ءىس-شاراعا قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆا, قىتاي كوممۋنيستىك پارتياسى ورتالىق كوميتەتى ۇگىت-ناسيحات ءبولىمى مەڭگەرۋشىسىنىڭ ورىنباسارى حۋ حەپين, قحر ۇلت ىستەرى جونىندەگى كوميتەتى توراعاسىنىڭ ورىنباسارى گو ۆەيپين, قحر شەتەل ادەبيەتىن باسىپ شىعارۋ جانە تاراتۋ جونىندەگى باس باسقارماسىنىڭ جەتەكشىسى دۋ چجانيۋان, سونداي-اق قحر-دىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى حان چۋنلين قاتىستى.
العاش بولىپ ءسوز العان قكپ ورتالىق كوميتەتى ۇگىت-ناسيحات ءبولىمى مەڭگەرۋشىسىنىڭ ورىنباسارى حۋ حەپين قازاق تىلىندە جارىق كورگەن سي ءتسزينپيننىڭ «ەل باسقارۋ جونىندە» اتتى كىتابى ەكى ەل اراسىنداعى ديپلوماتيالىق قارىم-قاتىناستاردى تەرەڭدەتە تۇسەتىنىنە, قىتاي مەن قازاقستان ىنتىماقتاستىعىن ودان ءارى ارتتىرىپ, ءوزارا تاجىريبە الماسۋعا سەپتىگىن تيگىزەتىنىنە, مەملەكەتتەردىڭ بىرلەسكەن ستراتەگيالارىنا تىڭ سەرپىلىس بەرەتىنىنە توقتالدى.
ال مادەنيەت جانە اقپارات ءمينيسترى ايدا بالاەۆا قىتاي حالىق رەسپۋبليكاسىنىڭ توراعاسى سي ءتسزينپيننىڭ ەل باسقارۋ فيلوسوفياسى, ىشكى جانە سىرتقى ساياساتقا كوزقاراسى, سونداي-اق قىتايدىڭ ەكونوميكالىق جانە الەۋمەتتىك دامۋ ستراتەگيالارىن قامتيتىن «ەل باسقارۋ جونىندە» اتتى كولەمدى ەڭبەگىنىڭ ءمان-ماڭىزىنا كەڭىرەك توقتالدى.
«بۇل كىتاپ – قىتاي مەملەكەتىنىڭ ساياسي باعىت-باعدارىن, ۇلتتىق بىرلىك پەن تۇراقتىلىقتى قامتاماسىز ەتۋدەگى ۇستانىمدارىن, سونداي-اق ۇزاقمەرزىمدى ستراتەگيالىق ماقساتتارىن تۇسىنۋگە ۇمتىلاتىن قازاق وقىرماندارى ءۇشىن قۇندى دەرەككوز بولماق. سونىمەن قاتار تۋىندى – قىتايدىڭ حالىقارالىق ارەناداعى ۇستانىمدارى مەن ءرولىن سارالاۋعا مۇمكىندىك بەرەتىن ماڭىزدى ەڭبەك», دەدى ا.بالاەۆا.
سونداي-اق مينيستر قىتاي قازاقستان ءۇشىن سەنىمدى دوس, وداقتاس ءارى ستراتەگيالىق سەرىكتەس ەكەنىنە, ەكى ەل اراسىنداعى عاسىرلار بويعى دوستىق, ءوزارا قۇرمەت پەن سەنىمگە نەگىزدەلگەن ىنتىماقتاستىق الداعى ۋاقىتتا تابىستى دامي بەرەتىنىنە توقتالدى.
«مەملەكەتتەرىمىزدىڭ باسشىلارى اراسىنداعى ءوزارا تۇسىنىستىك پەن جوعارى دەڭگەيدەگى سەنىم – ەكىجاقتى قارىم-قاتىناستاردىڭ نىعايۋىنا زور ىقپال ەتىپ كەلەدى. سوندىقتان دا قازاقستان مەن قىتاي اراسىنداعى ستراتەگيالىق ارىپتەستىگىمىز – ەكونوميكالىق دامۋ, وڭىرلىك قاۋىپسىزدىك پەن مادەني-گۋمانيتارلىق سالاداعى تىعىز بايلانىستاردىڭ بەرىك ىرگەتاسى بولارىنا سەنەمىز», دەدى مينيستر.
تۇساۋكەسەردە ءسوز سويلەگەن ديپلوماتتار سي ءتسزينپيننىڭ «ەل باسقارۋ جونىندە» كىتابىنىڭ ساياساتتانۋشىلار, حالىقارالىق قاتىناستار سالاسىنىڭ ماماندارى, قىتاي ءتىلىن, مادەنيەتى مەن قوعامدىق قۇرىلىمىن زەرتتەۋشىلەر ءۇشىن اسا ماڭىزدى ەڭبەك ەكەنىن اتاپ ءوتتى. سونداي-اق بۇل كىتاپ ساراپشىلار مەن زەرتتەۋشىلەر, ىسكەر ورتا مەن كاسىپكەرلەر قاۋىمداستىعى ءۇشىن قىتاي ەكونوميكاسىنىڭ تەتىكتەرىن, ونىڭ جۇمىس ىستەۋ قاعيداتىن بىلۋگە, ينۆەستيتسيا ءۇشىن جاڭا يدەيالار مەن جاڭا بيزنەس-جوسپارلاردى تۋدىرۋعا كومەكتەسەتىنى ايتىلدى.
