سۋرەتتى تۇسىرگەن – جانگەلدى ابدىعالىم
وبلىسىمىزدا مەملەكەتتىك جالپى ءبىلىم بەرەتىن مەكتەپتەر سانى – 402. ونىڭ 231-ءى – اۋىلدىق جەردە ورنالاسقان. ال جالپى وقۋشىلار سانى – 172 425. ونىڭ 40 753-ءى اۋىلدىق مەكتەپتەردە ءبىلىم الادى. اۋىلدىق ءبىلىم وشاقتارىنىڭ 160-ى شاعىن جيناقتالعان مەكتەپتەر قاتارىندا. وسى ورايدا وسكەلەڭ ۇرپاقتى وقىتۋ, تاربيەلەۋ جانە دامىتۋ ءۇشىن قولايلى جانە قاۋىپسىز جاعدايلار جاساۋ – ماڭىزدى. وقۋشى ورىندارىنىڭ تاپشىلىعى, اپاتتى جانە ءۇشاۋىسىمدى مەكتەپتەردىڭ ماسەلەسىن شەشۋ – كۇن تارتىبىندە تۇر.
وسى ورايدا قاراعاندى قالاسىندا, بۇقار جىراۋ جانە شەت اۋداندارىندا 8 600 وقۋ ورنىنا ارنالعان 9 مەكتەپ اشىلدى. نوۆوسترويكا اۋىلىندا 150 ورىندىق جاڭا مەكتەپ اپاتتىق عيماراتتىڭ ورنىنا سالىنعان. بالالارعا زاماناۋي جانە كەڭ سىنىپ بولمەلەرىندە وقۋعا مۇمكىندىك بەرىلىپ, مەكتەپتەردى ماتەريالدىق-تەحنيكالىق جاراقتاندىرۋ دا جاڭارتىلعان.
جالپى, قاراعاندى وبلىسىنداعى «كەلەشەك مەكتەپتەرى» ۇلتتىق جوباسى بويىنشا 2025 جىلعا دەيىن 12 500 ورىندىق 18 زاماناۋي مەكتەپتىڭ قۇرىلىسى جوسپارلانعان بولاتىن. ونىڭ ىشىندە بيىل 10-ى قاراعاندى, بالقاش, بۇقار جىراۋ جانە شەت اۋداندارىندا تاپسىرىلۋى ءتيىس. قىركۇيەك ايىندا بۇقار جىراۋ اۋدانىنىڭ نوۆوسترويكا اۋىلىندا اپاتتى جاعدايدىڭ ورنىنا سالىنىپ جاتقان 150 ورىندىق مەكتەپ پايدالانۋعا بەرىلەدى. سونىمەن قاتار بۇگىنگى تاڭدا مەكتەپتەر بازاسى جاڭعىرتىلىپ جاتىر. بيىل 15 عيماراتقا كۇردەلى جوندەۋ جۇمىستارىن جۇرگىزۋ جوسپارلانىپ وتىر. وقۋ جابدىقتارى دا جاڭارتىلعان. وتكەن جىلى فيزيكا, حيميا, بيولوگيا, STEM پاندەرىن وقىتۋعا ارنالعان 72 زاماناۋي كابينەت ساتىپ الىندى. بيىل تاعى 65 جوسپارلانعان.
– «اۋىلدىق جەرلەردە تىرەك مەكتەپتەردىڭ الەۋەتىن دامىتۋ» جوباسى بويىنشا «قازاقستان حالقىنا» قورى 8 مەكتەپتى جاڭعىرتقان. بيىل تاعى ءۇش جوسپار بار. قالا مەن اۋىل اراسىنداعى الشاقتىقتى ازايتۋ ءۇشىن «رەپەتيتور», «تسيفرلىق مۇعالىم», «تابىس فورمۋلاسى», «مىڭ مەكتەپ» جوبالارى ىسكە اسىرىلۋ ۇستىندە. مەكتەپتەردە بارلىق باستاۋىش سىنىپ وقۋشىلارى تەگىن ىستىق تاماق الادى. بۇل – 75 مىڭنان استام بالا. سونداي-اق جالپىعا بىردەي ءبىلىم قورىنىڭ ەسەبىنەن الەۋمەتتىك وسال وتباسىلاردان شىققان 6 مىڭعا جۋىق بالا تەگىن تۇسكى اس ىشەدى. وتكەن جىلى وبلىستا 27 جاڭا مەكتەپ اۆتوبۋسى ساتىپ الىندى. بيىل دا جاڭارتۋ جالعاسادى, – دەيدى گۇلباقىت ءجۇنىسوۆا.
جالپى, اتالعان مەكتەپتەردىڭ جابدىقتارى مەن قۇرىلىس ماتەريالدارى جوعارى تالاپتارعا سايكەس تاڭدالىپ الىنعان. پرەزيدەنتتىڭ مەگا جوباسىن ساپالى ىسكە اسىرۋدا سپورتزالداردىڭ سانى باسقا مەكتەپتەردەن الدەقايدا ارتىق. مەكتەپتەردىڭ ديزاينى دا ەرەكشە, ءتىپتى باستاۋىش پەن ەرەسەك سىنىپتاردىڭ بولەك بلوكتاردا وقۋى سەكىلدى ماسەلەلەر دە ءجىتى قاراستىرىلعان. شالعايداعى اۋىلداردىڭ وزىندە جايلى مەكتەپتەردىڭ بوي كوتەرەتىنى اۋىل بالالارى ءۇشىن ۇلكەن ولجا ءارى قۋانىش بولعالى تۇر.
– قازىرگى تاڭدا ءبىلىم وشاقتارىنىڭ قۇرىلىس جۇمىستارى كەستەگە ساي ءجۇرىپ جاتىر. مەرزىمى مەن ساپاسىن ەرەكشە باقىلاۋدا ۇستاپ وتىرمىز. جاڭا مەكتەپتەر جەتى ءتۇرلى تالاپقا ساي 300, 600, 900, 1200, 1500, 2000 جانە 2500 ورىندىق بولىپ, اۋىلدا, قالادا دا جاڭا بىرىڭعاي ستاندارت نەگىزىندە سالىنادى. باستاۋىش جانە جوعارى سىنىپ وقۋشىلارى مەكتەپتە بولەك بلوكتاردا وقيدى. ءار بلوكتا وقۋ كابينەتتەرى, دارەتحانالار, سپورت زالدارى بار. بالالار ءۇشىن بەينەباقىلاۋ, دىبىستىق حابارلاۋ جانە باسقا دا كۇشەيتىلگەن قاۋىپسىزدىك شارالارىن ورناتۋ كوزدەلىپ وتىر. زامان تالابىنا ساي تولىقتاي جابدىقتالادى, – دەيدى وبلىستىڭ قۇرىلىس, ساۋلەت جانە قالا قۇرىلىسى باسقارماسى باسشىسىنىڭ ورىنباسارى ابىلاي سماعۇلوۆ.
وسىلايشا, «كەلەشەك مەكتەپتەرى» ۇلتتىق جوباسىن ورىنداۋ ۇلتتىق قور قاراجاتى ەسەبىنەن جۇزەگە اسىرىلىپ جاتقاندىقتان, بۇل جوبا ءۇش اۋىسىمدىق جانە اپاتتىق مەكتەپتەردى جويۋعا تولىعىمەن مۇمكىندىك بەرەدى. قاراعاندى وبلىسى بويىنشا «كەلەشەك مەكتەپتەرى» ۇلتتىق جوباسى اياسىندا 2026 جىلعا دەيىن 12 500 وقۋشىعا 18 مەكتەپ سالىپ, پايدالانۋعا بەرۋ جوسپارلانعان. قارجىلاندىرۋدىڭ جالپى كولەمى 87,4 ملرد تەڭگەنى قۇرايدى.
پرەزيدەنتتىڭ تىكەلەي تاپسىرماسى بويىنشا جۇزەگە اسقان «كەلەشەك مەكتەپتەرى» جوباسى اياسىندا قاراعاندىدا ەكى مەكتەپ اشىلدى. ونىڭ ءبىرى – №19 مەكتەپ. بۇگىندە ءبىلىم وشاعى وقۋشىلار اراسىنداعى ورىن تاپشىلىعىن جويىپ, ساپالى ءبىلىم بەرىپ جاتىر.
بۇگىندە مەكتەپ عيماراتى – وبلىس مەكتەپتەرى اراسىنداعى ەڭ ۇلكەنى. مۇندا ءبارى ساراپتالىپ, ويلاستىرىلعان. ۇلكەن اۋماققا قوسا بالالارعا ىڭعايلى بولۋ ءۇشىن قويىلعان پەريمەترلىك كىرەبەرىستەر, باستاۋىش سىنىپتار مەن اعا بۋىنعا ارنالعان جەكە كىرەبەرىستەر دە بار. مەكتەپ اۋلاسىندا ويىن, ۆوركاۋت, فۋتبول جانە باسكەتبول الاڭدارى, حوككەي كورتى, جۇگىرۋ الاڭى دا بار. ال كوگالداندىرۋعا ارنالعان اعاشتار قوڭىرجاي بەلدەۋلىك كليماتتى ەسكەرە تاڭدالىپ الىنعان. قازىرگى تاڭدا جاڭا ءبىلىم وشاعىندا سول اۋدانعا جاقىن «تريليستنيك», «Arena Park», «جاڭا ورتالىق», «اتامەكەن», «كومفورتنىي دوم», «ساپفير», «بايسانات», «Zaman», «امادينا», «Onix» جانە «مەرەي» تۇرعىنۇي كەشەندەرىندە تۇراتىن وقۋشىلار ءبىلىم الىپ جاتىر. جالپى اۋدانى 10 مىڭ شارشى شاقىرىمنان اساتىن №19 مەكتەپتە وقۋشىلار ءۇشىن بارلىق جاعداي جاسالعان.
قاراعاندى وبلىسى
