشباسشىسىنىڭ بەينەسىن سيپاتتايتىن تۇستارعا نازار اۋداردى. سونىمەن قاتار, سوڭعى وتىز جىلداعى ساياسي-الەۋمەتتىك وزگەرىستەرگە قاتىستى ءوزىنىڭ اۆتورلىق كوزقاراسىن ورتاعا سالدى.
كەزدەسۋ اياسىندا قاتىسۋشىلار قاتىسۋشىلار اۆتور كوتەرگەن وزەكتى تاقىرىپتاردى كەڭىنەن تالقىلاپ, قوعام دامۋىنا قاتىستى وي-پىكىرلەرىمەن ءبولىستى.
كەش سوڭىندا پروفەسسور قۋانىش سۇلتانوۆقا اباي ۋنيۆەرسيتەتىنىڭ ەڭ جوعارى ماراپاتتارىنىڭ ءبىرى – اباي مەدالى تابىستالىپ, ۇلتتىق داستۇرگە ساي قۇرمەتتى قوناققا شاپان جابىلدى. بۇل سىي-قۇرمەت – مەملەكەت جانە قوعام قايراتكەرى قۋانىش سۇلتانوۆتىڭ عىلىم مەن قوعام دامۋىنا قوسقان سۇبەلى ۇلەسىنە دەگەن جوعارى باعانىڭ بەلگىسى بولدى.
الينا قايراتقىزى,
ەۇۋ 2-كۋرس ستۋدەنتى
