فيلم ءباس تىگەم دەپ ناعىز لۋدومانعا اينالىپ كەتكەن ناقتى كەيىپكەرلەردىڭ باستان كەشكەن شىتىرمان وقيعالارىنا نەگىزدەلگەن — ولار اقشا, وتباسى, دەنساۋلىق, كەيدە ۇمىتىنەن ايىرىلعان ادامدار. كەيىپكەرلەر ادەتتە ەشكىمگە ءتىس جارمايتىن سىرلارىمەن بولىسەدى. باستان وتكەرگەنىن اشىق مويىنداپ, ورمەكشى تورىنداي اياۋسىز جۇيەگە جۇتىلىپ كەتكەن كەيىپكەردى كورگەن كورەرمەن – بۇل اۋىر دەرتتىڭ كازينو مەن بۋكمەكەرلىك كەڭسەلەردەن اسىپ, سمارتفون ارقىلى جاستاردىڭ كۇندەلىكتى ومىرىنە ەنىپ كەتكەنىنە كوز جەتكىزەدى.
29 مامىردا وتكەن الدىن الا كورسەتىلىمگە دەپۋتاتتار, بلوگەرلەر, جۋرناليستەر, پسيحولوگتار, قوعام قايراتكەرلەرى قاتىستى. كورسەتىلىمنەن كەيىن ويىن بيزنەسى مەن لوتەرەيا قىزمەتىن رەتتەۋ بويىنشا 2024 جىلى قابىلدانعان زاڭنىڭ اۆتورلارى, پارلامەنت ءماجىلىسىنىڭ دەپۋتاتتارى پروفيلاكتيكالىق جۇمىستاردى كۇشەيتۋ جانە پسيحولوگيالىق كومەككە قولجەتىمدىلىكتى ارتتىرۋ بويىنشا ءوز ۇسىنىستارىن ايتىپ, بەلسەندى تالقىلاۋ ءوتتى.
«قۇمار ويىندارعا تاۋەلدىلىك – ادام تاعدىرىن, بۇتىندەي وتباسىلاردى ويرانداپ, ءومىردى كۇيرەتەتىن تراگەديا. ەڭ قورقىنىشتىسى – بۇل دەرتكە جاستار ءجيى ۇرىنا باستادى. سوندىقتان دا مۇنداي تاقىرىپتاردى اشىق, شىنايى, كاسىبي تۇردە كوتەرۋ اسا ماڭىزدى. «ستاۆكا نا جيزن» ءفيلمى – جاي عانا حيكايا ەمەس, بۇل – ءۇمىت. ەگەر وسى جوبا ارقىلى ءبىز ءبىر ادامنىڭ ءومىرىن قۇتقارا الساق – وندا بۇل ءفيلمنىڭ بەكەر بولماعانى. ءبىز بۇل ماسەلەنى اشىق ايتىپ, ناقتى وزگەرىستەرگە قول جەتكىزۋىمىز كەرەك», دەدى ءماجىلىس دەپۋتاتى ەدىل جاڭبىرشين.
ء«بىز لۋدومانياعا قارسى باعىتتالعان زاڭنىڭ قابىلدانۋىنا ۇزاق ۋاقىت بويى كۇش سالدىق. بۇل باستامامىزدى مەملەكەت باسشىسى دا قولدادى. ول ناقتى ايتتى: قازاقستاندا 400 مىڭعا جۋىق ادام قۇمار ويىندارعا تاۋەلدى. بۇل – وراسان زور كورسەتكىش. ءبىز بۇل ادامداردى قيىندىقپەن بەتپە-بەت جالعىز قالدىرۋعا قۇقىمىز جوق. قازىر مۇنداي جاندارعا كەڭەس بەرۋ جانە پسيحولوگيالىق قولداۋ كورسەتىلۋدە. بىراق زاڭ – تەك قۇرال عانا. ەڭ باستىسى – قوعام ساناسىن وزگەرتۋ», دەدى ءماجىلىس دەپۋتاتى ەلنۇر بەيسەنباەۆ.
ء«بىزدىڭ ميسسيامىز — ادامداردى شىنىمەن تولعاندىراتىن جانە قوعامدى الاڭداتاتىن وزەكتى ماسەلەلەردى قوزعاۋ. بۇل تاقىرىپتاردى جاريا ەتىپ قانا قويماي, قوعاممەن اشىق جانە تەرەڭ تالقىلاۋ قاجەت. «ستاۆكا نا جيزن» دەرەكتى جوباسى — قۇمار ويىننىڭ قۇلدىعىنا تۇسكەن جانداردىڭ جانايقايى. شىنى كەرەك, مۇنداي وتكىر ماسەلەدەن ءبىز شەت قالا المايمىز», دەپ اتاپ ءوتتى «حابار» اگەنتتىگىنىڭ باسقارما توراعاسى كەمەلبەك ويشىباەۆ.
جوبا بۇعان دەيىن قوعامداعى دەپرەسسيا دەرتى تۋرالى فيلممەن اشىلعان اگەنتتىكتىڭ دەرەكتى جوبالار تسيكلىن جالعاستىردى. بۇل باعىتتاعى ءاربىر جۇمىس — جاي عانا كينو ەمەس, «جابۋلى قازان» كۇيدە قالعان وتكىر ماسەلەلەر تۋرالى ۇنسىزدىكتى بۇزۋعا ارنالعان الەۋمەتتىك مانيفەست.
«ستاۆكا نا جيزن» دەرەكتى ءفيلمىنىڭ تەلەكورسەتىلىمى 8 ماۋسىم كۇنى ساعات 21:00-دە «حابار» تەلەارناسىندا وتەدى.
